قبریوین کنارینده هر گئجه
مرتضی پریشاندی فاطمه
صبحه تک بو پوزقون مزاریوه
گوزلریم نگهباندی فاطمه
غم سپاهی تعقیب ایدور منی
بو چوله گلنده قدم قدم
فرقتونده ای مونس علی
غم منیم انیسیمدی دمبدم
گلمیوم نجه قبرون اوستونه
ایوده آغلاماقدان مقیّدم
منزلیمده ای باغبان غم
گللرون پریشاندی فاطمه
ای عزاسی رسما دوتولمیان
من اوزوم عزاداریوم سنون
ای مزاری خلقه تانینمیان
دلشکسته زواریوم سنون
ایولرینده بیگانه لر یاتوب
آشنای بیداریوم سنون
بو زمانه سندن صورا داخی
مرتضایه زندانی فاطمه
ای مدافع حقّ مرتضی
ای سلالۀ ختم مرسلین
ای عفیفۀ قائم الصلوة
پاسدار شب زنده دار دین
ائوده خالی محرابیوه باخوب
آغلارام غمونده حزین حزین
ای گل رسالت سنه علی
عندلیب خوشخواندی فاطمه
قلبیم اودلانار گون باتان زمان
گوزلریم دولار آغلارام سنه
زینبون چراغلاری یاندیرار
دل غمین اولار آغلارام سنه
غصه دن آناسیز بالالاریم
گل کیمی صولار آغلارام سنه
گوزیاشیم آخار چون بو گوزیاشی
اهل درده درماندی فاطمه
غسلیوی ویرنده جنازه وه
سو توکوردی اسما یواش یواش
پرده نین دالیندا صحابه لر
آغلاشوردی امّا یواش یواش
بیر اسفلی صحنه گوروب دیدیم
وای یارالی زهرا یواش یواش
گورمییدیم ای کاش او صحنه نی
قلبیم ایمدیده قاندی فاطمه
یوخدی خیر سنسیز بو عمریده
فرقتون ووروب قلبیمه یارا
یوخسا هر گئجه آه و زاریله
من هارا بقیعون چولی هارا
گوندوزی بغیشله گلنمورم
سرپرستم ائوده اوشاقلارا
قورخورام اجل گئج تاپا منی
محنتیم فراواندی فاطمه
- پنج شنبه
- 11
- بهمن
- 1397
- ساعت
- 11:55
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه