کوفه ده گورسندی یارب بیر دم خنجر ده قان
یاره سیندن آخدی قالدی صورت حیدرده قان
شهر علمون اولدی منشق ضربه دن دروازه سی
هفت شهر عشقه تا سالدی نوا آوازه سی
چخدی قرآنون کأنه جلدیدن شیرازه سی
گوئیا فزت و ربّ الکعبه یازدی یرده قان
آنداولا مظلوم حسینون ختم مرسل جدّینه
شال عبدیّت یاراشدی مرتضانون قدّینه
شهپرین ویردی ملک لر یرده قانین ردّینه
آغلیوبلار قان ملال حیدره شهپرده قان
حقّی واردور شیعه لر محشر اولونجان آغلاشا
ابن ملجم کوفه ده اندیردی خنجر بیر باشا
مرتضی قانه بوروندی ناگهان باشدان باشا
سجده گاهینده یخلدی صورت انورده قان
مجتبی قیلدی نمازی سرور مردان کیمی
بیر گلیم آچدی یره گوز یاشی اولدی قان کیمی
ناطق قرآن بوکولدی جلده بیر قرآن کیمی
صاحب نهج البلاغه حمل اولوب پیکرده قان
توکدی زینب کربلاده عارضه گوز یاشینی
اولمادی بیر کس آپارسون خیمیه قارداشینی
خنجر شمری دوتوب محکم کسنده باشینی
دوغرانوب بارماقلاری زینب گوروب اللرده قان
زینبه فرمایش ایتدی نور عین مصطفی
قاتل خونخوار یمه میداندا ایتمه التجا
گیت باجی اخیامیمه باش چک پریشان قیزلارا
خیمیه زینب گلوب اللرده قان معجرده قان
عرض ایدوب اخیامیده سن شاهد اول ای ذوالکرام
قویمادی شمربن ذی الجوشن حسینه احترام
ناگرانم تک قالوب میدانیده یالقوز امام
چشم شاه تشنیه چکمیشدی یارب پرده قان
- پنج شنبه
- 9
- خرداد
- 1398
- ساعت
- 12:42
- نوشته شده توسط
- ابوالفضل عابدی پور
- شاعر:
-
استاد یوسف معزی اردبیلی
ارسال دیدگاه