یاز ای قلم گینه شایسته داستانلاردان
مقربان خدا ، پاک آرمانلاردان
او کس که قوزادی باش اوج کهکشانلاردان
جمال حضرت حق نور کبریادن یاز
شهید تشنه لب دشت کربلادن یاز
امیر ملک ولا نور چشم پیغمبر
سلاله ی علوی پور ساقی کوثر
حبیب لم یزلی عرش داوره لنگر
بلکده عرشه گیدن تاج انَّمادی حسین
آتاسی جدی کیمین خلقه رهنمادی حسین
سپهر معرفتون شمس عالم آراسی
مطاف روح الامین گنبد مطلاسی
بهشته ناز ایلیر بارگاه زیباسی
وکیل روز جزا آفتاب رحمت دور
عزیز آل عبا کوه استقامت دور
حسین که من تانورام نور چشم طاهادی
شفیع روز قیامت عزیز زهرادی
غلام درگهی عیسی کنیزی حورادی
حسین که من تانورام مست ایدوبدورآفاقی
ویروبدی فطرسه شهپر بلکده قنداقی
حسین که من تانورام شاهکار خلقتدی
حسین که من تانورام شهریار جنتدی
حسین که من تانورام آبروی امتدی
حسین که من تانورام کیچدی باش وجانیندن
حمایت ایله دی ئوز دین آرمانیندن
نجه حسین نه یازوم باشینون بلاسیندن
کتابته یتوروم هانسی ماجراسیندن
نه نوعی شرح ایلیوم چکدیگی جفاسیندن
ویرون اجازه یازوم اهل کوفه داشیندن
آخوردی شامه کیمین قان یارالی باشیندن
او قدری یاره دگوب جسمینه یارا اوسته
چیخوب جدایه باشی قالوا اِنَّما اوسته
گزوب اوحالدا بیابانلاری جِدا اوسته
توکولدی هر یره قان معجزه نشان ویردی
یهودی اولدی مسلمان دوروب اذان ویردی
دوتوبدی دامنه ی علم ایندی مرّیخی
صداقتیله مرور ایله برگ تاریخی
نه چوخ چتیندی نه بدخطّ ونه فرامیخی
گونوز تجلی نور اولدوزا آیا گلمز
او قدری الده سند واردی که سایا گلمز
باخاندا دقتیله منتهی الآماله
ویا لهوفیده کی ثبت اولونموش احواله
حقیقت اهلی گرک دیلدن ایله سون ناله
حسینه اون ایکی مین نامه کوفه دن گلدی
که شرح اولونسا اگر هر بیری مفصلدی
اونامه لرده یازوب کوفیان بی غیرت
عنایت ایله بیزیم باشیمیزه قوی منت
گوزتلیور یولیوی افتخاریلن امت
دیار کوفه ده گل یاور اول بیزه مولا
گوزاوسته قوی قدمین رهبر اول بیزه مولا
الهی رحمت حق دست بازله گلسون
گوزتلوروق یولیوی چاره میز اله گلسون
خزان زده باغیمیز بیرده حاصله گلسون
امیر فاسق و بد سیرتون الیندن داد
یتیش هرایمیزه سیدی ایوون آباد
یازیبدولار اوقدر نامه پیر کنعانه
بساط ظلم و ستم اوج ایدیبدی کیوانه
یتیش هرایه آقا دوندی قلبیلر قانه
حضوریوه یتیشوب بیعت ایلروک سنیله
جهاده امر ایله سون شرکت ایلروک سنیله
گوروب اونامه لری شاه دین قیام ایتدی
جمال حضرت حق حجتون تمام ایتدی
عم اوغلوسون چاغیروب نایب الامام ایتدی
بویوردی مسلمه ای یاور حمیده خصال
گوزتلیور یولیوی اهل کوفه پوزقون حال
عم اوغلی کوفه ده چوخ غملی ماجرا گورورم
اگر چه نامه لری چوخدی چوخ جفاگوورم
بو کوفیلرده وفا یوخدی بی وفا گورورم
اگر چه حیدری تک قویدی کوفیان شرور
سنی حضویمه سسلنموشم بودور منظور
دیار کوفیه گیت ای عزیز آل الله
نقدری کوفه ده گور واردی حقه خاطر خواه
بوشرطیلن که منی لحظه لحظه قیل آگاه
فراق اوخیلا دل آسمانی من دلّم
اجازه ویرسه اجل منده کوفیه گلّم
سحر نمازینی تا قیلدی زاده ی زهرا
حضورینه چاقیروب مسلمی شه بطحا
ایکی بلد چی اونا قوشدی شافع عقبی
خدای قادر منانیدن توان آلدی
و ان یکاد اوخیوب اونلاری یولا سالدی
اوپوب امامین الین مسلم نکو انفال
مینیبدی مرکبینه شاهباز سیمین بال
دیدی نقدری بلا گلسه قیلّام استقبال
غم فراقیوه گرچه بولود کیمین دولّام
اجازه ویرسون اگر کوفیه روان اولّام
یتیشدی کوفیه مسلم جلال و جاهیله
مقابل اولدی نچه لشکر و سپاهیله
هامونی جذب ایله دی اولین نگاهیله
گلوب حضورینه عرض ارادت ایله دیلر
حسین آدیلا او سرداره بیعت ایله دیلر
بیری اوپردی الیندن بیری ایاقیندن
بیری دیردی سنون امریوه مطیعم من
بیری دیردی چتین ال تاپار سنه دشمن
بیری دیردی که عشق عالمینده بی تابم
بیری دیردی که من جان نثار اربابم
هره سی بیر دیلیلن دیندیروب اوسرداری
بیر عده وعده ی پول ویردی بعضیسی یاری
خلاصه ایتدی مجاب اهل کین او عیاری
حسینه نامه یازوب یار مه لقا تیز گل
بوکوفیلرده وفا چوخدی با وفا تیز گل
آلوبلا دوره سینی کوفیان بد بنیاد
تظاهر ایله دیلر ببعته او قوم عناد
چکیلدیلر محکه نطفه های شیطان زاد
نماز مغربی تا قیلدی شاه دین یاری
عشا نمازینه تک قویدولار او سرداری
چاتوبدی بیر یره ایش مسلم اولدی آواره
ترحم ایلمه دی بیر نفر او سرداره
خیانت ایله دیلر شهریار بی یاره
غریب لیگین دونونی اگنینه فلک توخودی
کاَنِّه کوفه ده هیچ بیر نفر کیشی یوخودی
یازوم الهی نجه من بو غصه لی خبری
اشیتسه کیم بو سوزی قان اولار یقین جگری
گزوردی یکه و تنها اوغملی کوچه لری
غریب و خسته و بیکس امین آل الله
دایاندی بیر قاپویا دیلده ذکر یا الله
آچوب همان قاپونی طوعه قیلدی استقبال
دیدی بویور منه کیمسن ایا نکو انفال
بویوردی مسلمم ای بانوی حمیده خصال
سفیر شاه حجازم عقیله دلدارم
ولیک کوفه ایچینده غریب و بی یارم
گوروب او حالدا اونی طوعه گوزلری دولدی
او قدری آغلادی تا رنگی گول کیمین سولدی
سفیر زاده ی پیغمبره معین اولدی
باخوب اویان بویانا گوردی کوچه نی خلوت
ایدوبدی منزلینه طوعه مسلمی دعوت
دیلینده زمزمه ی لا اله الّا الله
اولوبدی طوعیه مهمان سفیر ثارالله
گیجه نی صبحه کیمین غرق غصه ی جانکاه
او قدری آغلادی سلطان دین فراقینده
یوخی آپاردی اونی یاحسین دوداقینده
نماز صبحه دوروب عبد بی بدیل اوغلی
بویان طرفده ولی طوعه نون ذلیل اوغلی
عدویه ویردی خبر بیزده دور عقیل اوغلی
توکولدی لشکر بی شرم و بی امان قاپویا
الینده تیغ چیخوب مسلم جوان قاپویا
باخوب اویان بویانا خیریلن شری گوردی
اولده بیعت ایدن آشنالری گوردی
جفا صفینده همان بی حیالری گوردی
بویوردی آند اولا پیغمبر گل اندامه
طناب دار اولاجاق باشلاروزدا عمامه
کیمون نه جراتی ور جنگه تن به تن گلسون
الینده خنجر و تیر و تبر گلن گلسون
منیم کسیک باشیما جایزه ویرن گلسون
الیمی آتسام اگر خنجر شررباره
کسوک باشوز دولانار رزمگاهی آواره
بله خیال ایدوسوز رزمگاهیدن قاچارام
اراده ایتسم اگر باغلی یولاری آچارام
آقام گلن یولا باشلاروزی کسیب ساچارام
نقدری گلسه قوشون یا علی دیوب دورّام
آقاما نامه یازان اللریزی سیندیرام
اوگون که اللریمی آلدی اللرینه حسین
آدیمی قویدی منیم یار و یاور ثَقَلین
قویوبدی نوکرینون باشینه او گوندن دین
اوگون قبول ایله دیم من بو کارزاره گلم
باشیمدا گیتسه محال امریدور سیزه اگیلم
نقدری سعی ایله دی اول گروه کین پرور
کسیب دی یولارینی مسلم نکو منظر
بیر عده نون قولی گیتدی بیر عده سیندن سر
خلاصه گوردوله تا الده واردی شمشیری
محالیدور که شکار ایله سونلر اول شیری
- چهارشنبه
- 5
- خرداد
- 1400
- ساعت
- 21:59
- نوشته شده توسط
- یوسف اکبری
ادامه مطلب
