عالَمدَه یا حسین دِیمه سَرداریُوام سَنُون
فَخریم بُو دور غُلام هَواداریُوام سَنون
یا سیّدی دِیمَم سَنَه خِدمَت دَه لایقَم
اَمّا یانام شَرارِ مُحَبَت دَه شایقَم
عالَم دَه عاشقین نَدی جُرمی مَن عاشقم
بیر عُمر دور کی عِشق گِرفتاریُوام سَنُون
هر کیمسَه نُون اَگر چه رِسُوم و قَراری وار
عالَم دَه عاشق عِشقینُون اَمّا عَیاری وار
سُلطانَه عاشق اوُلسا غُلام اِفتخاری وار
مَن عاشقم غُلامِ هَواداریُوام سَنُون
عاشق تیکر اُمیدیلَه دِلدارینَه گُوزون
سَن رُوحومُون عَلاقه سی سَن حالی سَن اوُزون
من نِیلورَم بِهشتی بِهشتیم دی گُول یُوزون
عالَم بُولور کی عاشقِ رُخساریُوام سَنُون
غَم اِیتسَه دَه کتابِ خیالی وَرَق وَرَق
عِشقوندَه ثابتَم نَقَدَر جاندا وار رَمَق
باخما یاراشمارام سَنه اَی فَخرِ ماخَلق
سَن گُولدَن آیریلان دَگُلم خاریُوام سَنُون
بیر نُوکَرم سَنه دِیمُورَم کامَه یِتمَرَم
اِیتسَن قَبُول حَسرتِ فِردوس اِیتمَرَم
بُو آستانَه دَن مَنی قُوسان دا گّتمَرَم
نَه عِزّ و جاه طالَب دِیداریُوام سَنُون
بُو آستانَه وَه اؤزومی سالمُوشام غَرض
بیر گَنج دور قاپُون مَنه نَه جُوهَر و عَرض
عالَم لَریلَه نُوکَر آدین اِیتمَرَم عَوض
گُورسَم بُویُورمُوسان شَهِ اَبراریُوام سَنُون
کُور اوُلماز هر گُوزی که سَنه اَشگ ریز اوُلا
نُوکَر اوُلان سَنه اِیکی دُنیا عَزیز اوُلار
اوُلّام سَنَه غُلام آنام دا کَنیز اوُلار
فَخر اِیلرَم کی خادِمِ دَرباریُوام سَنُون
عاشق گَرک دی مَطلَبین آلسُون حَبَیب دَن
عِشقُون مَنی سالوب اِیلَه تاب و شَکیب دَن
اِیستَر مَریض دَردی نَه دَرمان طَبیب دَن
اِیله دَوا بُو دَردیمَه بیماریُوام سَنُون
بازارِ یُوسفَه گَلن اوُلدی کلافیلَن
طِی اِیتمَرَم وَفا یُولونی مَن خِلافیلَن
بازارِ عِشقَه گَلمیشَم حَسرت قیافیلَن
بو نَقد جان اَلیم دَه خَریداریُوام سَنُون
گیورّم بُو چُولدَه دُشمَنُوی دَستَه دَستَه مَن
آیا اوُلار گُورَم سَنی گُور دِل شِکستَه مَن
وِیر بیر اِجازَه پَرچَم آچُوم باشُون اوُسته مَن
غَمگین گُورنمَرَم سَنی غَمخواریُوام سَنُون
مُولا مَنیم اَلیمدَه بُو شَمشیر اوُلا اوُلا
عَطشان قالا سُوسُوز بالالار گُل کیمی سُولا
عَبّاس ئولوب مَگر غَمیلَه خاطرُون دُولا
آگاهی سَن کی غَم دَه هم اَسراریُوام سَنُون
گُورّم مُدام شُعلَه لَنُور نارِ جَنگی مَن
بَس نیلِورم بُو زندگیّ عار و نَنگی مَن
وِیرسَن اِجازه گر پُوزارام فُوج و هَنگی مَن
ورّام عَلَم فَراته عَلمداریُوام سَنُون
من #اعظمی قاپُوندا نه مُدّت دی که وارام
قُوسان منی گِیدوم هایانا وار مَگر هارام
گر قاره دور یُوزوم وار اوُرکدَه وَلی یارام
لُطف اِیلَه رُو سیاه عَزاداریُوام سَنُون
- یکشنبه
- 15
- مرداد
- 1402
- ساعت
- 13:51
- نوشته شده توسط
- یوسف اکبری
ارسال دیدگاه