درگه والاده ثانی عصمت کبرانی ووردی
پنجه ی ظلم و تعدی چهرهٔ تقوانی ووردی
بضعةٌ منّی دئمیشدی حضرت طاها بتوله
پاره ی قلبیدی یعنی فاطمه ختم رسوله
اول جنایتکه گتوردی ثانی ظالم وصوله
بو مسلمدورکه‌زهرادن قاباق طاهانی ووردی
آتش نمرود ثانی اولدی بهت آور خلیله
غصه تأثیر ائتدی طاووس ملائک جبرئیله
درب و دیوارون فشاری قیلدی زهرانی علیله
رعد ماتم شاخدی برگ شاخهٔ طوبانی ووردی
دست بیداد و شقاوت زینت جناتی یخدی
بار غم ناموس حی و قاضی الحاجاتی یخدی
تپراقا نامرد عالم جدّه ی ساداتی یخدی
آفت محنت بهار گلشن عرفانی ووردی
رسم عالمدور هر ائوده حامله اولسا بیر عورت
صاحبی سیر و سلوکینده ائدر مبذول دقت
یاعلی المرتضی بیلمم نه چکدون بس او ساعت
تازیانه آچدی قنفذ خیرة النسوانی ووردی
نقش اولوب تپراقلار اوسته فاطمه دلخسته قالدی
شهپری سیندی همای عصمتون بشکسته قالدی
سولدی طاهانون گل نو غنچه سی سربسته قالدی
هم گلی هم غنچه نی باد مخالف آنی ووردی
چشم لعیادن عذاره اشک پر سوزان توکولدی
جعبه ی ناموس عالمدن یره مرجان توکولدی
میخ آهن کچدی زهرا سینه سیندن قان توکولدی
طاق عرشه هاتف غیبی عزا اعلانی ووردی
بی مروت ثانی ائتدی نقشه ی ظلمی پیاده
سقط اولوب محسن یخلدی فاطمه قالدی آراده
درک ائدوب جریانی فضه سسلدی مولانی داده
یاعلی ثانی پیمبر تاپشوران زهرانی ووردی
شیر یزدان چخدی منزلدن دوشوب صحن سرایه
گوردی رکن منزلین یرده بوکوب فوراً عبایه
واردی حقون سسلدی مندن اگر ائتسون گلایه
من اولان یرده سنی گلدی ائوونده ثانی ووردی
زاده ی خطّابه اولدی حمله ور شیر الهی
فی المثل سیل خروشان قوزادی غیظیله کاهی
چشم ناحق بین ثانی عالمی گوردی سیاهی
مرتضی فوراً یره اول مرد بی ایمانی ووردی
قیلدی فرمایش هاچاندان سن بئله قدرت تاپوبسان
نقشه ی دیرینوون اجراسینه فرصت تاپوبسان
غزوه لرده گیزلنن نامردیدون جرأت تاپوبسان
بو فسادون بی خبرسن بیربیره دنیانی ووردی
من همان کرّار دشمن سن همان فرار دعوا
اللریم خیبر یخان اللردی بازولر توانا
دوشمیوب اصلا کسردن ذوالفقاریم تیز و برّا
گردن گردنکشان لشگر عدوانی ووردی
مصلحت واردی گتوردوم من بو اجحافون دوامین
یوخسا زهرانون همین ساعت آلاردیم انتقامین
ثانی جان تاپدی علینون درک ائدوب فکر و مرامین
تازه دن دوردی ایاقه بانگ نافرمانی ووردی
مسجده تا ایستدی جبراً آپارسون بوترابی
ضعف ائدن زهرا ایاقه دوردی دلده پیچ و تابی
قیلدی فرمایش لگدکوب ایلدوز شرم و حجابی
بابِ بابُ اللهه ظلموز آتش سوزانی ووردی
ترک ائدون صحن سرانی حضرت طاهایه خاطر
ال چکون مظلوم عم اوغلومدان حق یکتایه خاطر
قزلارین اوغلانلارین آغلاتمیون زهرایه خاطر
کیم حسینی آغلادا پیغمبر سبحانی ووردی
پیشوادور مسلمینه حقّینی الدن آلوبسوز
دین قالوب یرده خلافت فکرینه تنها قالوبسوز
وار نه تقصیری نه علت بوینونا شالین سالوبسوز
مرتضایه کیم تعدی ایلیه قرآنی ووردی
سامری سیرت سوز هاموز گلموسوز ظلمیله طوره
ظلمت ایستور ای عجب غالب اولا بو ائوده نوره
تا نفس وار منده امکان یوخ سیزه اعمال زوره
بیربیره بو هتک حرمت عالم امکانی ووردی
گوردی ثانی فاطمه چخمور ره مهر و وفادن
دامنین محکم دوتوب ال چکمیور شیرخدادن
قنفذه ائتدی اشاره کثرت ظلم و جفادن
قمچی سین آچدی او ظالم مفخر لعیانی ووردی
تازیانه قوللاریندان دگدی زهرانون کراری
ال چکوب شیر خدادن گتدی الدن اختیاری
ضعف ائدوب دورماقه بیرده اولمادی تاب و قراری
زینبون آهی هواده خیمه ی ظلمانی ووردی
زینب آدین یازدی خامه گئچمرم زینب سوزوندن
ایلورم دعوت منای عشقه زهرانون ئوزوندن
اود توکور شمرون قلنجی اشک آخور زینب گوزوندن
شمر ظالمده ال آچدی زینب علیانی ووردی
عمه وون یابن الحسن افغان سسی عرشه دایاندی
خنجر شمره ال آتدی اللری قانه بویاندی
تازیانه دگدی یخدی حالینه بیگانه یاندی
زلفینه قاندان نشان سرخ جاویدانی ووردی
- پنج شنبه
- 27
- دی
- 1397
- ساعت
- 12:57
- نوشته شده توسط
- ابوالفضل عابدی پور
- شاعر:
-
مرحوم انور اردبیلی
ارسال دیدگاه