یا حسین گلدی محــرم
شیعه لر نوایه گلدی
گئیدی عاشیقلر قاراسین
ماتمه عزایه گلدی
گؤزلریمیز دولا دولا
گودموشوخ محرم اولا
ذکر ائدیب آدینی مؤلا
اؤرکلر صفایه گلدی
ائشیدیب حالی پریشان
دردیدن اورگی شان شان
دردینه آلماقا درمان
قاپیوا دوایه گلدی
ذلیل ائیتدی اهل کفری
زینبین بو آیدا صبری
پرچمین آقا بیر عمری
باشیمیزا سایه گلدی
آغلاتدی بوتون شیعه نی
بو آیین غـم و محنی
ظلمیـله عـدو علنـی
قصد ائدیب جفایه گلدی
عالم لر قربان حسینه
مظلوم ائتدی اهل کینه
آللاها قـرآنه دیـنه
باخمادی دعوایه گلدی
شهید ائتدیلر اکبری
دؤغرادیلار اول پیکری
اوندان بتر وای خبری
حضرت لیلایه گلدی
دشمنین باخ گؤر جفاسین
قان ائتدی قاسم حناسین
ناله سی تازه عروسین
ارضیدن سمایه گلدی
حرمـلـه دوتدو نشـانه
اصغری بؤیادی قـانه
سپـدی مـؤلا آسمانه
اول قانی نوایه گلدی
گؤزلری قانیله دؤلو
کسیلدی علمدار قولو
داده آناسی بتولو
سسلدی هرایه گلدی
دئدی گل اؤغول سینه مه
تانیتما بو دردی منه
هر نه دردلر گلسه سنه
ائله بیل زهرایه گلدی
داش آتان _ نئیزه_اوخ آتان
ائتدیلر حسینی القان
یئرده گؤیده قؤپدو طوفان
زینب آه و وایه گلدی
قان گیدیب بدن اسنده
قالمادی طاقت حسینده
شمر دون باشین کسنده
دیلده مـین کینایه گلدی
جامه سین تندن سویدولار
نعشینی عریان قؤیدولار
سانما غارتدن دؤیدولار
کربلا بلایه گلدی
بو ظلمدن سورا داهی
چؤخالیب زینبین آهی
هر نه وار ، ستم ، الهی
زینب کبرایه گلدی
کوفیان بی مروّت
ائتدیلر چوخلو جسارت
کربلاده هر نه ذلّت
فرزند طاهایه گلدی
هر ایلی محرم اولو
آغلاریخ اؤرگی دؤلو
یا حسین دئییب دی (نالان)
درگه مولایه گلدی
- یکشنبه
- 15
- مرداد
- 1402
- ساعت
- 15:1
- نوشته شده توسط
- یوسف اکبری
ارسال دیدگاه