پریشان حال اولان ، حالین بیان ایلر پریشانه
پریشان حال ، حال اهلین آرار آخر ، نه بیگانه
طبیبِ عشقه تفسیر ایلدیم اوز حالِ زاریمدن
علاج ، دردیمه یازدی فقط بیر لفظِ دیوانه
بشر صِنفین آیردی اوز ایلیندن خانمانیندن
قضا ویرانه ده مسکن ویروب ارواحِ انسانه
ئولن هر قدر اولسا ، خوش عمل گیتسه بو دنیادن
گینه چوخ مستحقدور خانهء مدفنده احسانه
قویوبدور بو قراری حضرتِ پیغمبرِ اکرم
نمازِ وحشت آلسونلار ئولن گون هر مسلمانه
یغالّا بیر یره اهل و عیالین ، قوم و قارداشین
گلوللّر تسلیت ویرماقلیقا شامِ غریبانه
ندن کرب و بلاده اولمادی بو قاعده جاری؟
پوزولدی خانمانلار ، هم تالاندی یاندی کاشانه
ویروبله اهلِ بیته پاره پاره خیمده منزل
اوشاقلار آج سوسوز یورقون ، گلوبلر نی تک افغانه
هره بیر گوشه ده ، باش غم دیزینده فکره پیچیده
آخوب گوز یاشلاری یر اوزره بنزر آبِ نیسانه
کشیکچی عصمتِ کبری' قیزی بی خانمان زینب
کیمه دردین دیسون کیم تسلیت ویرسون او نالانه؟
ئولنلر فکرین ایتسون؟ یا قالانلار دردینه یتسون؟
و یا ایتسون تحمّل جور و ظلمِ آلِ سفیانه
گجه بیر وقت گچدی گوردی زینب بیر بالا یوخدی
سراسیمه چخوبدور خیمه دن یوز قویدی میدانه
گیدردی گه دیردی هارداسان عمَّن سنه قربان
سسیمه ویرمَسَن سس ، ایلرم دنیانی ویرانه
سنی آخر وداعینده بابان چوخ تاپشوروب گیتدی
هنوز اوّل گجه ، سن هاراداسان؟ ای نازلی دُردانه
نه گوردی سس گلور آهسته عمّه بوردیَم گَل گور
بابامون مصرعینده ایتموشم برپا عزاخانه
بابامی عمّه چوخ ایستدی گوگلوم ، دوروب گلدیم
یتشدیم بو دلِ شبده حضورِ شاهِ عطشانه
گزوب میدانی بی پروا ، چوخ آختاردوم بابام نعشین
بو یردن گلدی سس آختارما گَل ای شمعه پروانه
گَل اگلش بیر زمان منله اولاخ همدرد و هم ناله
نجه گور ایتمیشم چیده بیر اوضاعِ مُلوکانه
چراغیم شعلهء آهیمدی ، فرشیم قانلی توپراقدور
یارالی سینه جُزوَم ، آغلارام بو روحِ قرآنه
عزاخانه بساطی جمع اولوب ، اوخشا حزین آغلا
توکوب گوز یاشی عمرینجه بیله بیر بزمِ جانانه
حسینین بو قیزیندان (روفه گر) محکم یاپوش چوخ ، آل -
ازل دنیا مالی نقدا" ، دالینجا ایسته ماهانه.
- دوشنبه
- 16
- مرداد
- 1402
- ساعت
- 23:54
- نوشته شده توسط
- یوسف اکبری
- شاعر:
-
مرحوم روفه گر
ارسال دیدگاه