کرب و بلادن عرشه یئتوب الاَمان سَسی
تسخیر ایدوب فضاسینی آه و فغان سَسی
شور نشور اولوبدی او صحراده برملا
اوج ایلیور سمٓایه شه انس و جان سَسی
قیها چَکور او چولده قیامت کاانهُ
عرش خدانی تیتردیری همچنان سَسی
معناده سَس ویرور اوجالان سَسلره رسول
سَسلر آرا گلور بیر اورک یاندیران سَسی
جنتده فاطمه دئیَسَن شیونه گَلوب
آرام آلور او درگهی اوتدا یانان سَسی
اوزگه بیر حاله زینب بی خانمان قالوب
آفاقه اود سالوبدی او بی خانمان سَسی
هِی سٓسلَنور حسینیم هایاندا یخیلمیسان
صبرین آلور حسینون هرآن صبر آلان سَسی
بیر لَحنیله نوایه گلور که حُسینینون
اَلدن گیدور قراری،، گَلنده هاچان سَسی
سعی ایلیور که زینبینه سَس ویره حسین
آغزیندا دل دولانموری چیخسین باتان سَسی
قالموب رَمق او یاره لی جسمینده گوئیا
داغلی اورکده حَبس اولونوب مهربان سَسی
نیم خیز اولوب سوروندی بیر آز خیمیه طرف
بولمَم سبب نه اولدی اوجالدی بیرآن سَسی
قان لجه سینده سَسلدی چوخ گلمه شیونه
زینب او گیر و داریده آلدی همان سَسی
اَل باشدا گئتدی ناله کنان مقتله طرف
قاچدی یخیلدی تا تاپا دل داغلیان سَسی
نچٓه قدم قالوردی هله قتلگاهینه
گوردی دوباره گَلمور امام زمان سَسی
بیر ضجٓه چَکدی یئتدی شتابیله مقتله
اشراری سالدی حیرته اول قهرمان سَسی
ناگه نه گوردی سینه سینی شمر آغیرلادوب
بنده دوشوب دوباره او جان جهان سَسی
سَسلور که شرم قیل بیله بیر ظلمی ایلمه
گویدن گلور ائشیتمیسن آیا فغان سَسی
مقتلده دیل دئیور گَله تا رحمه شمر دون
گویا یئتیشموری اونا بو باغری قان سَسی
گلدی غرض وجوده چوخور یرده کشمکش
مقتلدن اوج ایدوب گویه شمر و سنان سَسی
ظلمون غرض که ایلدی تحمیل شمر دون
ایتدی احاطه عالمی کروبیان سَسی
زینب دئمه دایاندی عدو ایلدی جفا
دوغراندی اَل، اوجالدی گویه جانستان سَسی
یوز دوتدی یصربه دیدی امداده گل آنا
یئتدی او لحظه سمعینه شاه جهان سسی
سَسلندی گئت خیامه باجی، خیمه گاهیدن...
هر دم گَلور بالالاریمون دلستان سَسی
یغمایه اَل اچوبدی بو صحراده شامیان
عرشه یئتوب بالالارمون الامان سَسی
جَفٓ القلم بو یرده نیاز اولدی ای عتیق
وقت نماز صبحیدی گلدی اذان سسی
- سه شنبه
- 17
- مرداد
- 1402
- ساعت
- 1:18
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه