گلمیشم دفن ایتماقا بو جسمِ عریانون بابا
جَمعینه حیرتدیم نعشِ پریشانون بابا
جلوهٔ عشقونده اولموش بو بیابان طورِ حق
لمعه لمعه اوج ایدر عرشه بو یردن نورِ حق
کلمه ی ارنی دیلیمده منده باشدا شورِ حق
اولموشام موسی کیمی بو چولده حیرانون بابا
کیم سنون تک ایلدی اوز ایتدوقی عهده وفا
ویردی اوز قانیله دین گلزارینه آبِ بقا
ایلدون سن کربلا صحراسینی کوهِ منا
ویردی یتمیش بیر نفر جان تشنه قربانون بابا
محضرونده دوتدیلار مردانه الده نقدِ جان
ایتدیلر جانانیله بیع و شرا پیر و جوان
ویردیلر بیر امتحان حیرتده قالدی قدسیان
انتهایه یتدی تقدیراتِ پیمانون بابا
یخدیلار آتدان یارالی پیکرون عدوان یره
چشمه چشمه قانین ویردی تازه جان یره
آیه به آیه یازیلدی قانیله قرآن یره
حقّون ایتدی اثبات آخدوقجه قیزیل قانون بابا
تشنه لب کسدی قفادن باشیوی شمرِ دنی
صرصرِ ظلمیله سولدی آلِ طاها گلشنی
حالِ مظلومیّتون آغلاتدی یکسر دشمنی
اولمادی هرگز مراعات، عزّ و شانون بابا
پیکرونده بغضیله آت گزدیروب قومِ جهول
بو بیابانِ بلاده وار نقدری عرض و طول
ایلدی پاشیده جسمون گُل کیمی سُمّ خیول
نعشی بو حاله دوشوب هانسی مسلمانون بابا
بیر ایله حاله سالوب نعشون شقی دشمنلرون
یغماقا حیرتدیم یردن داغلمیش پیکرون
چون قالوب بیر سمتیده هر عضوی جسمِ اطهرون
آغلار ایلر ناله بلبل تک بو نالانون بابا
شرعِ پیغمبرده بو واجبدور ای شاهِ زمن
هر مسلمان نعشینه اولسون گرک غسل و کفن
اوزگه چارم یوخدی مجبورم بو چولده ایندی من
چولقیام کهنه حصیره جسمِ عریانون بابا
بیر به بیر مدفون اولوندی جمله یار و یاورون
ایستورم دفن ایلیم پایینِ پاده اکبرون
خوشدی یاتسون سینن اوسته شیرخواره اصغرون
سندن آیریلماز بو آرامِ دل و جانون بابا
سو کنارینده دوشوب عبّاس تک بیر سرو ناز
بو منای عشقیده تاپموش گوزل بیر امتیاز
پیکری اوخدان آچوبدور بال و پر چون شاهباز
باغری قان ایتدی سقّای لب عطشانون بابا
دوغرانوب باشدان باشا جسمی دَمِ شمشیریلن
خانه ی زنبور اولوب هر قطعه قطعه عضوی تیریلن
دفن ایدم مجبورم ایندی نعشینی تدبیریلن
حشره تک اولّام بو غمده دیده گریانون بابا
ماسوا آغلار محنتینده، یانار بی اختیار
یر گوگ ایلر ناله هر لحظه نه تک «صحاف» زار
مطلقا عقباده ایلر نارِ دوزخدن کنار
دوتسا هر کیم صدقیله دنیاده دامانون بابا
- دوشنبه
- 16
- مرداد
- 1402
- ساعت
- 23:1
- نوشته شده توسط
- یوسف اکبری
- شاعر:
-
مرحوم صحاف تبریزی
ارسال دیدگاه