دور اِیله چاره یا اَخا اَماندی خیمه لَر یانار
اگر چه دوتمُری دِیلیم گرک دِیم نلَر یانار
سخوبدی مَنجَنیقِ غم سلیلِ آلِ اَحمدی
آلوب آرایه کُفر اُودی سُلالهء مُحمّدی
قالوب اُود اِیچره مَظهر جَمالِ پاکِ سَرمَدی
گُوروبدی آتَشِ بَلا بو حالی سَس چَکر یانار
وَرق وَرق داغیتدیلار رِسالهء رِسالَتی
درست مُحکم اِیتدیلَر قَواعدی ظَلالتی
پَریدَه رَنگیمون منیم بُو حاله وار دَلالتی
او دور دَلیل گُوزلَریم تُوکر سِرشگِ تَر یانار
اگر چه کُوی صَبردَه تیکُوبدی بارگَه باجون
وَلی اُورکدَن اُود دوتوب یاناندا خیمه گَه باجون
گَهی سَنون حَرملَرون وُوروب ییخالا گَه باجون
بیری بیریندَن اَهلِ بیت اُولوبلا بی خَبر یانار
دوشندَه شاهزاده لَر بو شِش درِ مُصیبته
سَواره لَر پیاده لَر یُریش گَوتوردی غارته
رُخِ سَریه زَرد اُولوب عَروسی سالدی حِیرته
مآلِ کاری دَمبدَم سکینه فکر اِیدر یانار
یانوب بُو چُولدَه ظلم اُودی آلیشدی جِسم و جانی میز
کسیلدی چاره یُولاری اُوجالدی اَلَامانی میز
پُوزولدی خانمانی میز داغیلدی آشیانی میز
گُوروب بو حالی مُرغِ دل توکُوبدی بال و پَر یانار
بوگُون من اُوز خیالیمی حسین باشیمدان آتمیشام
تُوکُوب عُذاره خونِ دل گُوزوم یاشینه قاتمیشام
عَلیل و خَسته اُوغلووی اُودا گَیروب چیخاتمُوشام
اُونون بُو حالی قَلبیمه چوخ اِیلیوب اَثر یانار
قوشُون توکُولدی خیمیه حَرم تالاندی هارداسان
هامی بَساطِ سَلطنت تالاندی یاندی هارداسان
صدای وا مُحمّدا گُوگَه دایاندی هارداسان
دوشوبدی رَعشه جانیمه گُوگُل تاپوپ کَدر یانار
یَتیم اُوشاقلارین یِرین سالوبلا آت قَباقینه
بیری اَیاقیالین قاچوب باتوبدی خار اَیاقینه
بیری نَجَف یُولون دوتوب گِیدر کُمک سُراغینه
بیری دوشوبدی نِطقدَن بیری بابا دِیر یانار
دوشوب اُویاندا مُحترم حَرملَر اِیندی وَحشته
بویاندا خیردا قیزلارُون باتوب غُبارِ ذلّته
بیرینی ساکت اِیتمه میش بیرین سالولّا زَحمته
اِیدیم نه چاره نِیلیُوم که گُوز گُورر جِگر یانار
زِ بَس بُو های و هُوئی لَر سالوب قَراریدَن مَنی
دِیر یَقین جُنون اُولوب گُورَن کَناریدَن مَنی
دایانما گَل کَناره چَک بُو گیر و داریدَن مَنی
کنارِ خیمه گاهی گُور باجون نِجه گَزر یانار
ستم کِشیده گُوگُلیمی بَلایه مایِل اِیتمیشم
بو صَفحهء وجُودیدَن آدیمی زایِل اِیتمیشم
ووراندا قَمچی هر کَسه قولومی حایِل اِیتمیشم
خَدنگِ ظلمه زینبون عَجب اُولوب سِپر یانار
نه آه و ناله کم اُولور نه سُوزِ سینه اَل چَکُور
نه بیر زَمان سیزیلتیدان گُوزون سکینه اَل چَکور
نه درد و غُصّه قُورتولور نه اَهلِ کینه اَل چَکور
خلاصه آلِ مُصطفی بو گُوندَه سَر به سَر یانار
اگر چه #هندیا سَنون باشوندا چوخدی مَشغلَه
بیر اُوزگه جِلوه اِیلیوب بو خَلقه اَصلِ مَسئله
ثَبوتِ عشقدَن اُوتور گُوتورمَه سَن قَلم اَله
کلامه وِرمه طول چوخ زَمانه مُختصر یانار
- چهارشنبه
- 8
- شهریور
- 1402
- ساعت
- 0:0
- نوشته شده توسط
- یوسف اکبری
- شاعر:
-
مرحوم هندی تبریزی
ارسال دیدگاه