نه وصل یاره دوزوم وار نه فرقته طاقت
همی وصالی همی هجری اختیار آپارور
دوشورخیالیمه اوضاع روز عاشورا
قرار وصبریمی الدن نقدر وار آپارور
ویروب اجازه علی اکبره امام حسین
سالوب قباقینه ، محبوبه بیر نثار اپارور
بویوردی گیت حرم اهلین اوغول وداع ایله
سوسوز آنا یانینا چشم اشکبار آپارور
اوشاهزاده گلوب خیمه لر کنارینده
سسین اوجاتدی اوسس لیلیدن قرار آپارور
دیدی گلون گیدوری اکبری حلال ایلیون
دورانمورام منی شوق وصال یار آپارور
توکولدولر حرم اهلی اوشاق بیوک یکسر
گوروب اوحالی قرار دل نگار آپارور
آلوبلار دوره سینی هاله تک اوماه وشون
تمام فیض تماشالی یادگار آپارور
ویروبله سس سسه سسلردیلر علی اکبر
بوکار زاره سنی هانسی انتظار آپارور
بو غربتیمیزه رحم ایله گیتمه میدانه
قالان تحمل اوصبری بوکار زار آپارور
بیری دیور آناوین حالینه ترحم ایله
که روح لیلینی بوتیره روزگار آپارور
باجی چکور اتگیندن دیور نجه گیدوسن
باحال مهر ومحبتدن اعتبار آپارور
کناریدن ایله پر عاطفه باخوردی حسین
قراراکبری گوردی او وضع کار آپارور
بویوردی اکبریمی بوشلیون کباب اولدی
جواندی صبرینی آلام بی شمار آپارور
دیمه فقط اوزی اکبر تک ایریلوب گیتدی
ایدوب کمک لری ویران وتار ومار آپارور
حسین قبرینه ای (صافی) منده مشتاقم
میسر اولموی نیلوم چوخ انتظار آپارور
- سه شنبه
- 17
- مرداد
- 1402
- ساعت
- 0:8
- نوشته شده توسط
- یوسف اکبری
ارسال دیدگاه