اوجالار عرشه منیم آه و فغانیم گئجه لر
چوخالار سینه ده کی درد گرانیم گئجه لر
منیم عباسیم ئولوبدور ئورگیم یاره لیدی
او سببدندی چیخار عرشه فغانیم گئجه لر
آغلارام بس که حسینیله ابالفضله مدام
قالماز آخرده اودور تاب و توانیم گئجه لر
گوندوز آهیم اثر ایلر گونه محنت زدیم
آییدا درده سالار سوز نهانیم گئجه لر
نیلیوم چاره ندور وار یوخومی آلدی فلک
یورولار غصه چکن جسمیده جانیم گئجه لر
یاد ائدن وقته کئچن گونلریمی اودلانارام
دیرم هارداسان ای نام و نشانیم گئجه لر
گوندوز عبدالهه خاطر اوجادان آغلامارام
وای ابالفضلیم اولار ورد زبانیم گئجه لر
دیرم من کسیلن قولارا قربانم اوغول
آغلارام سیله دونر اشک روانیم گئجه لر
سن ئولندن صورا هر گون یانوب ای وای دئمیشم
غملرون یاد ائلیوب من سنه لای لای دئمیشم
گتوروب محنت و غملر منی جانه ئولورم
گلمیشم حسرتیله آه و فغانه ئولورم
سن ئولندن صورا غم غصه قوجالدوبدی منی
بنذیور قدیم اوغول ایندی کمانه ئولورم
من دیردیم که اوغول دهریده من بختورم
منیلن ائتمدی سازش بو زمانه ئولورم
آلدی دورد اوغلومی الدن ائلدی قاره لچک
گوزومون یاشی دونوبدور داخی قانه ئولورم
کربلاده سارالوب سولدی که گلزار علی
گل عمرومده منیم دوندی خزانه ئولورم
من دیردیم که دوتارسان قوجالاندا الیمی
نه بیلیدیم اولارام درده نشانه ئولورم
قالمیشام گور نه گونه یوخدی الیمدن دوتانیم
کیمدی بیر چاره ائده درد نهانه ئولورم
آرزوم واردی گلوب باغلیاسان گوزلریمی
ائتمیم گوز یاشیمی یوزده روانه ئولورم
(سالک) عمرونده گئدن وقته عزا مجلسیمه
آغلیوبدور سالاجاق شور و نوا مجلسیمه
- چهارشنبه
- 12
- خرداد
- 1400
- ساعت
- 22:38
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه