ای گیدن بلا چولونده
غارته جلالی قارداش
جان ویرور بلالی باجون
هارداسان یارالی قارداش
وار یادوندا سن اُلن گون عرصه گاه نینواده
قان ایچنده جان ویرنده قتلگاه کربلاده
الماقا باشون دیز اوسته اول محل ابتلاده
ایلدیم حسین اراده عرصۀ جدالی قارداش
ال ایاق چالاندا گود قتلگهده سن برادر
باشوی آلام دیز اوسته قویمادی سپاه کافر
باغلیانمادیم گوزون من ای شفیع روز محشر
زینبی او گوندن ایتدی محنتون خیالی قارداش
وار کیمیم بو غربت ایچره باخبر بو نسگلیمدن
آیری دوشموشم وطن دن هم قبیله هم ائلیمدن
دوشموری بو صون نفسده بیر نفس آدون دیلمدن
گوز یاشیم آخور گورنده چشمۀ زلالی قارداش
آلتی گوشه قبرین اوسته چوخ چتین گلم دوباره
گل ئولن زماندا باری باشیمی سن آل کناره
من خجالتم ولیکن سن منی یتور مزاره
آل هاشمه خبر ویر بو اسفلی حالی قارداش
دوزدی هر غمه شریکوق اولماروق غم و محن سیز
سن کفنسیز ئولدن اما قویما من ئولوم کفن سیز
کیم ایدر کفن غریبه یوخ بیلن بو سرّی سن سیز
حیف اولا که سنده مندن دوشموسن آرالی قارداش
حالیمی آنام بتوله کاش بیر نفر یتورسون
اوزگه بیر کسیم که یوخدی زینبه کفن یتورسون
قبره قویماقا بلالی باجوی اوزین یتورسون
یوخدی بیر نفر یانیندا دوغرانوب رجالی قارداش
چخمیوب هله یادمنان ماجرای شام و کوفه
سالدی کوفه نین جفاسی بدر صورتون خسوفه
دوشدی شامیدن منیم ده عمریمون گونی کوسوفه
عمریمون گونی یاخوندور درک ائده زوالی قارداش
گل عزیزه باجوون گور بیرجه حال احتضارین
میلی وار وصاله الدن فرقتون الوب قرارین
گورمویوب دوباره گورمز گوزلری بو روزگارین
من کیمی وفالی باجی سن کیمی وفالی قارداش
«سعدی زمان» علاقه باغلاسا اگر مشیّت
اهل ماتمیله اولسا زینبون مزاری قسمت
کربلایه قیل توجه ایله بو سوزی تلاوت
ای گیدن بلالی چولونده غارته جلالی قارداش
- پنج شنبه
- 23
- اسفند
- 1397
- ساعت
- 17:48
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه