ولایت جسمینه روح تولّاسن قیزیم زینب
بوائودن من کی گئتدیم حکم زهراسن قیزیم زینب
قیزیم مندن صورا چوخ آغلیوب مولانی آغلاتما
یارالی قلب مولایه تسلّاسن قیزیم زینب
اونون گوز یاشلارین سیل قویما سیلابِ عذار ائتسون
نه اولسا ، سن صفای قلب باباسن قیزیم زینب
مبادابیرگئجه خواب ایله سین لب تشنه،قارداشین
حسینه تا آنان جان وئردی سقّاسن قیزیم زینب
گذشت ائت ؛گر سنی زهرا چکنمور بیرده آغوشه
ئوزون احوالیمه آگاه و داناسن قیزیم زینب
اگر چه دار فانیدن یومور گوز باغریقان زهرا
ولی چوخ دل فِکار اولماکی تنهاسن قیزیم زینب
نه اندازه تک اولسان مرتضایه چاتماسان والله
بو غربتده اونا یار اول ،مهیّاسن ؟ قیزیم زینب
سفارش ایلورم بیرده عفاف و حُجب و تقوایه
کی عفّتده منه ، سن المُثنّاسن قیزیم زینب
بو امت شیشۀ احساسیمه سنگ جفا ووردی
ئوزون کی ناظر جور رعایاسن قیزیم زینب
وروب اوچ یوز نفر نامرد اود ، درگاهیمیز یاندی
شراریندن بئله سانما مبرّاسن قیزیم زینب
بو آتشدن سنونده دامنین بیر گون چکر شعله
همان گون کی اسیر دست اعداسن قیزیم زینب
یانار دللر ،صولار گوللر بو اوتدان قانلی صحراده
او چولده محشره غرق تماشاسن قیزیم زینب
یاناندا خیمه لر، قیزلار قاچاندا کوه و صحرایه
آناوی سسله مه هر چند تنهاسن قیزیم زینب
او دم من عازمم خولی ائوینده آیری بیر بزمه
ازلدن عارف سرّ قضایاسن قیزیم زینب
هر اندازه یاغا گر باشیوه سنگ بلا صبر ائت
بیلوندور مظهر صبر و شکیباسن قیزیم زینب
دؤیلّلر کوفه ده چون مرتضایه نسبتون واردی
ووراللار شامیده چون سبط طاهاسن قیزیم زینب
قیزیم بیرده دئنن فضه قاپونین قانینی سیلسون
ئوزون مندنده چوخ عارف به معناسن قیزیم زینب
او قانی مرتضی گورسه دونر گوزیاشلاری قانه
یقینیم واردی مجریّ وصایاسن قیزیم زینب
بوگوندن باشیوه سال قاره ، اول قاره انیسیندی
ئولونجه سنده سرخیل معزّاسن قیزیم زینب
«مُصَیّب»غرق عصیاندی ولی وار بیر تمناسی
نظر قیل عارف هر بیر تمناسن قیزیم زینب
- چهارشنبه
- 19
- دی
- 1397
- ساعت
- 13:10
- نوشته شده توسط
- ابوالفضل عابدی پور
- شاعر:
-
محمد علی مصیبی
ارسال دیدگاه