وروبدی یاره سنه دهرین اشقیاسی بابا
عجبدی اولمادی بو یاره نین دواسی بابا
بلالی باشوی شمشیر کین شکاف ایلدی
منه گلیدی یارالی باشون بلاسی بابا
باشندان آخدی قانین چهره وی خضای ایلدی
اولوندی ئوز قانین ئوز لحیتون حناسی بابا (1)
ئولونجه زینب اگر آغلاسا سنه یری وار
غمنده اوخشیارام ای غم آشناسی بابا
او تپراقا قویولان گل جماله حیف اولسون
ملال و درده دوشن یار و اقرباسی بابا
گجه زمانی گیدن قبره نازنین بدنی
انیس و مونسی ئوز باشدا کی یاراسی بابا
بابا او مشکل آچان اللره قزین قربان
دوشوبدی مشکله عترت ، گیدوب رجاسی بابا
سنه جسارت ایدن ال اولیدی شل ای کاش
دوشیدی درده جهان اشق الاشقیاسی بابا
صفا ایویدی کچیک منزلین گوزوم قربان
داخی بو منزلوین قالمیوب صفاسی بابا
آنام بتولین ئولن گوندن ایله غملیدین
ئورکده واریدی زهرانون ابتلاسی بابا
بابام پیمبر ئولنده سنه جفا اولونوب
که باشه گلمیوب اصلا عدو جفاسی بابا
گوزونده قوم بوغازندا سُموک قالانلار تک
گیچندین ایرمی بش ایل دلده غم اساسی بابا
بش ایل حکومتی ده خون دل یئدین باباجان
حکومتین سنه خوش اولمادی هواسی بابا
سنین ئورکده کی دردین سنه کفایتیدی
آخاری نیمۀ شب دیده وین بکاسی بابا
سسوین عاشقی اولموشدی مسجد کوفه
سالاردی طنطنه مولایه نین صداسی بابا
عدالتین سنه محرابی قتلگاه ایلدی
ریاستین چوخوموش گوئیا بهاسی بابا
غریب آنام کیمی قبرینده گزلین اولدی ، عجب
نه نقشی قبروین اولدی نه بیر نماسی بابا
مزاره مخفی گیدن جانوه قزین قربان
بو زینبین سنه واردور بیر التماسی بابا
اقلی گل یوخودا من سنی زیارت ایدیم
فراقه یوخدی دوزوم گوزلریم ضیاسی بابا
بو کوفیه دیمیسن بیر گونی اسیر گلم
بو زینبین چوخ اولار غملی ماجراسی بابا
اسیرلیق هارا زینب هارا فدا دلیوه
روادی گور منه ورسونلا دل یاراسی بابا
(#هدایتا) دیمه بو کوفه نین جفاسندن
اشاره اولدی گورر واردور اکتفاسی بابا
ـــــــــــــ
(1) لحیة = محاسن
- سه شنبه
- 4
- تیر
- 1398
- ساعت
- 12:30
- نوشته شده توسط
- ابوالفضل عابدی پور
- شاعر:
-
محمد هدایتی
ارسال دیدگاه