ذکر قدوسیله دوردی ذات داور سجده ده
عرشیان سسلندیلر اللهُ اکبر سجده ده
قدسیان یا لَلاَسف گویان ائدوللر سوز وساز
دیده گریان مو پریشان سینه سوزان پر گداز
قویدی محرابه قدم شاه ولا میر حجاز
کعبۀ جانان اولوب مشتاق داور سجده ده
بی ریا دوردی علی المرتضی محرابیده
خالصاً لِله اولوب اعضا سی پیچ وتابیده
نه خیال مال ائدیب نه فکری قالدی خوابیده
باب بسم الله آچوب سلطان محشر سجده ده
گورمیوبدور یاریدن غیرین امیر مقتدا
قویمادی بیر نکته ائلن تاخدا اولسون جدا
آتدی بو ملک فنانی آلدی بیر ملک بقا
اولدی اوز دلداری تصویر مصور سجده ده
آری آری بو طریقیلن ائدن دائم نماز
قید و بند دار دنیادن اولوبدور بی نیاز
وردی مولا جسم وجانین حقه آلدی امتیاز
توکدی لعل زرفشانی درّ و گوهر سجده ده
اول نمازه اقتدا ائتدی هامی کرّوبیان
جلوۀ جانان وئریبدور مسجده ناسوتیان
محشر کبری یاراتدی فرشیده لاهوتیان
سوره توحیده دیل آچدیقجا حیدر سجده ده
سجدیه دوشدی اسوب سجّاده وای حیدر دئدی
سجده دن باش قوزادی احسن ئوزی اکبر دئدی
عشقیلن اللهُ اکبر تیترین لبلر دئدی
مهریلن سجّاده اولدی زار و مضطر سجده ده
لرزه دوشدی مسجده محراب ومنبر تیتره دی
فاطمه افغان ائدیب روح پیمبر تیتره دی
ساقی کوثر غمیندن حوض کوثر تیتره دی
سجده دن قالخاندا مولا اندی خنجر سجده ده
باش بولوندی گورسنوب محرابیده شقّ القمر
زینبه حسرت باخان گوزلر ائدیب یاره نظر
دوشدی کوفه یادینه اولدی بو غمدن خون جگر
آجلارا خاطر اولوب نالان او سرور سجده ده
پارچالاندی سبز عمامه آق محاسین اولدی قان
کوثر غیرت آخوبدور مسجده یاقوت سان
سبز عمامه قرمزی قان آق محاسین نکته دان
چکدیلر قوس قزح رنگین مکدّر سجده ده
باتدی بوغمدن قمر شهر اولدی یکسر با خبر
بیلدی زینب مطلبی عبّاسه چوخ ائتدی اثر
برگ گول تک گوردیلر عباسی غیرتدن اسر
گول اسور ائوده ولی سرو صنوبر سجده ده
سویلدی باخما آنا گوزدن اخان گوز یاشیمه
وئر منه شمشیریمی دنیا دولاندی باشیمه
اندی وئرّم من سنی آغلار حسین قارداشیمه
ایندی مولا تک قالوب بی یارو یاور سجده ده
آلدی شمشیرین اله گلدی شتابان مسجده
تا قدم قویدی علی اوغلی پریشان مسجده
شمس عالم تابی گوردی سالدی افغان مسجده
گوردی گون قاندان سالوب راز اوسته بستر سجده ده
باخدی حسرتلن ابالفضله علی المرتضی
اللری قوینوندا عباسی گوروب ایلور نوا
ائتدی فرمایش بو قدری آغلاما ای باوفا
خالقین ذکریله باتدوم قانه یکسر سجده ده
آغلاما ای صاق گوزوندن سانجلان تیر بلا
دردیمی اوندا بیلرسن باشووه دگسه یارا
سسلننده فاطمه گل سینمه قولسوز بالا
نالۀ زهرایه آغلارلار ملکلرسجده ده
آغلاما کربوبلاده آغلادار محنت سنی
تشنه لیکدن اصغر آغلار یاندیرار غیرت سنی
قلبووی شان شان ائدر سو اوخ یئخار خجلت سنی
محنتوندن دولدی اوغلوم قانلی گوزلر سجده ده
گل ئوپوم آغلار گوزوندن ای گوزوندن اوخ دگن
تلّیده قارداشینون باش یاره سی قدّین اگن
عترت زهرایه خاطر گوز وئرن الدن کئچن
ووردی دردون سینمه قان ایچره آذر سجده ده
باش یاران عاشق بیلر حیدرله عباسین غمین
پاره مشگی گوردی یا زهرا نئجه ام البنین
وئردی عبداللهه عباسین شرفلی پرچمین
توکدی گوز یاش سالدی باشه قاره معجر سجده ده
گوز قالوب یولدا گوزوم قربان سنون یوللارووه
زینب اغلور تلین اوستونده دوشن خوللارووه
ورمادوم بوسه دویونجاق من اوزون قوللارووه
آغلورام یاده دوشنده دیلسیز اصغر سجده ده
سو گورنده گوزلریم علقم مثالی جوشلانور
پرچمه بوقانلی مشگه غملی اشگیم داشلانور
مشگی عبدالله سالاندا چیگنینه غم باشلانور
آغلیور فکر ایلورم زهرای اطهر سجده ده
دورت جوان اوغلی ئولن مادر گرک قان آغلیا
زینبین الده ئولن قارداشینه یاس ساخلیا
درد الیندن یاره لی قلبین #بلادی داغلیا
ذکر ایده مولا ایدن مولایه نوکر سجده ده
- سه شنبه
- 4
- تیر
- 1398
- ساعت
- 13:13
- نوشته شده توسط
- ابوالفضل عابدی پور
- شاعر:
-
بهروز بلادی اردبیلی
ارسال دیدگاه