یا علی قازموشدی قبرون نوح پیغمبرسنون
قالمادی یرده حسین تک پیکرون بی سرسنون
داعی حقّی اجابت ایلین وقتونده سن
نعشون اطرافینده قورموشدی جوانلار انجمن
غسلوی ویردی سنی دفن ایلدی اوغلون حسن
پیکرون توپراقلار اوسته اُرتمدی یل لرسنون
ایل قبیلندن دوشوب آیری وطن سیز قالمادون
اولمیوب دور گل لرون خندان چمن سیز قالمادون
قویمیوبلار نعشوی عریان کفن سیز قالمادون
چاپمادی آت سینن اوسته اون ستم پرور سنون
سن اولنده دشمنون طبل بشارت چالمادی
خیمه گاهون یانمادی اوغلون اود ایچره قالمادی
قیزلارون شاهانه رختین اهل غارت آلمادی
آت دوشونده قوؤمادی اطفالوی لشکر سنون
واریدی بیریاره باشوندا ایا میرهمام
قیزلارون حاضرایدردی ایسین وقته طعام
گون قباقینده یارالی ویرمدون جان تشنه کام
یاتمادی قاتل الینده حالوه خنجرسنون
سن ئولن گون قاتلون مسرورخندان اولمادی
اللرون اوستونده هرگز غنچه بیرگول سولمادی
اوخ بوغازین بیچمدی قونداقنه قان دولمادی
تیریله اوخلانمادی اوغلون علی اصغر سنون
ایتمدون جان اوسته اظهار سوسوزلوق دشمنه
تادیسون سوایستمه بیربیله یالوارما منه
دوتسا دنیانین یوزون سو ویرمرم من سو سنه
سن سوسوز جان ویر – آتاندی ساقی کوثر سنون
گرچه دشمن زهریلی تیغیله بیر یاره ویروب
وای علی وای ناله سیله کوفه شهرین دولدوروب
گوزآچاندا گورمدون قاتل باشون اوسته دوردوب
قارداشیم وای ناله سی دلده باجون سسلر سنون
گرچه بیریاره سنه آرتوردی سوزوالتهاب
سالدی زینب اوز ایونده کولگه یرده رختخواب
سوزش زخمونده تأثیر ایلمزدی آفتاب
قانلی توپراق اولمادی گل جسموه بسترسنون
باشیوه دگدی قلج صبحون زمانی کوفه ده
نیزده آغلاتمادی پیرو جوانی کوفه ده
اولمیوب مطبخ ده خولی میهامانی کوفه ده
اولمادی آرامگاهون روی خاکستر سنون
(#کهنمویی) ایلمه غفلت ایشنده لاجرم
دست خالی سائلی قیترمز ارباب کرم
ایسته اجرون روز محشر- دِی حسینه نوکرم
محکم اسنادوندی الده خامه و دفتر سنون
- چهارشنبه
- 8
- خرداد
- 1398
- ساعت
- 15:29
- نوشته شده توسط
- ابوالفضل عابدی پور
- شاعر:
-
مرحوم سیّد حسین کهنمویی
ارسال دیدگاه