زبانحال حضرت زینب به حضرت رقیه «س»

گل سینه مون اوسته قیزیم  یوز قویما دیواره
یاتما قوری یرده بالا اولٌام یوزی قاره

صبر ایله قوی گلسون بابان آلسون قوجاقینه
یوخسا اوزاقدور یولاری یانما فراقینه
باد صبایه نامه یاز یولا سراغینه
چوخ سویلمه هاردا بابام بو غملی بیماره

قارداشیوین چوخدور غمی بیمار و نالاندور
سن تک اونوندا گوزیاشی چون آب باراندور
بس هاردا قارداشیم دئمه لیلا پریشاندور
یوخ چاره سی سجادیمون اولدی جگر پاره

سن آغلیاندا عمه جان لیلا دئیور اکبر
گوزیاشیوه باخجاق رباب آغلیور دئیور اصغر
سالسا ربابین جانینه لیلا سوزی اخگر
محشر اولار ویرانه ده آی نازلی یکباره

اکبر دئینده آز قالور لیلا وئره جانین
عرشه اوجالدور بینوا بو یرده افغانین
یوخ طاقتی گوزیاشینه قاتمیش اورک قانین
بو غمده گوزیاشین توکور یاندوقجا رخساره

بلکه علی اکبر یاتوب بسترده ناخوشدور
یوخسا گلر ویرانیه شاید الی بوشدور
صبر ایلسن الله سوور بو ایش قیزیم خوشدور
شاید ده گلدی عمه جان بیر الده گوشواره

سالموش ربابون ناله سی اود عالمه عمه
ویرانه ده عمه ن باتوبدور ماتمه عمه
اما رباب آغلور قیزیم آیری غمه عمه
اصغر دوشوب یاده دئیور بس هاردا گهواره

سندن گلوبدور « صادقی » ایستور صله آغلور
گوزیاشی رخساره توکور گلموش دیله آغلور
گورموب بقیع نی عمه جان ایلور گله آغلور
سن دعوت ایله هجریدن یاندی او بیچاره

شاعر : محمدرضا صادقی