اشعار ویژه حضرت مسلم (ع)

اِی دِل بُو فانی عالَمین اوُیما هَواسینَه
باخما جَلال و جاهِینَه عالی بِناسینَه

بِئل باغلاما بُو حِشمَتِ دُنیایَه فانی دور
هِیچ کِیمسَه نی یِتُورمِیُوب اوُز مُدّعاسینَه

وار شاهِدِیم بُو عَرضیمَه باخ اَهلِ کُوفیَه
دارِ بَقانی ساتدِیلا فانَی بَهاسینَه

کُوفَه غَریبی مُسلم اِیچون بِیعَت اِئتدیلَر
گُوستَردیلَر مُحبّت اوُنُون اِبتداسینَه

اَفسُوس او قَدری گِیچمدی بی شَرم کُوفیان
سِیندیردِیلار او بِیعتی دُنیا هَواسینَه

تُولاندیلار رِیاستَه عُقبانی آتدیلار
اَشرارِ کُوفَه نُون گَلَه لَعنَت وَفاسینَه

هَم عَهدیلَر تَمام باشیندان داغیلدیلار
باخ اَهلِ کُوفَه نُون سِتَمِ نارَواسینَه

قالدی وَحید کُوچَه دَه بیر کیمسَه اوُلمِیُوب
وِیرسُون اِیویندَه یِر اوُنا الله رِضاسینَه

گُلدی دایاندی کُوچه دَه دِیوارَه مُضطَرب
یُوز وِیردی اوُزگَه حال او غَم مُبتلاسینَه

بیر طُوعُه نام عُورت اوُنُون حالینی گُورُوب
مَبهُوت اوُلوبدی اوُل شَهِ دِین ماجَراسینَه

سُو اِیستیُوب گِیدوب گَتُورُوب اِیچدی گِئتمَدی
اَگلشدی غَم غُباری دِلِ با صَفاسینَه

آوارَه قالدی هاردا گِئدوب مَنزل اِیلَسُون
اوُدلاندی دِلدَن اَهلِ جَفانین جَفاسینَه

طُوعَه دِئدی سَبَب نَدی آیا دایانمُوسان
گِیت قال اِئویندَه دُوشمَه بُو شَهرین بَلاسینَه

فَرمایِش اِئتدی بُوردا مَنیم یُوخدی بیر یِریم
بیجا بُو نُوع باتمامُوشام غَم لِباسینَه

عَرض اِئتدی یُوخسا نایِبِ شاهِ حِجازی سَن
تُولانمُوسان بُو سِلسلَه نین اَشقیاسینَه

بُو مَنزلی مُزیّن اِئدوب رَنجَه قیل قَدَم
جانیم فَدادی دینِ مُبین رَهنَماسینَه

طُوعَه جَنابِ مُسلمی چُوخ اِحترامیلَه
عِزتلَه داخل اِیلدی اوُز غَم سَراسینَه

گِئچدی بیر اِیودَه باشلادی راز و نیازینی
مَشغُول اوُلوب هَمان گِئجَه حَمد و ثَناسینَه

صبُح اوُلدی لِیک هَمان گِیجه کاش اوُلمِییدی صُبح
اَعدای دین اَل آچدیلا دِینین فَداسینَه

بیحَد قُشُون هَمان او اِئوین دُورَه سین آلوب
تُولاندیلار او اِبنِ زیادین خَطاسینَه

بیر ازدِحام و کِثرَتیلَه صَحنَه دُولدولا
شایَد که مُسلمُون اوُلا باعِث هَراسینَه

حاشا او شیر دِل اِئدَه بیر ذرّه اِی هَراس
حَملَه اِیدوب او سِلسلَه نُون پیشواسینَه

شیرِ خدا شُجاعَتینی اِئتدی آشکار
مأمُوم اوُلوب علی کیمی بیر مُقتداسینَه

سِندوردی کُوفیانی چیخاردُوبدی صَحنیدَن
لایقدی بُو وَلیِّ خدا مَرحَباسینَه

بیر تَک وُجود، عَلاوه اوُزی شَهرَه نا بَلَد
بیر شَهر قَتلینین دُوشَه لَر اِدّعاسینَه

باک اِیتمَدی قلج وُورا صُولَتلَه دُشمَنَه
حَسرَت قالا او حالیدَه اوُز اَقرباسینَه

گاهی اِیدوبدی حَملَه صاقا گه دُونُوب صُولا
گه حَمله اِیتدی قَلبِ سپاهین لِواسینَه

پُوزدی نِظامِ لَشگری شیرِ خدا کیمی
باخمازدی اَهلِ کُوفَه نین اَصلاً قُواسینَه

شیری شکار اِیتماقا اوُل رُوبَهانِ عَصر
بیر دام قُوردولار اوُلا باعِث خَفاسینَه

گُودالَه سالدیلار اوُنُون اَطرافینی آلُوب
ظُلماتِ کُفر حایل اوُلوبدور ضیاسینَه

بیر زَخمِ کاری یِتدی ازَلدَه جَمالینَه
قان پَردَه چَکدی اَبر تَک اوُل مَه لَقاسینَه

اَوَّل اَلیندَن آلدیلا تیغین اَل آچماسین
اَگلشدی گَردِ غُصّه دلِ دِلرُباسینَه

مُحکمِ طَناب کَینیلَه باغلاندی قُولّاری
بیر کیمسَه اوُلمیوبدی گَله اِلتماسینَه

اِبنِ زیاد مَجلسینَه چَکدیلَر اوُنی
قُربانِ دینِ حَقّ گِیدوبدور مِناسینَه

بی اِعتنا او بَزمَه گِیرُوب وِیرمَدی سَلام
تَسلیم اوُلوب بو فانی جَهانین قَضاسینَه

مَرجانَه اوُغلی غِیظیلَه بیر باخدی مُسلمَه
آچدی زَبانِ نَحسین اوُنون ناسَزاسینَه

حُکم اِیلدی گَلون آپارون ئولدورون بُونی
باوَر یوخیدی هر عَمَلین اوُز جَزاسینَه

بامَه چیخاتدی دُشمَن اوُنی اوُزگه حالیلَه
اَفسُوس یِتمیُوب اَلی مُشکل گُشاسینَه

بامِ اوُستَن اِئتدی کَربُبَلا سَمتینَه نَظر
وِیردی سَلام ازَل شَهِ گُلگُون قَباسینَه

عَرض اِئتدی گلمَه کُوفیَه اِی شاهِ کَربَلا
بِئل باغلاما بُو طایفَه نُون اِلتجاسینَه

سُوزؤن تمام اِیلَمَه میش کَسدیلَر باشین
تُف اَهلِ کُوفَه نُون گله شَرم و حَیاسینَه

باشسیز یارالی نَعشین اوُنون آتدیلار یِرَه
مَعنادَه باتدی عِترتِ یاسین یاسینَه

اِیپ سالدیلار اِیاقلارینا کُوفیان اوُنون
بُلمَزدیلَر که کیم گلَه جاق خون بَهاسینَه

#زائر حسین دامنینَه وُور همیشَه چَنگ
اُمّید باغلا هر اِیکی دُنیا عطاسینَه

• شنبه
• 14
• مرداد
• 1402
• ساعت
• 23:44
• نوشته شده توسط
• یوسف اکبری

آه او وَقتَن مُوج اِیدِیردِی کُوفَه دَه شرّ و فَساد
تَختِ عِزّتدَه اوُتُورمُوش نانَجیب اِبنِ زیاد

داد او ساعَتدَن دُوشوب دور شَهرَه شُور و وَلوَلَه
آلدیلارر جَلادار ساطیورِ زَهر آگین اَلَه
بیر غَریبی کُوفَه دَه قاتل چَکُوردی مَقتَلَه
جِسمی اَلقان چِشمی گِریان مُسلمِ بی اَقربا
گَیتدی قُربانگاهَه قُول باغلو او فَرزَندِ وَفا

باخدی بیر حَسرتلَه گُوردی دوره سین آلمَش ظُلام
یُوز دُوتوب سَمتِ حِجازَه نایِبِ والا مَقام
آخرین لَحظَه صَبادَن گُوندرُوب بِِیلَه پَیام
اَی عَزیزِ حَضرتِ زَهرا خداحافِظ حسین
سَرو نازِ گُلشَنِ طاها خدا حافِظ حسین

شاهبازِ اوُجِ عِزّت شَهریارِ مُلکِ دین
گُور نِجَه سَندَن اوُزاق سالدی مَنی اَشرارِ کَین
دوره مَه چَکمِش زیاد اوُغلی حِصارِ آهَنین
اِی اُمیدِ قِبلَه گَاهیم دِینَه سُلطان یا حسین
بَذل اِیدِیر کُویُوندَه مُسلم جانی قُربان یا حسین

عِشقوُون پابَندیَم مَن اِی اِمام اوُغلی اِمام
خواهِشیم سَندَن بُو دور اِی زادهء خِیر اَلاَنام
اوُغلُون اَکبرلَن ابُولفَضلَه یِتُور مَندَن سَلام
باش قالوب جَلاد اَلیندَه قَلبیمی دُوتمُوش مَلال
دُودمانِ هاشمَه سُویلَه مَنی اِیتسُون حَلال

اِی حسین اِی زِینَتِ دُوشِ پِیمیَر اَلوِداع
اِی اَبُوالفَضل اِی عَلمدارِ هُنروَر اَلوِداع
هاشمی خاللّى جَوان شَهزَادَه اَکبر اَلوِداع
اِیلَرَم عَرضِ اِرادَت قاسمِ مَه پِیکَرَه
بیردَه دِیداریم سِیزیلَه قالدی روزِ مَحشَرَه

مُرغِ عُنقای حُسینَه کُوفَه اوُلمُوشدی قَفَس
گُوردِیلَر غُربَت دِیارِیندَه مَنه یُوخ دادرَس
سینه می مَجروح اِیدوبلَه باتدی سینَمدَه نَفَس
آسمانِ بُرجِ عِزّتدَه سُولان بیر اوُلدوزام
یا حسین اِیلَه نَظَر اَشرار اِیچیندَه یالقُوزام

آیری بیر مَطلب وُروب اوُد بُو دِلِ ناشادِیمَه
کُوفَیَه گَلمکلِگُون دُوشدی بُو ساعَت یادِیمَه
یانمُورری قَلبیم مَنیم بی سَرپرست اوُلادِیمَه
کُوفِیَه گَلمَه اَماندور اِی شَهِ والاجَناب
کُوفِیَه گَلسُون اِیدَه لّر زِینَبین قَلبین کَباب

کُوفِیَه گَلمَه بُولار طَبلِ بِشارَت چالماسُون
اِنتِقامِ غَزوهء بَدر و حُنِینی آلماسُون
باشنَه زِینَب باجُون یِدّی قَرانی سالماسُون
باش کَسُوب قانلار تُوکَن جانلار آلاندور کُوفِیان
جَعفَرِ طَیّارون اوُلسا قُول سالاندور کُوفِیان

کُوفِیَه گَلمَه لِباسُون اوُلماسُون گُلگُون قَبا
یاخماسُونلا قاسِم داماد اَلینَه قان حَنا
دُوشمَسُون قُولسُوز کِنارِ عَلقمَه صاحِب لِوا
کُوفِیَه گَلسُون اَگر اُمّ البَنین بیچاره دور
اَکبرین لِیلاسی سَرگَردان قالُوب آوارَه دور

کُوفِیَه گَلسُون اَگر آقا گَتُورمَه اَکبَری
قُورخُورام اوُچ شُعبَه اوُخلا ، اوُخلاسُونلا اَصغری
قُوی حِجاز اِیچرَه قالا تا عِترَتِ پِیغَمبَری
خواهِشیم سَندَن بُو دور اِی هَر اِیکی دُنیایَه شاه
قُویما قالسُون زِینَبی دُشمن اِیچِیندَه بی پَناه

سَن مَنی نائب حِساب اِیتمَه سَنَه من بَندِه اَم
اوُلمادی مُمکُن رِکابُوندَه قالام شَرمنده اَم
حالیمی آلسُون خَبر قَصّابلَر کُویینده اَم
وِیردیلَر چُوخلی شِکنجَه تارِ صَبری قِیرمادُوم
بِیل همَین قَدری ئولونجَه دُشمَنَه یالوارمادُوم

#نادری یاز کُوفَه دَه تَلخ اوُلدی گَر کامیم مَنیم
شَربَتِ نُوشِ شَهادَتشان دُولُوب جامَیم مَنیم
مَکّیَه بادِ صَبادَن گئتدی پِیغامیم مَنیم
من خداحافِظ حسین اَللهَه تاپشُوردُوم سَنی
نِسگیلم جُوش اوُلدى غُربَتدَه حَلال اِیلَه مَنی

• شنبه
• 14
• مرداد
• 1402
• ساعت
• 23:44
• نوشته شده توسط
• یوسف اکبری

جانَه گتُوردی مُسلمی دورِ زَمانَه یا حسین
کُوفه دَه عُمریمُون گُلی دُوندی خَزانَه
یاحسین

چرخِ وِلایتُون حسین یاره لی شاهبازیَم
کُوی مُحبتُون بُو گُون عاشقِ پاکبازیَم
مُسلَمَم عشقوین آقا فِدیهء سَر فَرازیَم
عشقیم عَیاندی حاجَتی یُوخدی بَیانَه
یاحسین

ای آدی آلِ هاشمَه مایهء فَخر و آبرُو
روزِ ازَلدَه تاپمیشام بیر سَنُون عشقویلَه خُو
حِیف ئورگیمدَه عاقبَت قالدی مَنیم بُو آرزو
چاتمادی اَللّریم اِیلَه کَهفِ اَمانَه یاحسین

مَندَن حسین کَسُوب قَدَر قَهریلَه اِعتناسینی
سالدى قَضا کَمندینَه دَرد و غَم آشناسینی
زاغ و زَغَن اَسیر اِیدوب بُرجِ وَفا هُماسینی
ظُلم اوُخُونا فَلک مَنی اِیتدی نِشانه
یاحسین

صِدق و صَفا مَسیرینی اَهلِ نِفاق اِیتُوردیلَر
بوتهء جُوریدَه جَفا خارین اَکُوب بتُوردیلَر
ظُلم لَرین نَهایتَه کُوفه لیلَر یِتُوردیلَر
بِیع و شَرادَه ساندیلار سُودی زیانَه
یاحسین

اِیتدی یُولومدا یا حسین مَکریلَه کُوفیان کَمین
دامِ بَلایَه سالدی بُو یاره لی شیری مُشرکین
دورمی آلدى باغلیُوب قُولاریمی گُروهِ کین
قَتلیمَه آختارور زیاد اوُغلی بَهانه یاحسین

قُویمادی دَهرِ دُون منی بیردَه یِتَم وِصالیوَه
اَللّریُوی ئوپوب باخام حَسرتیلَه جَمالیوَه
صَدمَه یِتشمَسُون گُوروم سَلطنَت و جَلالیوَه
سَنلَه وِیروب خدا شَرَف کُون و مَکانه
یاحسین

عِشق سَفیریَم حسین گر چه باشی بَلالیام
کُوفه دَه یالقُوزام تَکم یُوخ کُمَکیم یارالیام
سندَن اوُزاق سالوب منی دَستِ سِتم آرالیام
آیریلقُوندی دُوندرَن اَشگیمی قانَه
یاحسین

ماهِ سِپهرِ عِشقوی رُویَت اِیدَنلَر ئولدورور
مُسلمی اَللّرین ئوپُوب بِیعت اِیدَنلَر ئولدورور
نامَه یازُوب حُضوریوَه دَعوت اِئدنلَر ئولدورور
عار اوُلا بِیلَه میزبان بِیلَه جَهانَه یاحسین

دَگسَه سَنین یُولوندا مین یارَه بُو زارَه یُوخ دِیمَم
یاره لی جِسمیمی اَگر چَکسلَه داره یُوخ دِیمَم
دُونسَه گُوزومدَه گُوندوزُوم یا شَبِ تارَه یُوخ دِیمَم
گِیتسَه باشیمدا لا دِیمَم نُوکِ سِنانَه
یاحسین

بَسکه گِیدوبدی قان سالُوب پِیکریمی تَوانیدَن
پِیکِ اَجَل یِتیُوب داخی آیریلورام جَهانیدَن
دارِ بَقایَه عازِمَم اِیندی بُو دارِ فانیدَن
اِیلوری رُوحیمُون قُوشی عَزمِ جِنانَه
یاحسین

قُویمادی کینهء زَمان کامَه چاتا بُو خونجِگر
اِیلدی اِیکی اوُغلومی آخر عَم اوُغلی دَربدَر
قالدی خَدیجَه نین گُوزی یُولدا ئولونجَه دِیدَه تَر
بیردَه چَتین آچوب وورا زُلفینَه شانَه
یاحسین

ئولمَگیمی اِیشت سَه گر قُویما خَدیجَه آغلاسین
وای بابا وای دِیُوب یانُوب قَلبِ جَهانی داغلاسین
گُل یُوزَه گُوزیاشی تُوکُوب باشینَه قارَه باغلاسین
هر شَب و روز گلمَه سین آه و فَغانَه
یاحسین

مُسلمَه عِزّتیلَه اِی یُولدا دُوتان عَزا حسین
دُوت اَلینی، #حسینی_نون ، اِی شَهِ کَربَلا حسین
اِیلَه کَرم ئورکدَه کی دَردینَه قِیل دَوا حسین
ذِکری اوُلوبدی دِیلدَه هر آن یانا یانَه
یاحسین

#شادروان_حسینی_زنجانی

• شنبه
• 14
• مرداد
• 1402
• ساعت
• 23:46
• نوشته شده توسط
• یوسف اکبری

صادِر اِیتدُون مُسلمَه حُکمِ سفارَت یا حسین
بیو سَفیرَه کُوفه دَه اوُلدی جَسارت یا حسین

اَهلِ کُوفَه اِئتمدی اوُز اِیتدیقی عَهدَه وَفا
دِیللّریندَه چُوخدی کِینَه ذَرّه جَه یُوخدی صَفا
بیر مَنم بیر شَهرین اَهلی هر یِتَن اِیلور جَفا
بُو غَریب اَحوالین اِئتمولّر رَعایَت یاحسین

اَکثَریَت بِیعتَه اِئتموشدی اوّل اِتّفاق
اِتّفاق اِئتمُوشدِیلَر گُویا که سالسُونلار نِفاق
زُوریلَه خَلق اِیلیُوبلَه خَلق اِیچیندَه اِختناق
اِختناقَه بُو سُوزوم اِیلَر کِفایَت یا حسین

خَلق اِئدوبلَر خَلقین اَفکارِیندَه وَحشتدَن رِکُود
یُوخدی جُرأت اِیله سین بیر کیمسَه اِظهارِ وُجود
قُورخودان تَلبیسیلَه اِبلیسَه اِیلوللّر سُجود
یا اِئدوللّر کُورکُورانَه اِطاعَت یاحسین

سَرشِناسانِ قَبائل تُولانوب سیم و زَرَه
یاندیلار بُو سیم و زَردَن رُوشن اوُلمُوش آذَرَه
مُسلمینین سَرنِوشتی دُوشدی دَستِ کَافَرَه
کیم تَعارُض اِیلدی اوُلدی سیاسَت یاحسین

بُو سیاسَت اوّلیندَه پُوزدی خَلقین وَحدتین
سَلب اِئدوبدی مِلّتَین آسایِشین اَمنیّتین
اَلدَه بازیچَه اِئدُوبلَر چُوخلارین حِیثیَتین
کُوفه دَه حاکمدی عِفرِیتِ جَهالَت یا حسین

دُوشدی عِفریتِ جَهالَت دامینَه جَمعِ کَثیر
مُحترَم اَشخاصیلَر زِندانی اوُلدی بیر به بیر
تَفرَقَه تَرفندی هانینی اِئدوب اوّل اَسیر
اوُلدی آخردَه شَهادت بُو اِسارَت یاحسین

تَفرقَه باعِث اوُلوب مِلّت مَنی تَرک اِئتماقا
جُوَّ حاکِم سَدَّ راه اوُلدی مَرامَه یِتماقا
تاپمادیم حَقدَن سَوا مأمَن اَمانَه گِئتماقا
تا چاتا سَر مَنزِلَه بارِ اَمانَت یاحسین

چاتمادی بارِ اِمانَت مَقصَدَه شَرمندِه اَم
جِسمیدَن آیریلسادا جان عَهدیمُون
پابَنده اَم
اِی مَسیحایَه وِئرَن دَم مَن او دَمدَن
زِندِه اَم
وار سَنَه عِشقیم بُولُورسَن بی نَهایَت یاحسین

لُوحِ دِلدَه نَقش اوُلان یُوخدور جَمالوندان سَوا
اوُلمیُوب اوُلماز خیالیمدَه خیالُوندان سَوا
یُوخ مَلال و مُحنَتیم هِرگِز مَلالُوندان سَوا
واردی سینَمدَه مَلالُوندَن مَلالَت یاحسین

فِکریمی دَرد و مَلالُون فِکری اِشغال اِیلیُوب
بُو تَفَکّر مُسلمی آشُفتَه اَحوال اِیلیُوب
قَصدِ خِدمَتلَه سَنَه مَکتُوبُون اِرسال اِیلیُوب
اؤز اؤزون اِیلور وَلی اِیمدی مَلامَت یاحسین

بِیلَه بُولسِیدیم اوُلالّار کُوفیان پِیمان شِکَن
چُوخدا تَعجیل اِیلمَزدیم نامه اِرسالیندَه من
سَن که آگَهسَن ضَمیریمندَن اَیا شاهِ زَمَن
خِدمَتیمدَه وار نَه اَندازَه صَداقَت یاحسین

شاهِدِ صادقدی صِدقَه بُو یارالی پِیکریم
عِشقِ پاکُون چُون ازَل گُوندَن اوُلوبدی باوَریم
هَر مَهالکدَه مَنیم بُو باوَر اوُلدی یاوَریم
باوَریم آرتُوردی مَندَه اِستقامَت یا حسین

اِستقامَت فَرض اوُلوبدی چونکه آلِ هاشمَه
سَهلیدور بُو باوَر اوُسته هَر نَه گَلسَه باشیمَه
اِستقامَتلَه دایانّام خَم یِتیشمَز قاشیمَه
اِیلَه سین گُفتاریمی حالَیم حِکایَت یاحسین

ِئتمُورَم شِکوَه گَلَن باشَه غَمِ اَیّامیدَن
آز زَماندا کُوفَه دَه یا گُوردُوقُوم آلامِیدَن
من که سَرمَستَم ازَل ساقی اِیچیردَن جامِیدَن
جِسمیمی تَسخیر اِئدوب رُوحِ شَهادَت یاحسین

جانیمُون پِیمانَه سی مُمکُوندی که آسان سِینا
سَعییم اوُلدی قُویمیام پِیمانهء پِیمان سِینا
ظُالمَه مُشلدی آزادَه اوُلان اِنسان سِینا
وِئرمَدِیم بُو سِینماقا مَندَه رِضایَت یاحسین

سَعی اِئدوبدور مُسلمی سِیندیرماقا اِبنِ زیاد
بُولمیُوبدی سِینمارام وار مَندَه مُحکَم اِعتِقاد
اوُردا اَشخاصین عَملکَردیندَن اوُلسُون اِنتقاد
مُشرکَینِ کُوفَه دَن اِئتدیم بَرائت یاحسین

سِیندی جان پِیمانَه سی اَمّا غُروروم سِنمادی
یارَه لُندیم باشیدَن باشیمدَه شُوروم سِنمادی
غُصّه لَندِیم دِلدَه کی وَجد و سُروروم سِنمادی
آرتُوروبدور چُون منَه عِشقُون شَهامَت یاحسین

باش سینُوب عِشقوندَه اَمّا سِینمِیُوب شَخصیّتیم
حِیرت اَفزا دور بُو حالیلَه عَدویَه جُرئتیم
عُمرومُون پایانی دور اَفسُوس اوُلا یُوخ فُرصَتیم
کَعبهء رویُون اِئدَم بیردَه زِیارت یا حسین

آخرین لَحظه گُوزوم جان اوُستَه جانان آختارور
گُورماقا آخِر نَفسدَه کامِل اِنسان آختارور
چِشمِ مُشتاقیم سَنی هَر لَحظه هَر آن آختارور
آرزویَه اِیلورَم تَنها قَناعَت یاحسین

آز قالُور عُمرُوم گُولُون دَستِ اَجَل قهراً یُولا
باخدی بیر یاوَر سُراقیندَه گُوزُوم صاقدان صُولا
آرزُو اِئتدُوم یانیمدا اَکبر و عَبّاس اوُلا
گُورمیم بُوندان داخی آرتیق اِهانَت یاحسین

عِشقیمُون مُولا سیزَه یُوخدور بُولَن اَندازَه سین
آچسالار معلوم اولار بو سینه مون دروازه سین
گَر کِتابِ جِسمیمُوندَه پُوزسالار شیرازَه سین
بَرگ بَرگَیندَه اِئدَر قانیم کِتابَت یاحسین

آخرین عَرضیم بُو دور گَلمَه دِیارِ کُوفیَه
یُوخدی اِطمینان داخی خُرد و کُبارِ کُوفیَه
دَستِ ظُلمیلَه یاخُوبلار قان عُذارِ کُوفیَه
چُولقیُوبدی شَهر سیماسین شَقاوَت یاحسین

مُرتضادَن اَهلِ کُوفَه سینه لَردَه کینه نی
ساخلیُوبلار اِنتقامَه کینهء دِیرَینَه نی
سیندِیرا هَر سَنگدِل بیر سَن کیمی آئینَه نی
دِلدَه نُصرَت اَلدَه وار سَنگِ عَداوَت یا حسین

شانَه تَک حَسرت اَلیم زُلفِ پَریشان آختارور
اَمن یِر هر کیمسَنَه اوُلسا هَراسان آختارور
دَردینَه بُو رَسمدور دَرماندَه دَرمان آختارور
اوُلمُوشام دَرماندَه لُطفاً قیل عِنایَت یا حسین

واردی سینمدَه بُولورسَن تیرِ هِجران
یاره سی
اوُلمُوشام هِجرانیُوون بیر عُمر دور
آواره سی
هانسی بی دَرمان دَردین سیزدَه یُوخدور چاره سی
دَردِ بی دَرمانیمَه اِیلَه طَبابَت یاحسین

بیر عَزادارَم سَنه شاهِد بُونا بَزمِ عَزا
شَرمسارَم لِیک جُرمُومدور اوُلان خِجلَت فَزا
قُورخُورام چُونکه قاباقدا حَشر وار روزِ جَزا
واردی سَندَن چِشمِ اُمّید شَفاعَت یاحسین

• شنبه
• 14
• مرداد
• 1402
• ساعت
• 23:50
• نوشته شده توسط
• یوسف اکبری

مُسلمُون شَهادَتی کَربَلا اَساسی دور
فاطمه عَزیزینُون قَتلینون بِناسی دور
مَکّه دَن چِخوب گَلور کاروانِ کَربَلا
یُولدا وِیردیلَر خَبر مُسلمُون عَزاسی دور

شَهرِ کُوفه دَن گَلور گُوردیلَر شُتُر سَوار
ساخلادیلا کُوفه نُون حالینی سُوروشدولار
عَرض قیلدی حَضرتَه دَردناک و اَشگبار
مُسلم آلِ هاشمُون اوّلین فَداسی دور

کُوفه اَهلی اِبتدا ساخلادیلار حُرمَتین
چَکدی زادهء زیاد نقشهء شَهادَتین
بِیعت اِیلیوب صُورا سیندیروبلا بِیعتین
مُسلمَه او مَردمُون اِئیتدیگی وَفاسی وار

دوره دَن داغیلدیلار قالدی واحد اُول جَناب
بیر نَفر غَریبیدی شَهرون اَهلی بی حِساب
آسمانَه اُوج اِیدوب های هُوی اِنقلاب
سَسلَنَن قلجلارون سَهمگین صَداسی وار

دوتماقا او سَروَری بَسکه عاجز اُولدولار
دامِ حیلُه قُوردیلار قَعرِ چاهه سالدیلار
ئولدوروب حُنِین و بَدر اِنتقامین آلدیلار
نَعشینون دوشَن یِری کُوچه لَر آراسی وار

وار سفارشی اُونون بُو حُضُورِ عالیه
یا حسین تَوَقف اِئت گَلمَه شَهرِ کُوفیه
راضی اُولما زِینبون اَگنینَه قَرا گیه
بُو سَفردَه گُورسَنَن زِینبون بَلاسی وار

چون حسینیلَن عَرب خَتم قیلدی صُحبَتین
نَصب اُولوندی خیمه لَر اَندیروبدی عِترتین
اِیستدی خَدیجَه نی مُسلمُون اَمانتین
چوخ نَوازش اِیلدی عِینِ حقّ رضاسی وار

آلدی ئوز قُوجاقینَه سینه سیندَه ساخلادی
زُلفنون غُبارینی سیلدی قاره باغلادی
حَضرَتون جَمالینَه باخدی اُول قیز آغلادی
آنلادی یَتیم اُولوب مُسلمُون قَراسی وار

آغلاما خانیم قیزیم آغلاما خَدیجَه جان
غَم یِمه آتان مَنم ای عَزیز و مِهربان
سن کیمی سَکینمَه وار بَلالی داستان
وار قاباقدا چُوخ غَمُوز بو غَم اِبتداسی وار

اهلِ بِیتِ مُصطفی با اجازهء اِمام
یاس دوتوبلا مُسلمَه ساخلادیلار اِحترام
شدّتِ فَغانیلَن نالیه گَلوب اِمام
چون او خیمه مُسلمون تَعزیَت سَراسی وار

غَرقِ ماتَم و عَزا دوشدی کاروان یُولا
هر قدَم یاخنلاشُوب وَعدَه گاهِ کَربَلا
الصَلا و الصَلا بایع الله اَشتَرا
سَسلَنن قُوناقلارین عَجلوا نِداسی دور

• یکشنبه
• 15
• مرداد
• 1402
• ساعت
• 13:26
• نوشته شده توسط
• یوسف اکبری

☑️ بند اول

میا به کوفه ای عزیز جان فاطمه
میا که این مکان پر بلا و ماتمه
به جان اصغرت هوای کوفه پر غمه

? عزیز فاطمه حسین / عزیز فاطمه حسین

☑️ بند دوم

آقای من ببین چقدر غمین و مضطرم
غریب و بی کسم نمونده یار و یاورم
شکسته بالم و اسیر قوم کافرم

? عزیز فاطمه حسین / عزیز فاطمه حسین

☑️ بند سوم

صدای العطش داره از آسمون میاد
داره به گوش من صدای ساربون میاد
به سمت این دیار میا که بوی خون میاد

? عزیز فاطمه حسین / عزیز فاطمه حسین

☑️ بند چهارم

به روی بامم و نگاه من به سوی تو
به زیر تیغم و مست مِی سبویِ تو
سر و تنم بشه فدای اون گلوی تو

? عزیز فاطمه حسین / عزیز فاطمه حسین

⭕️ابیات ترکی?

☑️ بند پنجم

کسیل‌له باشیمی الا امیر عالمین
خوشام چیخیر جانیم یولوندا ای ضیای عین
قصوروم اولسا گر حلال ائله منی حسین

? عزیز فاطمه حسین / عزیز فاطمه حسین

☑️ بند ششم

بو جسمیده حسین یارا چاتیبدی یاریه
توشوبدی ظلم دن نفس لریم شماریه
یارالی پیکریم آسیلاجاخ قناریه

? عزیز فاطمه حسین / عزیز فاطمه حسین

☑️ بند هفتم

بو اهل کوفه نین نقدری گور جفاسی وار
باشیندا غارت و جور و ستم هواسی وار
اوزون آل ایندی دن هانچی قیزین طلاسی وار

? عزیز فاطمه حسین / عزیز فاطمه حسین(ع)

• پنج شنبه
• 23
• شهریور
• 1402
• ساعت
• 01:09
• نوشته شده توسط
• یوسف اکبری