گل آنا زهرا سسیمدن نالیه زندان گلور
هر نفس چکدوکجه زنجیرین یریندن قان گلور
گل منیم جان وئرمگیم زنداندا دشوار اولماسین
باشیم اوسته شمع یاندیر محبسیم تار اولماسین
باری سن گل زینب عمّم تک یاسیم خوار اولماسین
بی کسم بغدادیده غربتده یالقیز قالمیشام
جان وئرن حالیمده عمّم تک آدامسیز قالمیشام
جنتی ترک ائت مکدّر حالیلن بغداده گل
محبس مرطوبیده یاس دوتماقا آماده گل
کنج زندانی ائله ماتمسرا فریاده گل
گلمسون کیم باش آچار کیم سینه سین داغلار منه
گلمسون کیم یاس دوتار کیم اوخشیار آغلار منه
گل آنا اشکین عزاده باغلیان یوخدور منه
باشیمون اوستونده سینه داغلیان یوخدور منه
نه باجیم وار نه قیزیم وار آغلیان یوخدور منه
گل یارالی قلبیمی آخر نفسده شاد ائله
دام درد و غصه دن گویلوم قوشون آزاد ائله
محبسه گلسون بو جان نقدیله پیشواز ایلرم
مقدمون اوپمکله قلبیم عشقین ابراز ایلرم
باشیمی دیز اوسته آلسون عالمه ناز ایلرم
صادقم عشقیمده زینب جانینه اولسون قسم
واردی نقصیم گر سنه حقّ القدم جان وئرمسم
گل هرایه قول قنادی بسته ام یافاطمه
کُنده و زنجیر الیندن خسته ام یافاطمه
گوزلریم یولدا قالوب جان اوسته ام یافاطمه
تنگدور زندان، غم و اشکه بورونّم آی ننه
یوخسا من عطرون گلن سمته سورونّم آی ننه
دهریده گزدیم پریشان اون بیر ایل زندانلاری
سربلند ائتدیم جهاندا حق طلب انسانلاری
چوخ تحمّل ایلدیم تهمت لری بهتانلاری
ایستدیم اعلان ائدم عاشقلره آگاه اولون
ایستدیم تا باغلیام احبابیمه دوزخ یولون
ظلمه صبر ائتدیم که خفّت آل خاتم گورمسین
پیروان مرتضی محشر گونی غم گورمسین
دؤزمیشم هر محنته، شیعه جهنّم گورمسین
شیعه لر محشر گونی مضطر دایانسا دؤزمرم
پیروان مرتضی دوزخده یانسا دؤزمرم
سِند ظالم اینجیدور امّا دئمور تقصیریمی
ئولدوروبدور بوشلامور حتی قوری تصویریمی
آچمیور ظالم اقلّاً بو آغیر زنجیریمی
آچمیور تا سینه دن روحیم قوشی آسان چیخا
بوینومون زنجیری قویمور حنجریمدن جان چیخا
سسلیوم داده کیمی غربتده یوخدور بیر کسیم؟
گور چاغیرسامدا هارا بوردان چیخار آیا سسیم؟
اولدی قرخ پلّه یرین آلتی قرانلوق محبسیم
ئوزگه لردن اوممارام سن وای دئسون بسدور منه
سن باشیم اوسته گلوب لایلای دئسون بسدور منه
لطف ائله گل تشنه لب سقا کیمی باش چک منه
سن اباالفضلین باشین آلدون نجیکی دامنه
ئوز عموم عباس تک جان اوسته محتاجم سنه
جان چیخاندا ایستورم رخساروه باخسین گوزوم
گل او نیلی صورتی گورسون صورا آخسون گوزوم
حسرتم دیداروه سقای پاک انفاس تک
وصلوون مشتاقی ام اول صاحب احساس تک
گل منیمده باشیمی آغوشه آل عباس تک
قوی اوجالسین عرشه باشیم چهره خندان جان وئریم
قوی گولش حالینده سقا مثلی الآن جان وئریم
- یکشنبه
- 11
- فروردین
- 1398
- ساعت
- 15:7
- نوشته شده توسط
- ابوالفضل عابدی پور
- شاعر:
-
مهدی قلندری اردبیلی
ارسال دیدگاه