مشکلده قالسا هر کیم دنیاده یا ابوالفضل
سسلر سنی اورکدن امداده یا ابوالفضل
ای صاحب عطوفت سن معدن وفاسن
دریای لطف واحسان الحق گره گشا سن
امراض دردمنده درمان ایدن آقاسن
سن صاحب سخاسن سن منبع اعطاسن
گلمز داخی نظیرون ایجاده یاابوالفضل
ای یادگار حیدر ای مظهر شجاعت
میدان جنگ ایچینده ای شیر باصلابت
اللهه عبد صالح ای عاشق عبادت
درگاهیوه دخیلوخ ایله بیزه عنایت
چشم امیدیمیز وار مولاده یا ابوالفضل
آثار بندگی چون واضحدی صورتوندن
لرزاندی کوه محکم آثار حیبتیندن
حیراندی فکر انسان ایثارو همتیندن
نهر فراتی آلدون روشندی غیرتیندن
سو ایشمدین او اعظم دریاده یاابوالفضل
گر کاتبان عالم تاپسا بئله لیاقت
اوصافیوی شب وروز ایتسه اولار کتابت
امکانی یوخدی تاپسون وصفین سنون نهایت
اولسون کرامتیندن بوبیر خبر اشارت
ای آدی درد لوحیم معناده یا ابوالفضل
آغلار گوزوم قان آغلار عباس نامداره
سو ایلسون تدارک عزم ایتدی کارزاره
جام الده خردا قیزلار گلمیشدی آه وزاره
سالمشدی اوت سوسوز لوخ هر قلب داغداره
بعضی دوشوبدی حال اغماده یاابوالفضل
تنگ اولموشویدی حیف دنیا که اول جنابه
آغلاردی حال زاری اولاد بو ترابه
درمان تاپانمیوردی درد دل ربابه
اصغر سوسوزلوقونان دوشموشدی پیچ وتابه
اطفال بی گناهی گوردی دم خطرده
فکره دوشوب او سرور چاره تاپا بودرده
کتوینه سالدی مشگی عزم ایلدی نبرده
آت رزمگاهه سالدی کیم گوردی رهگذرده
عرض ایتدی یوخدی مثلون دعواده یا ابوالفضل
- چهارشنبه
- 18
- مرداد
- 1402
- ساعت
- 1:18
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه