زبانحال حضرت ام البنین سلام الله علیها
عباسیم ای غم پروریم
بنددلیم تاج سریم
گل جان وئرورامّ البنین
یولداقالوبدی گوزلریم
آخر نفسدی آی بالا
گل چال منه لایلای بالا
دلده قراریم هارداسان
زیبانگاریم هارداسان
آچ شهپرون پرواز ائله
باز شکاریم هارداسان
زیبا جمالی آی بالا
گل چال منه لایلای بالا
ام البنینم خستیم
اوغلوم سنه دلبستیم
گل قاز بقیعده قبریمی
زهراجانی جان اوستیم
یوخ بیر کسیم ایوای بالا
گل چال منه لایلای بالا
گوز یاشلی عاشق قان اوتار
تئزگل بوهجرانی قوتار
گلسنده یوخدوراللرون
تابوتیمی بس کیم دوتار
سالّام حجازه های بالا
گل چال منه لایلای بالا
من آه اکوب وای درمیشم
جنگه اوغول گوندرمیشم
ایندی گلن یوخ یاسیمه
یوزقبلیه دوندرمیشم
بیربیر ملالیم سای بالا
گل چال منه لایلای بالا
گوز یولدا قالدیم گلمدون
هی دردون آلدیم گلمدون
گئتدون اوجاقامت بالا
سنسیزقوجالدیم گلمدون
گوندر منه بیر پای بالا
گل چال منه لایلای بالا
گل باشیمی آل دامنه
روحیم گلور مهمان سنه
قانلی علم سینمده دی
بوبیر نشان بسدور منه
گلمز بالاما تای بالا
گل چال منه لایلای بالا
جواب حضرت ابوالفضل علیه السلام
ای قامتی چوگان آنا
آلدیم پیامون جان آنا
گل میزبان اولّام سنه
ای جنته مهمان آنا
دینجلدی روحون آی آنا
لایلای آنا لایلای آنا
معناده یار اولّام سنه
باز شکار اولّام سنه
جنتده حزن اولماز ولی
من سوگوار اولّام سنه
آغلار گوزون یوم دای آنا
لایلای آنا لایلای آنا
بیلّم آناجان خسته سن
عباسیوه دلبسته سن
جسمون اَریتدی غصه لر
چوخ آغلاما جان اوسته سن
من اولدوزام سن آی آنا
لایلای آنا لایلای آنا
آخر نجه دفنه گلیم
آگاهسن یوخدور الیم
گل نازیمی جنتده چک
باش دامنونده دینجلیم
بیربیر یارامی سای آنا
لایلای آنا لایلای آنا
صود وئردیگون شیرم آنا
قان ایچمیشم سیرم آنا
گلسم حسینیم تک قالار
نیلوم نمک گیرم آنا
یاندیم دئمه آخ وای آنا
لایلای آنا لایلای آنا
مادر قوجالسا ناز ائدر
دل دردینی ابراز ائدر
السیز منی گورسن اگر
روحون قوشی پرواز ائدر
اولماز امکلر زای آنا
لایلای آنا لایلای آنا
عاشق گرک دل داغلاسین
یاریله پیمان باغلاسین
وئر پرچمی ئوز اوغلوما
قوی یادگاری ساخلاسین
مندن اونا وئر پای آنا
لایلای آنا لایلای آنا
- سه شنبه
- 23
- بهمن
- 1397
- ساعت
- 13:39
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه