کفن گییدی ایلیه دینه جان فدا علی اکبر
آلوب سبقت ال هاشمدن - باوفا على اكبر
جنگه اولدی آماده - قهرمان آزاده
عترت رسول الله - گلدی آه و فریاده
گل زهرا مظهر طاها - نور دیده ی لیلا
گئدور رزمه فی سبیل الله - عهده ایلسون ایفا
اوغول آردیجا اوخور قرآن - حجت حق يكتا
ملکلرده عرشیده سسلور - مرحبا علی اکبر
خانم قزلار خیمه دن چیخدی – تا هامی وداع ائتسون
ولی اکبر چوخ شتاب ايلور - تئز مرادينه يتسون
امام امر ائتدی گئچور وقتی - دینمیون قویون گئتسون
گئدور مهمان جدینه شبه - مصطفی علی اکبر
کمربندین باغلادی محکم – کربلا کفن پوشی
گئدور عطشان با تماقا قانه – وحدتین قدح نوشی
سالور دلدن هر نگاهیلن - عاشقان مدهوشی
اولوبدی اللهه دلداده - دلر با علی اکبر
سلام اولسون اهل تقوادن - اول جوان والايه
اولوب الگو عزم و آهنگی - پیروان تقوایه
آتاسی سسلور بویون قربان - گئت حضور زهرایه
بهشت زهرایه مهماندی - باصفا على اكبر
اگر لیلا کربلا دیدی - حتماً آه و وادَيدى
اوغول میدانه گئدن وقته - بیر گوزی آنادیدی
بیر اوچ یاشدا نازنین طفلين - اللرى دعاديدى
رقیه آهیله سسلوردی - دور اخا علی اکبر
غرض گئتدی حامی قرآن - رزمگاهه مردانه
دوروب تل اوسته حسین باخدی - اول معین قرآنه
دئدی الله شاهد اول اوغلوم - آز قالور باتا قانه
قبول ایله اولدی عشقونله - آشنا علی اکبر
جهاد ائتدی یا علی دلده - دلربای آل الله
آخوب قانی گورسنوب گوزده جلوه ی جلال الله
او حالدا وجه اللهه باخدی - مظهر جمال الله
یارا باشدا حیدره ائتدی - اقتدا علی اکبر
- چهارشنبه
- 18
- مرداد
- 1402
- ساعت
- 0:54
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه