دوتوب ارض و سما ماتم
بو گون هانسی مصیبتدور
قیام محشر کبرا
وَ یا صبح قیامتدور
اولوب ماتمسرا فردوس اعلا جنه الماءوا
گیوب رخت مصیبت ساکنان عالم بالا
خدا صاحب عزا ماتم نشین صدیقه کبرا
عزای ابن عم مصطفی شاه ولایتدور
حقیقتده بو گون ویران اولوب معموره ویران
قیلوب چاک گریبان اولیا جنّ و ملک گریان
نماز صبحده ضربتلنوب فرق شه مردان
بوگون صبحین طلوعی اهل بیته شام ظلمتدور
او وقت اولدی ولیّ بر حق حق کلمه مطلق
متاع عشقه بازار شهادتده ویروب رونق
ایدوب سرمایه جانیله سودای لقای حق
شهادت شرط سودای تمنای شهادتدور
گیجه صبحه کیمی صرف ایلیوب اوقاتی طاعتده
زمانی سجده ده گاهی قیام و گه قرائتده
گهی مشغولیدی راز و نیازه گه تلاوتده
او وقته تک گوروب تا صبحدن ظاهر علامتدور
گوروب اوز قاتلین مولا اولاندا مسجده داخل
یوزی اوسته یاتوبدور اول جفا جو مست و لایعقل
ایاقیله اشاره ایتدی قُم یا ایهاالغافل
ایاقه دور اطاعت وقتیدور نه خواب غفلتدور
قیام ایتدی قیامت چون قیام ایتدی مصلاده
امامه اقتدا ایتدی ملائک عرش اعلاده
کمین ایتدی دالیندان زاده ملجم او اثناده
مهیا اولدی قتلنده گوروب هنگام فرصتدور
جلال کبریا از بس ظهور ایتدی او حضرتده
دیوب تسبیحیله قدوسیان تکبیر گوگلردن
اوجالدی کلمه الله اکبر صوتی هر یردن
ولیّ حیّ داور گوردولر سرگرم طاعتدور
دوشنده سجدیه دوشدی تزلزل عرش امکانه
گوتوردی سجده دن باش یوز دوتوب درگاه سبحانه
الهی شاهد اول ایتدیم وفا من عهد و پیمانه
قبول قتلدن مقصودیم احیای شریعتدور
باشوندان اندیرنده ابن ملجم تیغ خونخواری
یاریلدی سجده گاهی جبهه سیندن اولدی خون جاری
عمامه دولدی قانیله جمالی اولدی گلناری
که بزم وصله سرخ رو گیتماق سعادتدور
اوجا صوتیله گویدن سسلنوب روح الامین گویا
بولون آگاه اولون قتله یتشدی سیّد بطحا
ایشیتدی بو سسی کلثوم مضطر زینب کبرا
تصور ایله حالی زینبون گور بیر نه حالتدور
دیوم بیرده بو سس هاردا یتشدی زینب زاره
او دم که خیمه ده قارداش یولی گوزلردی بیچاره
سکینه داخل اولدی خیمه دن عمه ندور چاره
ندن بس خیمیه گلمور آتام بیر نچه ساعتدور
سراسیمه یریندن دوردی قلبی چوخ گلوب درده
قویوب یوز سمت میدانه گوره قارداش یوزون بیرده
نه گوردی نازنین جسمی دوشوب بی سر قوری یرده
کسیک باشی جدا باشندا مشغول تلاوتدور
( #حقیر ) الده قلم وار ماتم اولاد حیدرده
قلم وور نامه اعمالینی ثبت ایله دفترده
النده خطّ آزادی علیدن اولسا محشرده
کفایت هول محشردن همان خطّ کتابتدور
- پنج شنبه
- 9
- خرداد
- 1398
- ساعت
- 14:6
- نوشته شده توسط
- ابوالفضل عابدی پور
ارسال دیدگاه