کوفه دن عرشه ناله اوجالدی
قدسیان گویده حیرتده قالدی
کیمدی بو عرض ائدوبلر الهی
قانلی سجاده محرابه سالدی
جبرئیل امین ائتدی اعلان
قانه غلطان اولوب شاه مردان
باش آچوب ماسوا اهلی یکسر
قاره پوش اولدیلار دیده لر تر
قان ایچینده یاتوب شیر یزدان
طاقتین سلب ائدوب زهر خنجر
عرشیله فرش اولوب بیت الاحزان
قانه غلطان اولوب شاه مردان
مرتضی سسلنور ای حسن گل
قیل تدارک حنوط و کفن گل
وئر تسلّی بنات رسوله
گلشنه اسدی باد محن گل
آز زماندا سولار باغ و بستان
قانه غلطان اولوب شاه مردان
بوینی چگنینده دورما حسینیم
رستگارم،ادا اولدی دینیم
قول بویون اول حسنله باخوم بیر
آخر عمریمده،ای نور عینیم
فاطمه دشمنی اولدی خندان
قانه غلطان اولوب شاه مردان
گویده حورا بو احواله مضطر
یرده غوغا اولوب همچو محشر
زینبین گوزیاشی قانه دوندی
وای بابا سسلور عباس و جعفر
اسدی صرصر سولوبدی گلستان
قانه غلطان اولوب شاه مردان
امّ کلثوم گلور دیده گریان
گوزیاشی جاری رخساره هر آن
هر قدمده دیور یاندیم الله
بحر آلام ائدوب گور نه طوفان
کاش اولا بو فنا دهری ویران
قانه غلطان اولوب شاه مردان
زحمت یاره چوخ تاپدی شدّت
ایتدی حاذق اطبّا طبابت
اولمادی راه چاره او زخمه
چون ائدوب زهرلی تیغ اصابت
عافیت رختینه یوخدی امکان
قانه غلطان اولوب شاه مردان
کوفه ایتامی ناله اوجاتدی
وا علی صوتی افلاکه چاتدی
انس و جنّ اولدیلار غرق محنت
مرتضی عالمین داشین آتدی
وار یری آغلیا شیعه لر قان
قانه غلطان اولوب شاه مردان
فُزتُ ربّی دئدی شیر داور
خامه گریان اولوب یاندی دفتر
«زعفرا» گوزیاشون قانه دوندر
پاک ائله قلبوی ای محقّر
گی قرا باشه وور ایله افغان
قانه غلطان اولوب شاه مردان
- دوشنبه
- 3
- تیر
- 1398
- ساعت
- 10:42
- نوشته شده توسط
- ابوالفضل عابدی پور
- شاعر:
-
زعفر آزادمهر شیخ درآبادی
ارسال دیدگاه