اون ایکی انوار حقدن نور اوّلدور علی
پرتو افکندور جمالی، دینه مشعلدور علی
بو علیّ المرتضادی عالمه مفخردی بو
تَکدی صولتده جهاندا فاتح خیبردی بو
شاه مرداندور، جزاده ساقی کوثردی بو
نور حقدور شکل انساندا مُشکّلدور علی
مظهر تقوا ولیّ حیّ اعلادور علی
یر گویه، ماه و نجومه حکم فرماندور علی
اهل اسلامه ایکی دنیاده مولادور علی
شیر حقدور، جانشین ختم مرسلدور علی
ایلین وقته خدای لامکان دنیانی فرش
خلق ایدوب نورین علینون زینت ایتسون فرش و عرش
اولماسیدی مرتضی نه آی، نه گون، نه عرش و فرش
ماه و انجمدن، فلکدن، گوندن افضلدور علی
اون اوچ ماه رجبده تا شهنشاه نجف
قویدی دنیایه قدم تاپدی جهان عزّ و شرف
بیر بشردور هر صفات خالقیله متّصف
کارگاه خلقته بیر فرد اکملدور علی
ایستدی خالق بو گون دنیایه آرایش ویره
تا یاراتدی مرتضانی دینه پیرایش ویره
اهل اسلامه بو مولا درس آسایش ویره
مکتب پیغمبره استاد اوّلدور علی
شمس رخشان تک تجلّا ایلدی نور علی
شعله لَندی یعنی اسلامین جهاندا مشعلی
من دیمم الله الی دور حیدر کرّار الی
لیک اسلامه پیمبر جسمدور، الدور علی
گَلدی شانینده بو رتبه تاپدی بیله انتشار
لا فَتی اِلّا علی لا سَیفَ اِلّا ذوالفَقار
شانینی عالملره بُلدوردی حیّ کردگار
یعنی سنله کاخ دین بیله مجلّلدور علی
ایتدی کامل دینی بو شاهیله حیّ لایُری
مُستتردور آیه ی "اَلیَومَ" ده بو ماجرا
باخسا هر کامل نظر واضح گورر ایتمز خطا
قدرت الله دور او قدرتدن مکمّلدور علی
بیر بشردور ظاهراً، معناده امّا نوردور
آفرینشدن بو مولا خالقه منظوردور
نور رویندن بو عالم بیله رشک طوردور
علّت غائی، چراغ دینه مشعلدور علی
ای کلام الله ناطق معنی امّ الکتاب
نوکروندور اعظمی لطفوندن ایله کامیاب
اونداکی حقدن یتر روز جزاده بو خطاب
قیل شفاعت چون سنه بیزدن محوّلدور علی
- جمعه
- 3
- اسفند
- 1397
- ساعت
- 15:12
- نوشته شده توسط
- ابوالفضل عابدی پور
ارسال دیدگاه