اسیر شمر کافرم ایدوم نه چاره من حسین
یارالی پیکرون سنون قویوبلا بی کفن حسین
سالوبلا قتلگاهدن بو قصدیله گذاریمی
که آرتورام جنازه وی گورنده آه و زاریمی
رجال کوفه حیف اولا آلوب منیم کناریمی
دویونجا سس چکنمورم جنازه ن اوسته من حسین
اسیر و دستگیرم ای باشندا تاجی زینبین
قویوبلا بی کفن سنی ندور علاجی زینبین
که بیرجه قاره معجره وار احتیاجی زینبین
قالوب نه تازه مقنعه نه معجر کهن حسین
او بلبلم چتین بئله صفالی گلستان تاپوم
سپاه شام و کوفه دن محالدور امان تاپوم
گزوب یارالی نعشوه که بلکه سایبان تاپوم
نه واردی دفن وکفن ایدن نه بیرجه دفن ایدن حسین
بو گوندی یا که آی سالور گونه شعاعیله شفق
و یا کلام حقّدور دوشوب یره ورق ورق
وصال بزمی دور مگر قویوبلا گل طبق طبق
نه بیله گلستان اولور نه بیله بیرچمن حسین
سالوبلا هانسی بیر شهین جنازه سین بو حالته
تعجبم بو فرقهء لَئامِدَه رَذالَتَه
گرانبها لباسلر دوتوم گیدوبدی غارته
نولوبدی مندن آلدیقون او کهنه پیرهن حسین
او کهنه کوینگون سنه گوروبله یوخ لیاقتی
گرکدی سرخ رنگ اولا لباس شاه زینتی
اودور ایدوب گروه کین بیله بیوک جسارتی
دوشوب بو حاله سرّی وار بو نازنین بدن حسین
عبث دگل که تربتون اولوبدی عالمه شفا
بو دورت آغاج کویر چول تاپوب چمن کیمی صفا
دوتوم که ایتمیوب حیا امیر لشکر جفا
سُم سمند اشقیا اوتانمیوب ندن حسین
سالوبدی آتش ستم شراره قلب زینبه
یوخوندی ال دیم که قوی دوباره قلب زینبه
کسیک بیلک لرونله قیل اشاره قلب زینبه
که بلکه خاطریم تاپا تسلّی تازه دن حسین
فلک ایدوب مساعدت قَویدی خصم پنجه سی
بلالی خسته جانیمی ایدوبدی قمچی رنجه سی
یتیم دارلیق غمی اسیرلیق شکنجه سی
آلوب قوای جسمیمی سالوبدی حسّدن حسین
دوشوبدی نطقدن داخی بو صبره منتخب باجون
یانان چادردا چوخ چکوب شکنجه و تعب باجون
گئچن گئجه نه حالیله قیلوب نماز شب باجون
گواه دی او حاله بیر خدای ذوالمنن حسین
ازلده هر بلایه من سنیله شرکت ایتمیشم
اودور هامی مصیبت و بلایه طاقت ایتمیشم
یانان دا خیمه لر ایله بیر عالی همّت ایتمیشم
سُووب او امتحانیمی امام ممتحن حسین
وفای عهدیمی هامی جهانه ثابت ایلدیم
قوای نطقی شکوه دن کلامه صامت ایلدیم
دله دوتوب بالالارون تمام ساکت ایلدیم
یانان چادردا ایلدیم غریبه انجمن حسین
اگر چه بو کئچن گئجه یاتانمادی قزون رباب
چخوب یانان خیامدن کناره دلده اضطراب
گزردی قان دولان چولی آدون دلینده دلکباب
محبّتیله سسلدون او نازنینی سن حسین
دؤشندی سینَن اوُسته تا عَزیزَه دُخترون سَنُون
اؤزین یتوردی هولیله شریک غملرون سنون
بالاوی تاپماقا ایکی بلالی خواهرون سنون
ایله ایتوردی اوزلرین که یوخ اونی بیلن حسین
اگر چه #شأنی آشنا اولوب هامی قواعده
تسلط فنوندن ده ولیک وار نه فایده
حسین قبول ایتمسه نه سجع و وزن و قاعده
حسین توجه ایلسه یازار گوزل سخن حسین
- شنبه
- 22
- مهر
- 1402
- ساعت
- 20:16
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه