رُقیّه نُون چُون اوُلوب خوابگاهی تِیرَه تیراب
بُو دِللّریله نَوا باشلِیُوب آناسی رُباب
دُور اِی خَرابَه نی آباد اِیدَن صَفاسی قیزیم
دُور اِی آز عُمرِیلَه چُوخ غَم لَر آشناسی قیزیم
دُور اِی جَمالی مَنیم چَرخِ عُمرُومُون ماهی
غُروبَه چَکدی نَه تِیز دُشمَنُون جَفاسی قیزیم
سَن آغلیاندا گِیجَه سَس وِیرَم سَنُون سَسوَه
مَگر قُویاردی مَنی دُشمَنُون هَراسی قیزیم
بیزی یَزید اِیلیُوب ظاهراً خَرابَه نِشین
وَلیک بُولمَه دِی وار حَقُون اِعتِلاسی قیزیم
غَرِیب شَهردَه دَفن اوُلماقُون چَتِندی وَلی
بُو خِیردا قَبر اوُلاجاق بیر وَفا بِناسی قیزیم
بیزَه بُو شام دَه شام اَهلی خارِجی دِیدِی لَر
خَطای مَحض دِی بُو قُومُون اِدِعاسی قیزیم
وَلیک قَلبی مِیزَه بیر اوُخ اوُلدی طَعنَه لَری
نَه اِلتیامی او زَخمِین نَه وار شَفاسی قیزیم
بُو نِسگِلُون آناوِی جان وِیرُون جَه یاندُوراجاق
مَریضی دُون یُوخُودِی دَردِوِین دَواسی قیزیم
اَیاقلارین یارالِیدی باخاردِیم آغلاردِیم
گَلَردِی سُوزِشَه اوُز سینَه مِین یاراسی قیزیم
غَمُون عَجَب اِله بیر رِشتَه وِیردی ماتَم دَن
مُحَبَتُون بُودی عالَم دَه اِقتِضاسی قیزیم
سَنی خِیالَه سالُوب آغلارام غَریب آقاما
حُسینمُون هَلَه خوار اوُلماسین عَزاسی قیزیم
مَن آغلارام خانم عَمّندَه سَس وِیرَر سَسی مَه
حَرم لَرُون اوُجالار عَرشَه آه و واسی قیزیم
دُولار خَرابَه بُوتُون داد و آه و شِیوَنی لَه
بُو اَهلِ بِیتُون اوُلار شام کَربَلاسی قیزیم
بُو داغدیدِه لَر آغلاللّار اوُز اُلنلَری نَه
بُو شَهرِی دُولدُورار آلِ اللّهین نَواسی قیزیم
اِیدَر اَثَر خانمیم زِینَبُون نمازِ شَبی
اِجابَتَه یِتُوشَر یا سَحر دُعاسی قیزیم
اِسارَتِین قیرِیلار رِشتَه سی عَدالتی لَه
جَفا و ظُلمین اوُلار حَدَّ اِنتهاسی قیزیم
بُو قِیدِدَن بیزی آزاد اِیدَر سپاهِ یَزید
خَرابَه دَه قُورُولار بیر عَزا اَساسی قیزیم
جِنایَتِین آچیلار پَردَه سی اوُلار رُوشَن
یَزیدَه تَنگ اوُلی بُو عالَمِین فَضاسی قیزیم
بیزی مَدِینِیَه گُوندَر ماقا اوُلار مَجبُور
نَهایَتَه یِتُوشَر شامین اِبتلاسی قیزیم
شَهیدَه اوُلماقُوا مَن دَه راضیم اَمّا
مَنیم رِضایَتِمِین یُوخدی حَق رِضاسی قیزیم
دِیردِیم اِی هامی ماُیُوس و نا اُمیدَه اُمید
زِهی شَرف که اوُلُوب دِینِ حَق فَداسی قیزیم
مَنه گُونُوزلَری دَه تیره شام اِیدُوب گِجَه تَک
زِ بَس که پَردَه لَنُوب آهِی مُون لَواسی قیزیم
زَمانَه کاخِ جَفای یَزیدی مَحو اِیلَر
بُو تُوزلی قَبرِین اوُلار گُنبدِ طلاسی قیزیم
جَهاندا هِیچ کِیمِی دَفن اِیتمِیُوب لَه مَسجِددَه
بُو اِمتیاز سَنُون دُور گُوزُوم ضِیاسی قیزیم
غَم اِیتمَه آز صُورا مَحکُوم اوُلار فَنایَه یَزید
مَحال دُور که اوُلا ظالِمِین بَقاسی قیزیم
بُو شِعرَه بیر آقامُون نُوکَری اوُلوب بانی
رَوای حاجَتَه وار دِل دَه اِلتِماسی قیزیم
بیری اوُخور تُوکَر اَشگین بیری یازُار آغلار
دُوتار سَنَه اِیکی خِدمَتگُزار یاسی قیزیم
او پاک و گَرم نَفَس دَن آلوب دِی #خوندل دَم
یازُوب دِی خامهء نا چِیز و نارَساسی قیزیم
رَسا کَلامِیلَه #خوندل خِطاب اِیدُوب دِی خانم
که حَق وِوُران آغاجُون چِخمِیُوب صَداسی قیزیم
- سه شنبه
- 7
- شهریور
- 1402
- ساعت
- 23:47
- نوشته شده توسط
- یوسف اکبری
- شاعر:
-
حاج حیدر خوندل
ارسال دیدگاه