باخ علی گوزلریمه
غصه لی سوزلریمه
لطف ائدوب ایله عمل
بو وصیتلریمه
غسلومی وئر گئجه دفن ایله منی
سنه تاپشوردوم حسین و حسنی
آز ملال ایله علی
آز خیال ایله علی
باغریقان فاطمه نی
گل حلال ایله علی
تک قویور فاطمه وجه الحسنی
سنه تاپشوردوم حسین و حسنی
آی منیم دادرسیم
منیم عشق و هوسیم
باشیم اوسته گل اوتور
داخی چخمور نفسیم
ترک ائدور فاطمه بیت الحزنی
سنه تاپشوردوم حسین و حسنی
سیلی دگدی یوزومه
اثر ائتدی گوزومه
گوردو آغلور حسنی
منیم آخر سوزومه
کوچه ده گوردی او درد علنی
سنه تاپشوردوم حسین و حسنی
سینه مون وار یاراسی
یارامون یوخ چاراسی
یاره مه باعث اولوب
در و دیوار آراسی
ائتدی مسمار پر افتاده منی
سنه تاپشوردوم حسین و حسنی
منه یاس ساخلیاسان
اوخشیوب آغلیاسان
گلن اولماز یاسیما
قاپلاری باغلیاسان
بالالار گرم ائده بزم محنی
سنه تاپشوردوم حسین و حسنی
قاپوم اوتلاندی منیم
شهپریم یاندی منیم
سینه مون آخدی قانی
کوینگیم قاندی منیم
زینبیم گورمیه اول پیرهنی
سنه تاپشوردوم حسین و حسنی
عشقیمی آتمیاسان
منی آغلاتمیاسان
یاتمیونجا زینبیم
لطف ائدوب یاتمیاسان
قویما پوزقون گوره سولموش چمنی
سنه تاپشوردوم حسین و حسنی
- جمعه
- 14
- دی
- 1397
- ساعت
- 16:40
- نوشته شده توسط
- ابوالفضل عابدی پور
- شاعر:
-
ابوالفضل عباسی معروفان
ارسال دیدگاه