دریغا بی نصیب ائتدی فلک وصل نگاریمدان
آییردی پنجه تقدیر مین حسرتله یاریمدان
نئجه گلزاره یول سالسا خزان گلدن گئدر رونق
ائله جور عدودن، گئتدی رونق لاله زاریمدان
خزان شلاقی خشم ایله خط اوستن سالدی خط قهراً
گلون گل پیکرینده ، ذوق گئتدی ، گلعذاریمدان
جفادن گلشن وحدتده عصیان ایلدی پاییز
که آفت دوتدی گلزاری، بلا یاغدی بهاریمدان
او گل که باغبان چکمیشدی زحمت شوقیله بیر عمر
عدو سولدوردی مایوس ائتدی یاس داغداریمدان
بهشت مصطفایه اسدی بیر طوفان غارتگر
طراوت گئتدی یغمایه، نهال بارداریمدان
منم ایندی بو سولموش، پرپر اولموش گل کناریندا
که بیر لحظه جدا اولسون اینانمازدیم کناریمدان
بو آز عمریله ترک ائتدون منی زهرا بو دنیاده
داهی سندن صورا دویام بو عمر مستعاریمدان
سن ئولدون راحت اولدون همّ و غمدن ای وفا کانی
ولی هیهات اولام آسوده من رنج و فشاریمدان
سئواله حاجت اولماز حالیمه زهرا نظر قیلسان
که حالیم شرحه شرحه شرح ائدر اوز روزگاریمدان
گلستان تولادن طراوت گئتدی سن گئتدون
کسیلدی نغمه شادی پرستو و هزاریمدان
جهان سنله جهاندور نیلورم سن سیز بو دنیانی
بهشت اولسا محال اوز دوندرم حسن وقاریمدان
سنون بیر تار زلفون مین بهشته وئرمرم زهرا
فدک یوخ مین فلک چیخسون غم ائتمم انحصاریمدان
گوز آچ گور قبرین اوسته کیمدی پوزقون حالیله ایندی
که اوج ایلوب گویه ، آه و فغانیم ، انکساریمدان
نه یوز وار قالماقا بوردا نه دیز وار گتماقا نیلوم
ائله مبهوت و حیرانم اوزوم اوز اعتذاریمدان
گئجه غسلون وئرنده چوخ مسائل آشکار اولدی
گورنده جسمون آز قالدیم ئولم اوز شرمساریمدان
سنی دفن ایلینده کیم بیلور نه حاله قالدیم من
فقط آللهیم آگه دور او حال ناگواریمدان
دفاع ائتدون حریم شرع و احکام و ولایتدن
بو خدمت چیخماز ئولسمده منیم قلب فکاریمدان
حریم وحیه دشمن لر جسارت ائتدی من باخدیم
نچون ائتموشدی ساقط فخر عالم اقتداریمدان
آتان پیغمبر رحمت ، یداللهون قولون باغلوب
عنان قدرتیم زهرا چیخوبدور اختیارمدان
اگر رخصت اولیدی مصلحت، ختم رسالتدن
تحمل زنگینی آخر سیلردیم ذوالفقاریمدان
ائله رفتار ائدردیم اوندا بو قوم ستمگرله
که مین دفعه ئولوم ایستردی هرگون کردگاریمدان
گورردی اوندا دشمن رخصت اولسیدی پیمبردن
که بیر کیسمه سلامت قورتولانماز کارزاریمدان
عجب سندن صورا زهرا غریب روزگار اولدوم
داغیلدی یار و انصاریم غریبانه جواریمدان
فقط بیر عده همتلی، وفالی یار و انصاریم
خبر گه گه دو توللار ، قورخا قورخا حال زاریمدان
اودا بو اوچ نفر مقداد و سلمان و ابوذر دور
که امداد ائتدیلر تشیع و تدفین نگاریمدان
یامان گونده خلوصیله حمایت ائتدیلر مندن
گوروم الله رضا اولسون بو اوچ همتلی یاریمدان
سنون بو خاطراتون خاطریمدن چیخمیوب چیخماز
گر ئولسمده وئرر باش سینه وین داغی مزاریمدان
- دوشنبه
- 8
- بهمن
- 1397
- ساعت
- 11:37
- نوشته شده توسط
- ابوالفضل عابدی پور
ارسال دیدگاه