برج هدایتین ایشیق مشعلی
محضر پیغمبره گلدی علی
امیرالمؤمنین ، میداندا صفدر
آدی علـی اولان عالمه سرور
معرفت ایله اَئیله ییب بیر سلام
وئردی گؤزل علیک ، خیرالانام
باخدی گولر اوزیله بیر حیدره
اذن وئردی اگلشه تا کی یئره
بویوروب دور رحمه للعالمین
عرض حالین دئه منه دوتما چتین
عرض ائدیب مؤلا علی ، پیغمبره
گلمیشم زهرادن اؤتری بو دره
ائتدی فرمایش کی یؤخ سؤزوم علی
راضی یم من گر دییه زهرا بلی
گلدی حضورینه زهرانون ، نبی
تا ائلیکی بیر بیره دئیدی لبی
آنلاییب بیلدی ندور امر رسول
آتا قلبین تئز اله گتدی بطول
ودیعه ی پیمبر امیندی
سیِّده النِّساء العالمیندی
گؤیول وئردی مؤلای بی نظیره
شخصیّت مراسمِ غدیره
وئردی خبر پیمبر ، ای مرتضا
اولما ، غمین ، فاطمه اولدو رضا
شکر ائدیب دی آللاها بو مطلبه
قسمتیم اولدو اؤل علیا مرتبه
مدینه ده تاپدی بو سؤز چؤخ رواج
فاطمه ائیلور علی له ازدواج
گون اؤ گوندور فاطمه اولدو عروس
حوریلرده بو عروسه پای بوس
فاطمه ، نه فاطمه ، نور فلک
افتخار ائیلور اونا حور و ملک
اؤل فاطمه کی قرآندا کوثردی
جزا گونی شفیعه ی محشردی
آغلاتدی نیسگیل لری پیغمبری
کی حیف اولسون یؤخ زهرانین مادری
بوندان بئله غصّه ائدر مرضیّه
یؤخ آنا حاضر ائده جـهـیـزیـه
ناقه اوستونده عروس دوشدو یؤلا
دؤلو گؤزلر ایله باخیب ساغ ، سؤلا
گؤردو یؤخ نه آناسی نه قارداشی
آخدی مروارید تک یوزه گؤز یاشی
نئجه کی غریبانه عروس گئتدی
قبرینه ده آدامسیز مایوس گئتدی
آخار یوزه بو (نالانین) گؤز یاشی
یانمازدی قاپیسی اولسئیدی قارداشی
- یکشنبه
- 15
- مرداد
- 1402
- ساعت
- 15:23
- نوشته شده توسط
- یوسف اکبری
ارسال دیدگاه