زینب گلور اما باشینا قاره سالوبدی
زینب گلور اما اورگین غملر الوبدی
زینب گلور اما ائله بیل چوخ قوجالوبدی
هر دم وئرور اللهی قسم صبر حسینه
جان چیخمیا سالم یتیشه قبر حسینه
*
زینب گلور اما هله بیر کلمه دانیشمور
قارداشسیز اونا دنیا بهشت اولسا یاپیشمور
مدتدی کوسوب نهر فراتیله باریشمور
حسرتله سووا خیره لنور نیمه نگاهی
سسلور انامون اوغلی سوسوز ئولدی الهی
*
زینب گلور اما اوجالور ناله دلیندن
زینب گلور اما یاپشوب فضه الیندن
مشکل قدم اتسین الینی چکسه بئلیندن
الله بو خانم هر یره گئتدی گئجه گئتدی
تندیس حیا شمریله شامه نجه گئتدی
*
زینب گلور اما ائله بیل چوخ سوزی واردی
زهرا قیزیدی قبر حسینده گوزی واردی
هر یرده که زینب اولا زهرا اوزی واردی
سسلور الیمی دوت انا دل درده گلوبدی
قبری منه گورست گوزیمه پرده گلوبدی
*
زینب گلور اما او یانان دلده شرر وار
قلبینده حسینه دئمه لی خاطره لر وار
قیمتلی نچه بوخچادا سوغات سفر وار
سوغاتی باسوب سینیه جان تک گتوروبدی
بی غسل و کفن یوسفه،کوینک گتوروبدی
*
زینب گلور اشگی توکولور گوز بولاقیندان
گلدیقجا ورور بوسه ملکلر ایاقیندان
افسوس رقیه سسی گلمور قوجاقیندان
اغلور دیور ایوای عجب زنده دی زینب
قارداشدان ابوالفضل کیمی شرمنده دی زینب
*
زینب گلور اما دولانوب قلبی کبابه
اصغر غمی قویمور باخا بیر موجیلی ابه
در دین دیه بیلسه چاتاجاق نوبه ربابه
یا فاطمه قلبینده ربابین سوزی چوخدی
ایستور چکه نازین دیه لای لای بالا یوخدی
- چهارشنبه
- 18
- مرداد
- 1402
- ساعت
- 23:55
- نوشته شده توسط
- یوسف اکبری
ارسال دیدگاه