لحظه آخر عمریمدی گوزوم یولدا قالوب
عون و فضلی گزیرم ساغدا قالوب سولدا قالوب
باغلیا گوزلریمی بیرجوت اوزون قولدا قالوب
قلبیمین بندی گل آخر نفسیمدیر عباس
قان دولان گوزلری گورسم دا بسیمدیر عباس
بیر زمان فخر ائلیردیم هامی عالملره من
دورت بالام وار که باخانلاری دئیردی احسن
شوهریم شیرخدا مفخر هر دور و زمن
ایندی وار دورت بالادان قلبیده سونمز داغلار
قالدیم اول گونلره که حالیمه دشمن آغلار
نه بیلیدیم که بئله در ثمین قالمیاجاق
دورد اوغولدان منه بیر ماه جبین قالمیاجاق
بینوا ام بنینه دا بنین قالمیاجاق
قوزانار تا دم محشر گویه آه و فغانیم
بیر اوغولسوز آنا مثلی چخور القصه جانیم
همدم اولموش منه عبدالله عباس فقط
اودی عباس کیمی منشا احساس فقط
گوزلورم بیرده گله شاخه گل یاس فقط
حضرت فاطمه که جاندان عزیزیدی منه
بسدی بیر دفعه دئسه ( یاخجی کنیزیدی منه )
بسلدیم دورت بالامی نوکر شاه شهدا
اولدولار دوردی ده زینتگر راه شهدا
شمس حسینیمدی ابوالفضلیده ماه شهدا
ولی اول شمس و قمر ایله گونه قالمیشدی
زینبیمدن منیم آرام و قرار آلمیشدی
ئوزومه همره ائدردیم بالام عبداللهی
توپراق اوستونده چکردیم من اورکدن آهی
بش مزار ایله میشیدیم ئوزومه طراحی
گه حسین گاه دئدیم عونیمیله فضلیم وای
ولی چوخ سسله میشم قولسوز ابالفضلیم وای
منی آواره قویوب چرخ زبونین جبری
بیر خبر واردی که تاراج ائلیوبدی صبری
نه دور علت اوجا قامتله کیچیک دیر قبری
ایشیدندن دئیرم چوخ بیچیلن اوغلوم وای
پیکری اصغره بنزر کیچیلن اوغلوم وای
غصه مرگ ایتدی منی غائله آهن عمود
روبروده دایانا اولماز اراذلده وجود
اوخ ووروبلار گوزونه حکم قیام اولدی قعود
منی هیچ محنت و غم بیر بئله یاندورمازدی
که دئیر زینب او باش نیزده ده دورمازدی
گرچه اوغلوم علی اصغردن اولوب شرمنده
خجلتوندن یری ده آیری دوشوب مدفنده
گورجگین مادرینی شرم ائلیردیم منده
غملی عمروم که تاپوپدی بو دقایقده زوال
وار امیدیم هله ده ایلیه سقانی حلال
شاعرم ایستییرم منده چیخام بحراندان
وار گلایه م منی بو وضعه قویان دوراندان
نظر رحمتیوی کسمگیلن شایاندان
بیر کریمانه باخیشلا منه گر اولسا نظر
احسن الحاله منیم حالیمی تبدیل ایلر
- سه شنبه
- 23
- بهمن
- 1397
- ساعت
- 14:14
- نوشته شده توسط
- ابوالفضل عابدی پور
- شاعر:
-
کربلایی رحیم شایان
ارسال دیدگاه