اۇممید-وْ-سقـای-ی-حَـرم، ابـالفضـل
یـاتمــا اوْیـان یـاتـدێ علــم، ابـالفضـل
آرخام ائلیم، سێندێ بئلیم بـۇ چؤلـده
قالـدێـم آدامسێـز نئیلــه‌ره‌م ابالفضـل
   

آلدێم سسون گلدیم هـرایـه قـارداش
گؤردۆم دۆشۆب باشۇن بلایه قارداش
تاپدێم کسیک قوْللارێوێ یوْل اۆستـه
یانـدێ دیلیـم گلـدیم نـوایـه قـارداش

یوْخ سن کیمی مرد-ی-وفا ائلیمده
نار-ی-غمون شُعله چکه‌ر دیلیمده
سن تئشنه لب آلقانۇوا باتێبسان
من قالمێشام یالقۇز الیم بئلیمده

نـه غـۆصصـه‌لـی نـه غملیـدی منظرون
اوْخ نئیزه‌ده‌ن شان-شان اوْلۇب پئیکرون
دۆشۆبسن شیر-ی-نر کیمی کمنده
خنجر-ی-ظۆلمه تۇش اوْلۇب اللرون

درک ائتمه‌ییب حقّی عدو سؤزۆنده‌ن
شرم ائتمه‌ییب نه خالِق نه اؤزۆنده‌ن
دینـاره ایمـانیـن سـاتـان تـرســولــر
سۇ اۆستۆنده اوْخ وۇرۇب ساغ گؤزۆنده‌ن

فلک سنین چاره‌وی الده‌ن آلدێ
آئیینه‌ی-ی-عؤمریوی داشه چالدێ
مشگیوه اوْخ دگیب سۇیۇن جالاندێ
تئشنه قێزلار گؤزۆ یوْللاردا قالدێ

دۇر ای منیم کان-ی-وفا قارداشێم
قان اوْلۇبدۇ مُحنتونده گؤزیاشێم
سنین اگر یوْخ قوْللارۇن پئکرده
منیمده قالماز پئکریمده باشێم

عیان اوْلۇب باشۇن اۆسته محشریم
قۇربان قوْلسۇز پئکریوه گؤزلریم
دۇر عزم ائده‌ک خئیمه‌لره اۇتانما
گهواره ده دیلده‌ن دۆشۆب اصغریم

شاعر:سیّد تقی سیفی اردبیلی