دل شب ده گئدیسن هانچی دیاره آنا جان
یوزی نیلی قولی سینمیش سینه یاره آنا جان
گئتمه بیر لحظه دایان بیرده دولانیم باشیوا
رحم ائله زینب مظلومه و زاره آنا جان
آنا سندن سورا کیم زولفومه شانه ویراجاخ
آنا سیز لیخ غمی بو زینبیوی یاندیراجاخ
قلبیمین آینه سین سنگ جفا سیندیراجاخ
معجریم تک ائدجاخ بختیمی قاره آنا جان
سینه می چولقییب اندوه و غم و درد و محن
بالان اولسون سنه چوخ تئز دی یاراشماز بو کفن
نه اولوب کوچه ده پژمرده دی احوال حسن
دئمیری اولدی قباله نجه پاره آنا جان
آنا قوربانین اولوم یاندی قاپین اولدی نلر
دورد یتیمه بالان آهو کیمی گوز یاشین الر
ایستی مسمار یری سینه ی زهرادی مگر
بو غم اکبادیمی توش ائیلدی ناره آنا جان
آیریلیخ قلبیمین آرامینی مهمان آپاریر
ائیلیوب زینبیوین باغری نی القان آپاریر
آنا تابوتوی چون بوذر و سلمان آپاریر
تاپشیرا نیمه شب هانچی مزاره آنا جان
لوح قلبیمده سراسر اثر غم چکرم
در و دیواریمیزا پرچم ماتم چکرم
ناگران اولما حسین نازینی هردم چکرم
قویمارام بولبولوی توش اولا خاره آنا جان
گلمیشم نی کیمی من آه و نوایه آنا جان
سنده بیر گون یتیش امداد و هرایه آنا جان
یولوی سال طرف کرب و بلایه آنا جان
اوندا قیل زینب مظلومیه چاره آنا جان
کربلاده بالاوین جاه و جلالی تالانار
ییغیشار سینه سینه درد ؛ غم اوستَن قالانار
موقع غارت اولار خیمه لری اوتدا یانار
دولانار گوندوزی چون لیله ی تاره آنا جان
آنا جنت دن او گون یاره لی فریادیمه گل
موج ائدن وقت ده بلا لر دل ناشادیمه گل
گلممیش قاتل او گوداله اوزون دادیمه گل
قویما اوغلون بَلَشه گرد و غباره آنا جان
زینبین کوفه لی لر دردینی چوخلال لار آنا
میهمان دعوت ائدیب ؛ حالینی یوخلال لار آنا
سو کنارین ده علی اصغری اوخلال لار آنا
حلقینین قانی آخار سولموش عذاره آنا جان
آغلارام وای دییرم من / یانیب ای وای دییرم من / سنه لای لای دییرم من
جان یارالی جان یارالی//جان یارالی جان یارالی
- یکشنبه
- 19
- شهریور
- 1402
- ساعت
- 21:54
- نوشته شده توسط
- یوسف اکبری
ارسال دیدگاه