گَل باجی رزمگاهدن عطرِ جنان گتورموشم
قرمزی گُلدی بیر عبا شبنمی قان گتورموشم
گر چه خزان ایدوبدولر اکبریمون بهارینی
لیک معطّر ایلیوب فاطمه لاله زارینی
گُل کیمی یاره لر آلوب بلبلون اختیارینی
آغلاماقون بهاریدور عمری خزان گتورموشم
هانسی چمنده گور باجی بیله گُلون نشانی وار
هانسی گلون بو عطری وار ، من کیمی باغبانی وار
بیله گُلون سکینه تک بلبلِ خوش زبانی وار
وای علی وای او بلبله وِردِ زبان گتورموشم
بسکه بو ماهرو جوان لایقِ بزمِ یاریدی
سلسلهء رسالته مایهء افتخاریدی
محضرِ یاره گیتماقا شوقیله بیقراریدی
نائلِ وصلِ یار ، بیر تازه جوان گتورموشم
ایسته سه بیرده خاطرون ، گورماقا مه جمالینی
گوز یاشویله سیل ازل یوزده کی خونِ آلینی
گور نفسی گلور اگر ایله سؤال حالینی
یا کسیلوب نفس ویروب شوقیله جان گتورموشم
ماهِ سپهرِ عزّته قرمزی قان سالوب شفق
بسکه ووروبلا اوخ قلج جسمده قالمیوب رمق
مصحفِ ناطق اوغلونی تیر یازوب ورق ورق
تیغ چکوبدی خط ، قویوب نقطه سِنان گتورموشم
باشدا آتام علی کیمی باجی قلج یاراسی وار
بیله که قان آخور یوزه صورتِ مرتضاسی وار
مه یوزونی گورن دییر معجزِ مصطفاسی وار
قدرتِ مصطفا وئرور باشدا نشان ، گتورموشم
جان ویروب اکبریم منیم ، کامِ دلیم گلوب اله
رسمدی نوجوان غمی باجی شرر سالور دله
ایله خبر عزاسینه لیلی بینوا گَله
چون اونا مایهء غم و آه و فغان گتورموشم
بسلمیوبدی بیر آنا بیله مَلک جمال اوغول
لیلیه مژده ویر ، قضا امرینه اولماسون ملول
تشنه قتیلِ حقدی بو ، یار اوزی ایلیوب قبول
اولدی قبول تحفه سی ، مژده عیان گتورموشم
قرمزی قان جوانیمه بسترِ خوابِ ناز اولوب
شادم اوزوم که لیلینون سینه سی پُر گداز اولوب
فاطمه محضرینده بو بارده ده سرفراز اولوب
حاصلِ زحمتین اونا عزّت و شان گتورموشم
قانه باتان جنازه سین چولقامیشام عبایه من
خیمیه بیر عبا گلوب ، منظرِ گلشنِ عَدَن
پیکری تازه گل آچوب ، خوش بزنوب بو گل بدن
یاره لرین هله اولور قانی روان گتورموشم
الدن آلوب قراریمی اکیریمون بو حالتی
باشدان ایاقه دوغرانوب تیغیله سرو قامتی
قان یوزینی دوتوبدی ، وار مَه ده کَدَر علامتی
شمس و نجومدن ایدوب سلبِ توان گتورموشم
واردی بو آستانه ده جملهء شهلرون گوزی
شاهِ جهانه عرض ایدر هر کسون اولسا هر سوزی
(اشگی) سنون سوزون دگل بو سوزی شه دیوب اوزی
گَل باجی رزمگاهدن عطرِ جنان گتورموشم
- سه شنبه
- 17
- مرداد
- 1402
- ساعت
- 0:16
- نوشته شده توسط
- یوسف اکبری
- شاعر:
-
حاج مجید اشکی تبریزی
ارسال دیدگاه