هانسی گروهین بئله سالاری وار
شیعه لرین حیدر کراری وار
کیمدی علی عارف ذی جاهیدور
خلقتین اسرارینه اگاهیدور
شانی بویوکدور اسد الله یدور
ملک ولایتده شهنشاهیدور
نوریدن افلاکیده درباری وار
کیمدی علی ؟ تیغ دوسر صاحبی
زبده مبارزدی هنر صاحبی
تک دئمه دعواده ظفر صاحبی
بلکه مولف دی اثر صاحبی
نهج بلاغه کیمی اثاری وار
خلقه وئریب درس شرافت علی
شه لره اورگتدی عدالت علی
اولمادی پابند ریاست علی
قلبلره ائتدی حکومت علی
گور نه قدر ایندی طرفداری وار
صدقیله (صادق )گینه عنوانی یاز
مدحت شاهنشه مردانی یاز
خیبری فتح ائتدیقی جریانی یاز
ذکر ائله یا فاطمه ؛دیوانی یاز
چون خانیمین دستمدد کاری وار
غزوه خیبرده نبی پیر حق
امر ایلدی یا علی ای میر حق
ال الیوه قهریله شمشیر حق
تا گوره لر عرصه ده ای شیر حق
سن کیمی اسلامین علمداری وار
امره اطاعت ایلدی بو تراب
عرصه ده فورا یارادیب انقلاب
پوزدی یهودین سپهین اول جناب
سسلدی دین پایه سی اولماز خراب
راس ده چون احمد مختاری وار
مرحب او دم اگه اولوب مطلبه
بیلدی دوشوب لشکری تاب وتبه
قلعه نی ترک ائتدی مینوب مرکبه
عرصه ده باخدی او شه اطیبه
گوردی عجب قامت ستواری وار
مرحب ئوزی جنگده مشهوریدی
بیر یل گردنکش و پرزوریدی
قدرت بازو سینه مغروریدی
ظالمیدی چشم دلی کوریدی
حقی او گورمیردی نه انواری وار
چکدی قلیج یکه سوار عدو
سسلدی غیظیله او بی ابرو
صحنه دعواده منم جنگجو
عرصه نی الان ائدرم زیرو رو
منله کیمین جرات پیکاری وار
شیر خدا قویدی قدم عرصیه
دوشدی ایله لرزه او دم عرصیه
صولتیلن ویردی علم عرصیه
باخدی او دریای کرم عرصیه
گوردی کی بیر دشمن غداری وار
مرحب ظالم دئدی برتر منم
جنگیده مین فرده برابر منم
نعره چکیب قان توکن اژدر منم
فخر یهودم یل خیبر منم
هانسی دژین من کیمی خونخواری وار
سسلدی مولا ده دلاور منم
تیغ دو دم صاحبی صفدر منم
گر تانیمورسان تانی حیدر منم
شیر خدا یار پیمبر منم
هانسی شهین من کیمی سرداری وار
جنگی غرض باشلادی پیل یهود
تیغی گلوب فرق امامه فرود
چاتدی جراهت باشینا سیندی خود
ایلدی بیر حمله شه ملک جود
پنجه ده شمشیر شرر باری وار
گویدن انیب ساعقه تک ذولفقار
مرحبی ائتدی درکه رهسپار
روح المین نازل اولوب بی قرار
ئوپدی امامین الینی پیک یار
دست حقین گور نئجه زواری وار
راوی دیور گوردوم علینی عیان
قوزادی خیبر قاپیسین ناگهان
قلعه نی فتح ایلدی شاه جهان
قهریده چاتماز اونا هئچ قهرمان
چون قولونون قدرت قهاری وار
سالدی بوقول یادیمه بیر آیری قول
طبعیمه ای روح قدس یاور اول
نهر فرات اوستونه سال فوری یول
کیمدی دئیر گور سووا تئز مشکه دول
حیدره تای قوه لی قولاری وار
کیم دی بو مولا شرف ناسی دور
گنج شرافتده کی الماسیدور
روح صفا صاحب احساسیدور
کان وفا حضرت عباسیدور
ماه کیمی جلوه لی رخساری وار
- جمعه
- 3
- اسفند
- 1397
- ساعت
- 14:57
- نوشته شده توسط
- ابوالفضل عابدی پور
- شاعر:
-
جعفر صادقی مراغه ای
ارسال دیدگاه