آچ گوزون اویان خواب نازیدن
آل هاشمه ویر خبر باجی
ظلم الیله مسموم اولموشام
جانیمه دوشوبدی شرر باجی
.
.
دور ایاقه یاتما آنام باجی
بو جنایتین پرده سین گوتور
قارداشیم حسینین حضورینه
ایلمه تامّل اوزون یتور
کشف قیل بو رازی اونا دینه
گل اوزونده عبّاسیده گتور
قارداشون حسن ظلمیله دوشوب
رختخوابیده محتضر باجی
.
.
یتدی دشمن اصل مرادینه
کینۀ ضمیرین ایدوب علن
اولدی جور و کین و عنادیدن
سو سبوده ممزوج زهریلن
منده جرعه ای میل ایلدیم
گوردوم اود دوتوبدی بو جان و تن
بو اودین شرارین فقط ئولوم
بو وجودیدن سوندورر باجی
.
.
ایله واردی بو زهریده اثر
قلبیدن توان و قرار آلار
حالیمی گوروب تاب ایدنمسن
گوزلرون بهار ابری تک دولار
دردیمه منیم چاره یوخ باجی
صبح اولونجا عمریم تمام اولار
قورتولار غم و غصّه دن حسن
مجلس لقایه گیدر باجی
.
.
آچمارام باجی دل شکایته
صابرم هر امر قضایه من
صبریده من ایّوبه وارثم
عاشقم اورکدن بلایه من
جور و ظلم بیگانه سهلدور
دوزموشم غم آشنایه من
باخسا ایمدی هر کیم بو حالیمه
سرّینی بو امرین بولر باجی
.
.
روزگاریده کیمسه من کیمی
اولمیوب گرفتار درد و غم
مین لریله طومار اولار اگر
دردیمی ایدم بیر به بیر رقم
وار یری آتام مرتضی کیمی
دردیمی گیدوب چاهه من دیم
بو جماعت سنگ دلده چون
ایتمدی داخی سوز اثر باجی
.
.
بادۀ سیاستله مست اولوب
بو جماعت پست کینه جو
حکم ویردیلر برخلاف حق
مفتیان بی شرم و آبرو
منجرف اولوب راه حقّیدن
دوتدولار جهالتله جمله خو
گیچمسون گوروم بو انامیدن
روز حشر خیرالبشر باجی
.
.
هر زماندا تیر ملامته
قلبیمی نشان ایتدیلر منیم
بار تهمت ناروائیله
قدّیمی کمان ایتدیلر منیم
عاقبت جفائیله باغریمی
غنچه کیمی قان ایتدیلر منیم
گوندوزوم گجم تک سیاهدور
جور شبدن آلما خبر باجی
.
.
خوشدلم قوتولدوم بو رنجیله
صحنۀ غم روزگاریدن
جستجوی تدبیر ایلمه
چاره دردیمه اولدی یاریدن
شوق وصل یاریله بو گجه
جان و دل تُهیدی قراریدن
طالب وصال حبیب اولان
محنت و ریاضت چکر باجی
.
.
قیل بساط ماتم تدارکی
باشه قاره سال آه و زار ایله
اوخشا سن حسینیمده آغلاسون
یاد اوزگه بیر روزگار ایله
یعنی ایت مجسّم بلا چولین
محنت و غمون بی شمار ایله
اول زمان سنی قارداشیم حسین
اوخشاماقه اصرار ایدر باجی
.
.
اونداکی ابوالفضل قارداشیم
راه حقده ایثار ثار ایدر
آی کیمی جمال منوّرین
قانلی بیر شفق استتار ایدر
چشمۀ جهان تاب مهریدن
سلب اختیار و قرار ایدر
رزمگاهیدن خیمه گاهینه
اللری بِئلینده گلر باجی
.
.
سویلر اوخشا عبّاسیمی باجی
آغلیوم فغانیله من اوزوم
بو یانقلی قلبیم ایله یانار
خون دل عذاره توکر گوزوم
گوردوم ایله بیر حالیده اونی
شرح ایدم سنی گلموری یوزوم
حالینی سوال ایلسن اگر
اوخلی مشکینه سال نظر باجی
.
.
طیّ ایدوب وفا شاهراهینی
چون او سالک بی عدیل عشق
کعبۀ وفانی طواف ایدوب
یتدی تا منایه خلیل عشق
ایلدی ایکی قولّارین فدا
اولدی راه حقده قتیل عشق
حق ایکی جهاندا فداسینه
امتیاز عالی ویرر باجی
.
.
سیر ایدردی سکّان نه فلک
صحنۀ مواساتینه اونون
عالم خرد محو و مات اولوب
همّت و کراماتینه اونون
غبطه هر شهید وفا ایدر
حشریده مقاماتینه اونون
اول یگانه کنز وفا کیمی
باش و جانیدن کیم گیچر باجی
.
.
باشی اوستونه من یتن زمان
درد هجریدن ناشکیبیدی
جسمیده یوخیدی رمق ولی
انتظار وصل حبیبیدی
نرگسی گوزوندن آخاردی قان
دید چشمیدن بی نصیبیدی
اوز الیمله پاک ایلدیم گوزون
آچدی گوزلرین مختصر باجی
.
.
باخدی اوّل حسرتله بیر منه
گوردی حالیمی یاندی آغلادی
ایتدی بیر وصیّت او حالیده
قلبیمی وصیّتی داغلادی
ویردی او کناریمده جان باجی
یوزیمه ره چاره باغلادی
تا وارام گرک عارضه توکم
فرقتینده اشک بصر باجی
.
.
هرگز ایستمز «احمدی» یازان
شعرینه مباهات ایلسون
آستانیمیزدن ولیک او
ایستر اخذ حاجات ایلسون
آرزوسی واردی ئولن کیمی
بیزلری ملاقت ایلسون
پیشگاه مولاسینی غلام
بی گمان اؤرکدن سویر باجی
.
.
- سه شنبه
- 23
- مهر
- 1398
- ساعت
- 14:6
- نوشته شده توسط
- ابوالفضل عابدی پور
- شاعر:
-
حاج محمد احمدی صائب
ارسال دیدگاه