سبک : مولا مولا عجل علی ظهورک
گل آدی امید وئرن هر ایکی دونیا بشره
دؤندرَن ظلمت گئجه نی ایشیقلی بیر سحره
سن سن ای زهرا بالاسی دیللرده آدی ازبر
العجل دییَر هامی هر جمعه سسلر دیده تر
گل آنان فاطمه نین گیزلین قبریندن وئر خبر
ای اولان آگاه بوتون گیزلین گیزلین هر اسراره
هارداسان یابن الحسن گل عشقیوین بیماری یَم
قیل نظر عشقینده من مجنون کیمین آوارییَم
سنسیز ای مولا اینان بیچاره دن بیچارییَم
کسمه زره لطفیوی رحم ائت منِ بی قراره
میوه باغ نبی ، ای جان حیدر ، گل آقا
هر گوزل گولدن عطیرلی ای گلِ تر ، گل آقا
حضرت فاطمیه ، ای در و گوهر ، گل آقا
عشقیوی ، ده ییشمروخ دونیا دولو سیم و زره
عمروموز چاتدی باشا چوخ گوزلدیق سن گلمدون
حسرتینده بو آخان گوز یاشیمیزی سیلمدون
غملر ایله معنوس اولدون آغلادین هیچ گولمدون
گوزلریم قربان آقا اُول دیده زار و تره
ذکر ائدیب تعجیلیوی سسلرم امداده سنی
گوز تیکرم یولووا هر جمعه بلکه هر گونی
سیدی بو قاپیدان آیری یئره قؤوما منی
آند وئررم عمه وه اُول زینبِ غم پروره
آغلارام جدیوه هر یاندا گؤرم قاره اَلَم
قیل عنایت سنی زهرا یوزیوی گؤرم اؤلم
قات حسینون آدینا مهدی نون آدون ای قلم
صاحبِِ زمان اؤزو بهاء وئره بو اثره
گلسه حسین آدی هر یئرده اورا صفا تاپار
جان دییَر افلاکیان یئرده گؤیده محشر قؤپار
ائدیب ازبر اؤ آدی قبریوه بیر توشه آپار
چون حسین عاشقلری فرصتی وئرمز هدره
بیر قطره گوزوم یاشی آخسا حسین نواسینا
ده یر عالمده یعقین بو عمرومون هامی سینا
یوزومه یوز باغلاییب گلدیم حسین قاپی سینا
تاپار عزت ای قلم ، کیم گله گوردوم بو دره
یاز کی چوخ داریخمیشام قان آغلاییر بو گوزلریم
نئینه ییم چؤخدور دییَم اؤره کده گیزلین سؤزلریم
یوللارین دیزی دیزی گزه م یؤرولماز دیزلریم
گویلومه یامان دوشوب کرب و بلا بیردن بیره
اسدیقجا قرمز اَلَم هر ایکی گنبد ده هر آن
عاشقین مجنون ائده ر دیلدن آلار تاب و توان
سِرشکِ اشکین گره ک یوزونده ائیله سین روان
ایسلسه گؤیلو کیمین گئده بو آغیر سفره
گئنه آزدیر جانیوه جانلاریمیز قربان دئسم
یاس دوتوب هئی زاریییب فراقیندا غصه یئسم
سن الی بوش ائتمز سن ، هر کس سنی وئرسه قسم
پهلوسی شکستییه ، سینه سی یاره مادره
اول خانیم دریای عصمت ، گوهر گنج حیا
آدی ، یادی ، ذکری هر قلبه وئرن داییم جلا
بو جَمعه بیر نظر ائت وئر بیر برات کربلا
آند وئرروخ سنی اُول ، آنان زهرای اطهره
خوش حالینا کیم بئله کربلاده ماتم قورا
یاحسین مظلوم دئییب شاخسی وورا ، سینه وورا
دویماروخ اصلا آقا یوز دفعه ده گئتساخ اورا
مین یؤلدا خیمه گاهی ائتساخ زیارت یکسره
بین الحرمین اؤزی آیری بیر عالمدیر آقا
هیچ یاندا گؤرسنمیوب اوردا اولان ذوق و صفا
هیچ بیلمز اورا گئدن ، گئتسین سولا یادا ساغا
ایندی بیلدیم کی ندن قالمیشدی زینب آواره
سیرفی جانین وئرر گوهر و الماس عشقینه
بیز ولی جان وئرروخ عطر گل یاس عشقینه
نهر علقمده آلاخ دستماز عباس عشقینه
اَبَداً اونون یئرین یوز انهار رضوان وئره
یاددان چیخماز محنتی او صحرای نینوانون
نقش اولوب دیلده آقا یاراسی مین جور جفانون
قلم اولوب قوللاری اوردا اباالفضل آقانون
ائیله سین حقین ادا ، کیم کف العباسی گؤره
قؤخماسین هر کس اولا ، قلبی غمه دولان دئسین
الی هر یاندان اوزولوب موشکولده قالان دئسین
اوردا دعاء ردده گئتمز ، حاجتی اولان دئسین
علی نین رشید اوغلی اباالفضلُ الْعلمداره
اوردا وار چوخ آناسین نالان قویوب صبرین آلان
بالا وای ناله سینه اسیر ائدیب درده سالان
یئری وار قان آغلیاخ پایین پاده دفن اولان
دوغرانان قطعه قطعه گول جسمی یاره اکبره
نئینه دی سوز عطش صحبتی قوی قالسین هله
یانسین اوچ شعبه اوخی آیری بیر اؤت سالدی دیله
ائیلدی باغرینی قان اوردا حسینون حرمله
عباسی ییخان اؤخی ووردو خیردا سوت امره
آدینا فخر ائیله سین کون و مکان عالم گره ک
چیرپینیر هئی یا حسین آدی گلن زمان اؤره ک
ببرده گر قسمت اولا شش گوشه اؤ قبرین گؤره ک
سؤزوموز چوخدور دیاخ واللاهی بالای سره
سوروشاروخ اصغری سینه سینه نئجه آلیب
ندی سیرری اکبری پایین پایینده قالیب
ربابین هم لیلانین اوخشاماسین یاده سالیب
دییَروخ لایلای دؤیونجا اکبره هم اصغره
سسلروخ شاه و گدا ، ای شاه عالم السلام
ائیلروخ آه و نوا ای شاه عالم السلام
دییَروخ جانلار فدا ای شاه عالم السلام
ایسله تا وار عمروموز مولا گلاخ بو محضره
- یکشنبه
- 15
- مرداد
- 1402
- ساعت
- 15:26
- نوشته شده توسط
- یوسف اکبری
ارسال دیدگاه