اوزون بولورسن آنا ، مال و مُلکدن دورم
منی بغشله گلن خدمتونده معذورم
تالانمیشام خجلم ، یوخ بیر آیری پای انداز
اگر قبول ایده سن بیر بو باشه مقدورم
گلوب صفا گتوروب چوخ مُشرّف ایلموسن
بو لطف و مرحمتوندن زیاده مسرورم
صفای خاطر ایچون گلموسن عدو ایوینه
عیان اولور نقدر خدمتونده منظورم
عجب مقامیده سروقتیمه یتشدون آنا
یوزوم کول اوسته ، بو مطبخ سراده مستورم
گوروم بو خولی بیدین یتمشسون کامه
منی عیالیمه حسرت قویوبدی ، مهجورم
اگر چه باشیمی کرب و بلاده شمر کسوب
ولی سِنانِ سَنانیله نحری منحورم
تنور ایچینده یریم خوشدی راحتم بو گجه
گونوز او قدر منه ظلم ایدوبله رنجورم
صباح ابنِ زیادین جفاسی ختم اولسا
گیدینجه شامه طرف ، نیزلرده مشهورم
اوز اختیاریمیله گیتمرم کلیسایه
نِدیم که دشمنِ بی رحم الینده مجبورم
مخالف امرینه ترک حجاز ایدوب ، رهِ راست
عراق دشتینه گلدیم که بیله پرشورم
آچلدی زنگ شتر ، دوشدی نینواده قطار
او گونکی گوندن حصارِ غم ایچره محصورم
گون ایسّیسینده سوسوز گر چه سو دیوب یاندیم
دیمم او سوز و گدازیله نشئه دن دورم
یزید مجلسینه مست اولوب گیدن چوخدور
مِی محبّتیله منده مست و مخمورم
گرک گیدم یولومی مجلس اهلی گوزلمسون
دالیمجه نامهء دعوت یازوبلا محضورم
گر چه ( آصفم ) ای کربلا سلیمانی
الیمده پای ملخ درگهونده بیر مورم
عنایت ایله منی ایتمه لطفدن مأیوس
یوزوم قرا ، الی بوش ، یول اوزاق ، اوزوم کورم
- دوشنبه
- 16
- مرداد
- 1402
- ساعت
- 23:16
- نوشته شده توسط
- یوسف اکبری
- شاعر:
-
مرحوم آصف تبریزی
ارسال دیدگاه