ای شهادت ملکینه شاه مظفر یاعلی
صاحب تاج شرف دنیایه رهبر یاعلی
شربت شهد شهادت باده سین چکدون باشا
عهدیوی ایفا ائدوب جانانیله وئردون باشا
بیر قلج نیلردی زهر اولسیدی گر باشدان باشا
اولماسیدی حکم تقدیرون مقدر یا علی
گورموسن عمرینده چوخ خوف و خطرلی جنگ لر
جنگ لرده رنگ لر ، نیر نگ لر ، آهنگ لر
صولتوندن محو اولاردی یوزده گلگون رنگ لر
شاهدیم بو مدعایه ، بدر و خیبر یا علی
سن شهید اولدون که تاپسون پیکر اسلام جان
دین حق ، شرع نبی اولسون جهاندا جاودان
اولماسون ظلمیله برهم نظم قانون جهان
عدل حکم ائدسون بو عالمده سراسر یا علی
باشیوه قویدون شرافتدن شهادت تاجینی
عالمه گوستردون آئین و شرف منهاجینی
لطفه کیم شامل ائدوب طاعتده اوز محتاجینی
اولمادون راضی اولا سائل مکدر یا علی
سن کرم درگا هی سن مهد امان ، کهف سخا
شانیوه نازل اولوب قرآندا نصر و انما
سائله اوز خاتمین ائتدون نماز اوسته عطا
لطفیوه واله دی درویش و توانگر یا علی
باشیوی منشق ائدنده ظلم الی شمشیریله
همقدم اولدون مقام سلمده تقدیریله
یوخسا روبه لر اولانمازدی مقابل شیریله
خاصه سن تک شیر اولا بیر شیر داور یا علی
باشیوین محرابه آخدی قانی یازدی یا احد
یا احد دن ظاهر اولدی نقش الله الصمد
سجده طاعتده باشون دیلده یا هو حق مدد
سویلدون « فزت و رب الکعبه » پیدر یا علی
سسلنوب یئر گوی آرا شاه ملک، روح الامین
قتله یئتدی تیغ زهر آ گین ایله سلطان دین
سیندی ارکان هدی ئولدی امیرالمومنین
گلدیلر فریاده گویلرده ملک لر یا علی
عدل و دادین باعث اولدی قتلیوه دنیا بیلور
مومن، گبر و یهود و کافر و ترسا بیلور
اهل عالم سهلدور دنیا و ما فیها بیلور
ئولدورللره کیم اولسا داد گستر یا علی
گویدن ارواح مقدس عالمه ائتدی نزول
گوردیلر محراب طاعتده دوشوب صهر رسول
دیلده تکبیر اولدی یکسر بو حوادثدن ملول
اولدی عالمده عیان آثار محشر یا علی
سن شهادت جامین ایچدون ملک عالم آغلادی
نوح و ابراهیم و خضر و هود و آدم آغلادی
قانه دوندی چشمه چشمه چاه زمزم آغلادی
طعمین آز قالدی وئره جنتده کوثر یا علی
ظلم الیله تا سنی قهراً ایاقدان سالدیلار
فکر ائدوبلر بدر و خیبر انتقامین آلدیلار
سن شهید اولدون ولی بیچاره لر آج قالدیلار
او گئجه بیلدی یتیم لر کیمدی حیدر یا علی
سن علوم و صولت وفضل وشرف دریاسی سن
شیر حق ، شاه ولایت ،قاف دین عنقاسی سن
عدل مطلق عاشقی ، مطلق حقین شیداسی سن
جلوۀ وجهوندی وجه اللهه مظهر یا علی
عالم امکان فدا آ ئینیوه ، فرهنگیوه
عرصه هیجاده ضرب شصتیوه آهنگیوه
عزم ائدنمزدی دلاور جنگجولر جنگیوه
جرعت اولمازدی اولا سنله برابر یا علی
ای هامی رهبر لره عالمده رهبر هو مدد
اهل عشقه عالم امکا ندا سرور هو مدد
فاتح خندق ،احد ، بدریله خیبر هو مدد
تک نه بیز ، سندن مدد ایستر پیمبر یا علی
شأنیوه جنگ احد ده نازل ائتدی کردگار
لا فتی الا علی لا سیف الا ذوالفقار
گلمیوب گلمز جهانه بیرده سن تک نامدار
گورمیوب گورمز جهان سن تک دلاور یا علی
ابن ملجم ایلدی قصد جسارت باشیوه
نیلدی الله بیلور اول پست فطرت باشیوه
ظاهرا ووردی ستمله بیر جراحت باشیوه
باطنا دینین ائوین ییخدی او کافر یا علی
گوز تیکوب « #شبخیز» بیچاره سنون درگاهوه
لطف قیل سن شاه سن اوز بندۀ گمراهوه
دوت الیندن چک اوزون درگاه جنت جاهوه
یوخدی عالمده سنون تک بنده پرور یا علی
- پنج شنبه
- 9
- خرداد
- 1398
- ساعت
- 14:5
- نوشته شده توسط
- ابوالفضل عابدی پور
ارسال دیدگاه