سوال :
گون باتور عبداله
ائل یاتور عبداله
آخشامدی اوغول کوچه ده دورما
یتیم لر کیمی بوینووی بورما
جواب :
باغریقانم ننه
ناگرانم ننه
هامینون گلوب ائوه آتاسی
گلمیوب منیم دردیم دواسی
سوال :
یانوب سولما بئله
مأیوس اولما بئله
هجران قوتارار گویچک چیچگیم
گل ائوه ئوزوم نازیوی چکیم
جواب :
آی چخار باخارام
اولدوز تک آخارام
باتدی دیرم آییم چخمادی
بش گونلیک اولدی آغزیمون دادی
سوال :
قیش دونر یاز اولار
یامان گون آز اولار
هی آتا دیوب آهونده یانما
یوواسیز قوش تک ویلان دولانما
جواب :
خسته دور نفسیم
تیره دور قفسیم
اوینیوب گولر ائوده تای توشوم
آواره گزور منیم جان قوشوم
سوال :
جان قربان سوزووَه
گوز دگر گوزووَه
گزمه جیران تک آواره اوغلوم
قویما یوزووی دیواره اوغلوم
جواب :
کیمدن ایلوم گِله
یوخ میلیم منزله
گر چه ئوز ائویم خوش گلور منه
آتامون یری بوش گلور منه
سوال :
گل چراغ یاندیراق
بزم هجران قوراق
باهم اگلشوب دانشاق اوغلوم
اوجا بوی یاره سؤز قوشاق اوغلوم
جواب :
غصّه لر ییَرم
هی آتا دیَرَم
نه ئوزی گلور نه سسی گلور
نه بیر سفردن نامه سی گلور
سوال :
بختیمه یوخ سحر
سن مَلَر من مَلَر
گل یورولوبسان غم داشین آتاق
باش باشه وئرک قول بویون یاتاق
جواب :
بوشلا منی آنا
قلبیم دونوب قانا
قوی گزوم دیوم امان آیریلیق
یامان آیریلیق یامان آیریلیق
- دوشنبه
- 22
- بهمن
- 1397
- ساعت
- 19:17
- نوشته شده توسط
- ابوالفضل عابدی پور
- شاعر:
-
سید تقی سیفی اردبیلی
ارسال دیدگاه