بیر بُقعه که مَعاینه جَنّت صَفاسی وار
جَنّت صَفاسی رُوضهِ رِضوان نَماسی وار
رِضوان نَما دِیدیم هانی رِضواندا بو نَما
رِضوانین هاردا بیر بیلَه عالی صَفاسی وار
باشدان باشا صَفادی وِیرور هر دِلَه صَفا
رَشگِ بِهشتِ عَدندی اوُزگه هَواسی وار
بیر گُل وار اوُردا گُلشنِ رِضوانَه ناز اِیدَر
آدی رضادی عَطرِ گُلِ مُصطفاسی وار
باب الحَوائج اوُغلی اوُزی بُوالجَواد دور
زَوّاره چوخدی بَخششی از بَس سَخاسی وار
هر دردَمند سالسا اوُزون آستانینَه
چون و چَراسی یُوخدی بُو یِردَه دَواسی وار
هر بیر مَریض اگر اوُزینه اِیستَه سشَه شَفا
گَلسُون بو آستانه که دار الشفاسی وار
سائل بو آستاندان اَلى بُوش قِیتمِیُوب
مُطلق غنیدی بُو قاپونین هر گِداسی وار
چوخدور قاپُوسی هر قاپودان مین گِدا گلَه
راضی سالار یُولا که صِفاتِ خداسی وار
مَشعوف اوُلار دوتُولمُوش اوُرکلَر تاپار صَفا
جان بَخش بُقعه سی حَرمِ دِلگُشاسی وار
حَلالِ مُشکل اوُغلیدی هر مُشگلین آچار
اِی مُشگلَه دوشن یَدِ مُشگل گُشاسی وار
قُربان اوُلوم او مَدفنَه که صدرِ سینه دَه
راضی هامی قَضایَه اِمامِ رِضا سی وار
عِلّت او گُلدی خَلقتِ خُلدِ بَرین اِیچون
خَندان دوشوبدی رُوضهء نِکهَت فَزَاسی وار
مین لَرلَه عَندلیب اوُزاق یُوللاری گلوب
هر فَرد فَردینین بُوگُله خوش نَواسی وار
بو آستان دور رَضوی مَدفنَ الرِضا
نُورِ مُحمّدیلَه دولوب حَق ضیاسی وار
تُوحید کلمه سیندَه اوُزی شَرط دور بلی
اوُز قُولونا اَلیمدَه قَلَم اِتکاسی وار (1)
بیر شُور وار او بُقعه دَه وَصفَه گلَن دَگُل
نَه عَرض اِیدوم نَه شُور و نَه غُوغا اَساسی وار
بَعضی اِیدر زیارت اوُزه گُوز یاشی تُوکر
بَعضی اَلى سَمادَه دِلیندَه دُعاسی وار
هر کس اُمیدیلَه اوُرا سالسا اوُزین دَخیل
مأیُوس اوُلماز اوُردا اُمید و رَجاسی وار
هر بیر یارالی سینیَه مَرهم دی رَأفتی
گرچه رَؤف دور اوُزی دِلدَه یاراسی وار
جَدّی حسین هر شَبِ جُمعه قوناقی دور
اَرضِ شَریفِ طوُسدَه کَرب و بَلاسی وار
گَلدی حسین و کَرب و بَلا صُحبتی دِلَه
دولدی گُوزوم سِرشگیلَه حالِ بُکاسی وار
#تائب امامِ ثامنه یالوار سَن آل بَرات
گِیت کربلایَه گُور نِجه عالی صَفاسی وار
هم قَتلگَدَه واردی حُسینُون سزیلتی سی
هم تَلِ زِینَبیه دَه زِینب صَداسی وار
{1}کلمة لااله الا الله حُصنی فَمن دُخلِ حُصنی امن من عذابی بِشرطها و شُروطها و اَنا مِن شُروطها
- یکشنبه
- 15
- مرداد
- 1402
- ساعت
- 14:20
- نوشته شده توسط
- یوسف اکبری
- شاعر:
-
صادق تائب
ارسال دیدگاه