ماه رحمت نیمه سی اولدون هویدا یا حسن
مهر و مه اولدی سنه غرق تماشا یا حسن
اهل دل حسن و کمالاتونده نقصان گورمیوب
احسن احسن حسنوه ، ماه دل آرا یا حسن
دست قدرت نقشوی کامل چکوب ای نازنین
مد بسم الله قویوب ابرویه گویا یا حسن
صورتون محشر ، قیامت قامتون ، شهلا گورون
نقش ایدوبدور سنده بیر سیمای زیبا یا حسن
احسن الخالق ئوز حسنوندن ویروبدور پای سنه
جلو لنمش سنده حسن رب الاعلا یا حسن
سن ملک سن ، یا ملک لر سندن حسنون پای آلوب
ملک حسنی فتح ایدوبسن ، ماه سیما یا حسن
مرحبا نقاشوه ، حسنونده غوغا ایلیوب
صورت پیغمبری ایلوبدی احیا یا حسن
سبط اکبرسن ،علینون نور عینی ، مجتبی
میوهء طوبای عشق و میر و مولا یا حسن
فاطمی سیرت سن ، احسن ای گل باغ جنان
سید اهل جنان دلبند زهرا یا حسن
گوزلرون لیلاسی مجنون ایلیوبدور عالمی
ملک دلده خلق ایدوبسن آیری غوغا یا حسن
گوزلرون غارتگر دل دور دلین صهبای عشق
لبلرینده مست ایدن جام طهورا یا حسن
سنده کی چاه زنخدان چاه عشق اولسون گرک
یوسف عشقه او چاه اولسون گوارا یا حسن
دللری تیر نگاهون بیر باخشدا صید ایدور
حسنون ایلور عاقلی مجنون و شیدا یا حسن
تیر مژگانون خوشام کی باغرمی یارسین منیم
زخم عشقیم سینه ده تاپسین مداوا یا حسن
سن کیمی خوش سیرت و خوش صورته جانلار فدا
لطفوله باخ ، قلب مرده اولسون احیا یا حسن
معرفت گنجینه سی سینن ، دوداقون در نثار
عشقده دارائی کونینه دارا یا حسن
پیر عرفان ، مرتضادن درس عشقی مشق آلان
سیر ایدن لاهوتیده سیمای تقوا یا حسن
کشتی عقل ، حسنوون وصفنده اگلشدی گله
نه یازیم وصفنده ای سالار والا یا حسن
بذل و بخشش عالمنده باش گلوبسن عالمه
گورمیوبدور مثلوی بو چشم دنیا یا حسن
حسنی زیبا ، صبری دریا ، قامتی سیمای عشق
سلم و حلم و معرفت مصداقی ، آقا یا حسن
رنگ رخساری اذان وقتنده گل تگ زرد اولان
عبد ممتاز حق حی و توانا یا حسن
زهد و تقواده سر آمد عامل احکام دین
خاضع و خاشع ، بصیر و سبط طاها یا حسن
همتی داغدان اوجا ، شخصیتی داغدان آغیر
حشمتی مافوق درک اهل غبرا یا حسن
عزت و مجد و جلالی درک اذهاندان اوجا
محنت و آلامده فرد شکیبا یا حسن
بیر به بیر کرداری تفسیر کتاب زندگی
حسن خلق و منطق و برنامه شیوا یا حسن
سینه سی گنجینهء مهر و محبت ، معرفت
لبلریندن مست اولان اهل تولا یا حسن
عالم حسرتدی می صهبای عشقه ، ای عجب
سنده کی لعل لبه حسرتدی صهبا یا حسن
معرفت جامیله می ویر منده مست مست اولوم
وار لبنده مست ایدن جام مصفا یا حسن
تار زلفونله منی ایت دام عشقنده اسیر
ایسته جان ، باخ بیر ولی ، خوشدور بو سودا یا حسن
یوخ ( هدایت) ده نه شخصیت ، نه ارزش ، نه مقام
وار یوخوم سندندی ای سردار تنها یا حسن
- یکشنبه
- 2
- تیر
- 1398
- ساعت
- 11:47
- نوشته شده توسط
- ابوالفضل عابدی پور
- شاعر:
-
محمد هدایتی
ارسال دیدگاه