او دَردمَند که وار اِحتِیاجی دَرمانَه
گرک عَریضَه یازا اَشگیلَه خُراسانَه
گلَر گُوزُوم یاشی مُوجَه بِسانِ اُقیانُوس
دُوشَندَه یادِیمَه هَر دَم غَرِیبِ خِطّهء طُوس
او گیون که تیرِ جَفائیلَه دِل دَن اوُخلان دِی
وِئرُوبلَه زَهرِ جَفا قَلبِ زاری اوُدلان دِی
دِیَنمِرَم او غَریبَه نَه ظُلم اِئدُوب مأمُون
اِمامی اِیلَدِی مَسمُوم او مُرتَدِ و مَلعُون
رَوایَت اِیلُور اَباصَلت او پُر اَسف حالی
دِیَر نَه گُوردُوم اِمامِین پُوزُولدِی اَحوالی
چِیخاندا مَجلسِ مأمُونی دَن اِمامِ زَمان
عَبانی باشینَه چَکمِیشدِی گُوزدَه اشگِ رَوان
اَلی اوُرکدَه گِئدَردِی وَلی چُوخ آهِستَه
گه اَگلشَردِی دُوراردِی گهی اَیاق اوُستَه
اَسردِی بَرگ خَزان تَک وِجودِ زِیباسی
یِرِیماقا یُوخُودِی طاقَت و تَواناسی
گلُوب او حالِیلَه تا داخل اوُلدی مَنزِلی نَه
اوُرَک داش اوُلسا اِمامِین یانار بُو نِسگِلی نَه
دِئدِی کَنار اِئله فَرشی وِجُودِیم اوُدلاندی
اَماندِی طَشت اِئله حاضِر جِگرلَریم یاندی
گُوتُور بُو فَرشی اَباصَلت اِیلمَه اَفغان
گرک اِمامِ زَمان تُپراق اوُسته وِئرسُون جان
دِئدِیم او سَروَرَه قُربان اوُلوم جَلالتی وَه
اوُلُور بُو گُون گَلَن اوُلسُون سَنُون عِیادَتی وَه
دِئدِی بُو شَهری دَه یُوخ بیر کَسِیم غَریبَم مَن
کِیمِیم گلَر یانیما، خارو بی نَصیبَم مَن
نَه قارداشیم نَه باجیم وار یانیمدا آغلیالار
ئولَندَه حَسرَتِیله گُوزلَریمی باغلیالار
یِتُوبدی باشَه اَجَل حالِیمی اوُزُوم بُیلورَم
گُوزُوم قالوب قاپُودا گلمَدِی جَواد ئولُورَم
سُودان کَنارَه دُوشَن بیر بالِیق کِیمی شَهِ دِین
دُونَردی ساق صُولا هَر دَم اوُوُش دِیرُوب اوُرَه گِین
قُویاردِی تُوپراقا بَطنِین چَکردِی دِل دَن آه
دِیَردِی تِئز یِتِیر اوُغلوم جَوادِی یا الله
دُعا اِجابَتَه یِتدِی مَرامی حاصل اوُلُوب
جَوان اوُغول قاپُودان شِیوَنِیلَه داخِل اوُلُوب
آتا بالاسینی گُورجَک اِیکی قُولُون آچِدی
اوُلوب لا هَر اِیکیِسی قُول بُویُون قُوجاق لاشدِی
دِئدِی ندَن بِئله گُل تَک سارالمُوسان بابا جان
دِئدِی اوُغول ئولُورَم اِئت طَلاوَتِ قرآن
دِئدِی نَه قاندی دُوداقوندا اِی شَهِ مَظلُوم
دِئدِی دُونُوب اوُرَه گِیم قانَه اوُلمُوشام مَسمُوم
بُو حالِیلَه واریدِیم اِیندی اِشتِیاقُوندَه
یُوزُیوِی قُوی یُوزِی مَه یانمِیشام فَراقُونده
عَجَب آتا گه اِئدِیر ضَعف گه گلُور هُوشَه
جَوان اوُغول آتا باشین آلُوب دِی آغُوشَه
گهِی قُویُور یُوزِی نَه حَسرَتیِلَه لَبلَرِینی
گهی سِیلُور اَدَبِیلَه جَمالِینُون تَرِینی
گِینَه بَلالی گُوگُل کَربَلادَن آیرِیلماز
گلُور نَوایَه قَلم ،نِِی، نَوادَن آیرِیلماز
اِئمَه هَر بِیری ئوز حال اّحتِضارِین دَه
گُوزُین آچاندا جَوانین گُورُوب کَنارِین دَه
زَمانَه اِئتدِی حُسینی بُو فِیضی دَن مَحرُوم
چَتِین نِشان وِئرَه دُنیا حُسین کِیمی مَظلُوم
وئرَندَه جان یارالی قان اِیچِیندَه ذِلّتیلَن
دِیَردِی اوُز اوُزی نَه چُوخ مَلال و حَسرَتِیلَن
اِلهی یُوخدی پَناهِیم غَرِیب و بی یارَم
عَزیزِ فاطِمَه یَم گر چِه اِیندِی چُوخ زارَم
او دَم دَه حِس اِئلَدِی سِینَه چُوخ آغِیرلاشدِی
اِمام زَحمَتِیلَن قانلی گُوزلَرِین آچدی
گُورُوب تاپُوبلا اَل اَسرارِ حَقّ خَزِینَه سِینَه
چِیخُوب جَفائیلَه قاتِل یارالی سیِنَه سِینَه
جَفا اوُخیلا دِئدی قَلبِ عالَمی اوُیما
تَرَحِم اِیت یارالی سِینَمَه اَیاق قُویما
دِئدِی گرَک دِلِ پِیغَمبَرِی کَباب اِئلیَم
بُو آغ مَحاسِینُوی قانِیلَه خَضاب اِئلیَم
دِئدِی رُقَیّه مَن ئولسَم یَتیم اوُلار ظالِم
قالار بُو دَشتی دَه اَشرار اِیچِیندَه اَطفالِیم
دِئدی رُقیّه وِی سَندَن صُورا اَسِیر اِئدَرَم
حَیالی قِیزلاریوِی خَوار و دَستگِیر اِئدَرَم
دِئدِی کَسُورَسَن اَگر باشِیمی چُوخ اِینجِیت مَه
لباسِیمی بَدَنِیم دَن داخی کَنار اِئتمَه
دِئدِی کَسَم باشُیوِی خُوشدِی یِدّی ضَربَتِیلَه
قُویام جَنازَه وِی عُریان یارالی ذِلّتِیلَه
دِئدِی مَن ئولسَم اَگر اِئتمَه زِینَبَه آزار
حَیالی دور باش آچُوق اِئتمَه داخلِ بازار
دِئدِی او قَدر وِیرُوم قَمچِی زِینَبِین باشی نا
جگر قانی قارِیشا حَسرَتِیلَه گُوز یاشی نا
گرک بُو ظُلمیلَه دُنیادَه اِشتِهار اِئلِیَم
#کریمی_نی بُو مُصِیبَت دَه اَشکبار اِئلیَم
- شنبه
- 22
- مهر
- 1402
- ساعت
- 21:24
- نوشته شده توسط
- یوسف اکبری
ارسال دیدگاه