یؤخ دیلین سؤزون دییه سن باری قیل اشاره اصغر
ولی سو آدی گتیرمه وورما اوت بو زاره اصغر
بیلمیرم کی نه ائشیدیب اؤت یاغیر زمین و افلاک
گورورم سوسوزلوقوندان بند اولوب گوزونده ده اشک
سینه مین سوتی قورویوب قورویان دوداقلارین تک
آنان اؤلسون آی بالا یؤخ بو الیمده چاره اصغر
شرمیدن سؤلموش سارالمیش بو یوزومه باخما بئله
بو سیخیلمیش اؤرگیمی بسدی داها سیخما بئله
سوزدوروب گؤزون علی جان گل ائویمی ییخما بئله
رحم قیل منی بیر عمری سالما آهیزاره اصغر
دئمه بیلمیرم نولوبدور قانیرام حالین گؤزوندن
یانیرام کباب اولورام اؤرگینده کی سؤزوندن
اؤپورم من هئی سارالمیش گول تکین سؤلان یوزوندن
یئنه آرام اولموسان سن یانیرام دوباره اصغر
هر آنا سئوه ر بالاسین دانیشیب گوله علی جان
آرزیلار سینمده قالدی گلمه دین دیله علی جان
هر نه قدر منی ائدیرسن باغری قان ائله علی جان
ال ایاغ چالیب سوسوزدان وورما منه یاره اصغر
یئری وار غمینده بیر یؤل قارا باغلایام اؤلونجه
حسرتینده آه چکیب هئی سینه داغلایام اؤلونجه
داد و شیوه نه گلم من گره ک آغلایام اؤلونجه
بختیمین گولی ازلدن توش اولوبدو خواره اصغر
هیچ کسین بالاسی اؤسته گؤیلره آهی چیخماسین
من کیمین یانیخلی اشگی گول عذارینه آخماسین
هیچ کسین امید ائوینی چاره سیز دردلر ییخماسین
بیرجه دردیمی یئتیردی بلکه ده هزاره اصغر
آی دردی چؤخ درمانی یؤخ جان بالام لایلای بالام لای
آی قؤیان ربابی آغلار جان وئره ن سوسوز بالام وای
هر یئرده دردی اولان وار چاره سیز قالان منه تای
سنی سسله یه ر گؤرنده هر یاندا گهواره اصغر
سسله ییر سنی بو (نالان) یا باب الحوائیج اصغر
همدمین آتان حسیندور بیرده کی شهزاده اکبر
عباسین آدی اولوبدور شیعه لر دیلینده ازبر
دعوت ائیله کربلایه شش گوشه مزاره اصغر
- یکشنبه
- 15
- مرداد
- 1402
- ساعت
- 15:3
- نوشته شده توسط
- یوسف اکبری
ارسال دیدگاه