توکمه بیر بیله آتام یاسینده گوز یاشون باجی
ئولمیوب صاقدور هله وار یدّی قارداشون باجی
ایندیدن گلمه بئله فریاده چوخ یورما اؤزون
باشون آچما زلفیوی یولما خراش ائتمه یوزون
باجی جان بوندان صورا دنیاده چوخ آغلار گوزون
توکمه بیر بیله آتام یاسینده گوز یاشون باجی
اؤز قرا بختون کیمی سال باجی قاره باشیوه
قلبدن اودلان ولی تخفیف وئر گوز یاشیوه
قویما غَملَنسون تسلّی وئر حسین قارداشیوه
توکمه بیر بیله آتام یاسینده گوز یاشون باجی
صفحۀ رویونده قویما اشگ چشمون خط سالا
اهل بیت مصطفانون گوزلری آغلار قالا
صبر سرمشقین گرک آل علی سندن آلا
توکمه بیر بیله آتام یاسینده گوز یاشون باجی
وار یری گر شعلۀ آهون جهانی داغلیا
هر باخان دلدن یانوب اشگین عذاره باغلیا
اولما راضی باش آچوب امّا حسین چوخ آغلیا
توکمه بیر بیله آتام یاسینده گوز یاشون باجی
ای مصیبتلر آناسی وی بلایه مبتلا
صبر ائله زینب سنون باشوندا واردور چوخ بلا
آغلاما گلموب ظهوره ماجرای کربلا
توکمه بیر بیله آتام یاسینده گوز یاشون باجی
آغلاما وورما یوزه یولما ساچون آچما باشون
ئولمیوب باجی سلامتدور بو یدّی قارداشون
کربلا صحراسینه ساخلا باجی بو گوز یاشون
توکمه بیر بیله آتام یاسینده گوز یاشون باجی
نه منیم زهر جفا آرامیمی الدن آلوب
نه اباالفضلین قولون اعدا هله تندن سالوب
نه حسین مقتول اولوب نه پیکری عریان قالوب
توکمه بیر بیله آتام یاسینده گوز یاشون باجی
غارته ال آچمیوبدور شام و کوفه لشگری
ضرب قمچیدن هله اولموب قولون نیلوفری
آت قباقینده عدو سالموب بنات حیدری
توکمه بیر بیله آتام یاسینده گوز یاشون باجی
آتش غمده یانور هر چند قلب مضطرون
گئتمیوبدور غارته امّا باشوندان معجرون
اولمیوب حایل یوزه معجر یرینه اللرون
توکمه بیر بیله آتام یاسینده گوز یاشون باجی
آچمیوب دست تعدّی فرقۀ بیدادگر
وورمیوبلار اود هله اودلانمیوبدور خیمه لر
قالمیوب آخر اود ایچره عترت خیرالبشر
توکمه بیر بیله آتام یاسینده گوز یاشون باجی
#عاصیا گل داده سیل اشگیوی باغلا یوزه
مشتریدور حضرت خیرالنساء آغلار گوزه
بیر برات کربلا زهرادن ایسته بو سوزه
توکمه بیر بیله آتام یاسینده گوز یاشون باجی
- پنج شنبه
- 9
- خرداد
- 1398
- ساعت
- 13:50
- نوشته شده توسط
- ابوالفضل عابدی پور
- شاعر:
-
مرحوم حسن عاصی تبریزی
ارسال دیدگاه