افلاکدن گلور سس
شاه ولایت ئولدی
تنها نه شیر داور
علم و عدالت ئولدی
یر گوی گلوب نوایه ، آغلالّا مرتضایه
اسلامه یتدی صدمه دین شریعت ئولدی
بیر کیمسه که واریدی شخصیت جهانی
هر کلمه حق سوزینده مین حکمت و معانی
محرابده توکولدی دست ستمله قانی
حقّ و حقیقت ئولدی روح سعادت ئولدی
نهج البلاغه سیندن مفهوم اولان حقایق
دنیا بویی جهاندا ناحق و حقه فارق
فوق کلام مخلوق ، دون کلام خالق
دین ئولدی دانش ئولدی ، نام فضیلت ئولدی
گِزلَتدی ابر خونین سیمای آفتابی
ظلمت جهانی دوتدی باغلاندی علم بابی
چکدی تراب تیره آغوشه بو ترابی
باب مجاز آچیلدی روح حقیقت ئولدی
اول راد مرد تاریخ اول رهبر سعادت
بسکه قضاوتینده گوستردی چوخ عدالت
تا شدّت عدالت تولید ایدوب عَداوت
ئولدوردولر علینی ، بِالله عدالت اولدی
شخصیتین اولیدی گر خارجی وجودی
شکل علیده مطلق مرئی اولوردی بودی
ارض غَرّیه اولسون ربُّ السَّما درودی
اوردا یاتان ئولن گون روح شهامت ئولدی
خاکیله زر ، علینون یکسانیدی گوزینده
خلق اولمیوب نظیر و مانندی یر یوزینده
هر خیره امر ائدوبدور موجودیدی اوزینده
تاپدی علی شهادت جود و سخاوت ئولدی
مستجمع صفات ضدّینیدی بو مولا
محرابده دوراندا مرآت زهد عیسی
میدان رزمگهده شیر صفوف هیجا
شیر ئولدی صولت ئولدی نام شجاعت ئولدی
باشدان قلجلاناندا ، اُول رادمرد عالم
اولدی بو شش جهاتین نظم و نظامی برهم
باش وئردی صبح صادق کشف اولدی راز مُبهم
آزاده گی ، فتوّت ، زهد و عبادت ئولدی
روح الاَمین بو سرّی ایتدی جهانه اعلام
ئوولدوردولر علینی سندی ستون اسلام
باش سجده ده بویاندی قانه کفیل ایتام
یعنی که ابن عمّ ختم رسالت ئولدی
یردن اوجالدی عرشه فریاد واعلیّا
بو سسلری ایشیدی زینب او ستر عُلیا
قالدی نه حاله بیلمم توضیحه یوخدی یارا
سسلندی اودلی دلدن مهر و عطوفت ئولدی
اغلار گوزیله گلدی عرض ائتدی مجتبایه
اوضاع منقلبدور ، یر گوی گلوب نوایه
دور گور نه دور بو سسلر ؟ نه گلدی مرتضایه
بیر سس گلور دیوللر شاه ولایت ئولدی
با اینکه چوخ سُوَردی زهرا قزی آتاسین
بونلان بیله الندن ویرموبدی اوز حیاسین
ایتموبدی عزم مسجد گورماقلیقا باباسین
اولدی حیاسی غالب مهر و محبت ئولدی
#گریز به ظهر عاشورا و قتلگاه
دشت بلاده امّا قارداشی شاه عطشان
آتدان دوشنده یورقون آماج تیغ و پیکان
اللر باشیندا قاچدی میدانه دیده گریان
سسلندی دیزده طاقت قلبیمده قوّت ئولدی
گلدی بلالی زینب گوردی او قوم کافر
دُور امامی دوتموش اللرده تیغ و خنجر
یوز دوتدی اشقیایه کای لشکر ستمگر
دینوز که یوخدی نولدی سیزلرده غیرت ئولدی؟
بیر یاره سی واریدی سلطان اولیانین
چوخدور اونیله فرقی سلطان کربلانین
مثلین ولی حسینون گورمز گوزی جهانون
جسمینده اول غریبین سان سیز جراحت اولدی
یازما دایان « #حسینی» اوضاع قتلگاهی
سوز درون زینب یاندیردی مهر و ماهی
بو قدر وار ئولن گون مظلوملر پناهی
مرجانه اوغلی اولدی رسوا سیاست ئولدی
- پنج شنبه
- 9
- خرداد
- 1398
- ساعت
- 12:19
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه