قدم گوتور آهسته دلربا گوزلیم
یاواش یری بویوا گوزلریم فدا گوزلیم
تلسمه اولمگه آهسته قوی رکابه قدم
تنوره سالمیا تا قلبیمه شراره غم
حیا اجازه که ویرمور اوغول دالونجا گلم
دایان گوزوندن اوپوم نازلی باوفا گوزلیم
اوقاره گوزلرون قیل نظاره دایه سینه
قولاق ویر عاشق دلخستوون گلایه سینه
کیمین گیدوم سخلوم سنسیز ایندی سایه سینه
اوغولسوزام کیم ایدر قرب و اعتنا گوزلیم
آلوب الیمدن اوغول فرصت و مجالی قاشون
دولاندیروب منی آردونجا ماه و سالی قاشون
سالوب کمنده بیله قلبیمی هلالی قاشون
چتین بو دام ولادن اولام رها گوزلیم
سالوبدی لیلینی عشقون بو غم فزا دمنه
نجه یکه بلبلی گل جذبه سب چکر چمنه
آنالیق عالمی دلبسته ام ئوزومده سنه
نجه فراقه دوزر عشقه مبتلا گوزلیم
من عاشقم سنه سن عاشق خداسن اوغول
آتان حسین کیمی عشاقه پیشواسن اوغول
محبت عالمی لیلایه مقتداسن اوغول
ایدر دالوندا سنون لیلی اقتدا گوزلیم
دل حزینیم اولوب بی قرار زلفوندن
هوسلیم که اوپم مشکبار زلفوندن
بهانه الده دوتام بیرجه تار زلفون من
اوتار زلفون اولا قلبیمه قوا گوزلیم
بهشتی گللرون عطرین ویرر او گل بدنون
هزار یوسفه قیمتدی گیدیگون کفنون
دوای درد زلیخا یاتوب مژونده سنون
مریض حساب ایله ویر دردیمه دوا گوزلیم
اگر چه وصلون اولوبدور قضاله فرض محال
دایان گوزوندن اوپوم اجرتینده جانیمی آل
ویا صود حقی حساب ایت قولوی بوینما سال
قاپوندا فرض ایله یا لیلینی گدا گوزلیم
گلش یوزونله اوغول بیرده گل منیم یوزومه
آنالیق حقینه قیل اعتنا اورک سوزومه
ایاقیوی یره قویما قوی آغلیان گوزومه
گوزوم ایاقیون آتدا تاپار ضیاء گوزلیم
گیدنی یولدان ایدر جذبه نظاره لرون
اسیر ایدر گوزوه صف چکن سواره لرون
گوز آلتی باخما اورک یاندیرار اشاره لرون
باخاندا گوز گوزه باخ ویر منه صفا گوزلیم
آلوبدی طاقتیمی عاشقانه تاب و تبون
مین ایل گچوب منه اون سگیزایلده روزو شبون
خمار ایدوب اله بو لیلینی او لعل لبون
اولوب ایشیق گونوزوم ظلمت الدجا گوزلیم
دایان که گوز دولسیجا باخوم رسا بویوا
سفر دعاسی یازوب باغلاسون بی بون بویوا
سویوخدی اسکیمی منده سپوم گیدن یولوا
دوتوم دالونجا اورک آیناسین یولا گوزلیم
سولوب سارالدی علی گلستاندا لاله چیچک
یازیقام ایتدی منی دربدر جفای فلک
نجه سالوم باشیما من بو چولده قاره لچک
اوغول آناسی سالار طویدا گور قرا گوزلیم؟
او سرو قامتون اکبر عجب قیامت ایدر
صبا قرالتوی دمبدم زیارت ایدر
آچوق دیوم سوزی لیلا باخوب حسادت ایدر
ندن مقدم اولوب لیلیه صبا گوزلیم
اوغول بویوتدوم هوسله هزار غصه یدیم
طویوی ایلریلن دیلده آرزو ایلدیم
نه آرزومه یتیشدیم نه بیر اتاق بزدیم
چاغورمادیم الیمی قونشونی طویا گوزلیم
آخر گیدیشدی علی چک گلن رقیه نازین
ربابی سسله خبر بیل اورکده سوزو سازین
قوجاقه آل اوغول اوپ اصغرون بوغازون
چوخ آغلیوب ملیوب بلکه رام اولا گوزلیم
- چهارشنبه
- 18
- مرداد
- 1402
- ساعت
- 14:50
- نوشته شده توسط
- یوسف اکبری
ارسال دیدگاه