مسجد کوفه ده ارکان هدایت یخیلیب
قانلی محرابینه باخ روح عبادت یخیلیب
ظلم الی کامه چاتوب . مرتضا قانه باتوب
قورتاروب غمدن علی . عالمی گوزدن آتوب
ووردی ضربت ائله کی دست خیانت باشنا
کول الندی او زمان عدل وعدالت باشنا
آغلادی اهل سما شاه ولایت باشنا
سس دوشوب عالمه تندیس شرافت یخیلیب
ظلم الی کامه چاتوب ...
عرش وفر شین آراسیندا او زمان روح الامین
سسلدی قتل العلی انس وملک اولدی غمین
قانه غرق اولدی نماز اوسته دئدی سرور دین
لنگر کون ومکان میر شجاعت یخیلیب
ظلم الی کامه چاتوب ...
فزتُ ربی دیور آهسته شه ملک سخن
یعنی دینجلدیم اللهی غم الیندن داخی من
آلدی آغوشه ملالیله حسینیله حسن
دئدیلر رهبریمیز باشدا جراحت یخیلیب
ظلم الی کامه چاتوب ...
خدّ وخال اسداللهی ائدیب قانی خضاب
کیم گوروب صورتینی غمدن اولوب قلبی کباب
ایستیور دورسون ایاقه ولی یوخ طاقت وتاب
ضعف ائدیب جسمی یئره شاه ولایت یخیلیب
ظلم الی کامه چاتوب ...
ای مرادی نقدر سنده قساوت واریمش
نیلمشدی سنه قلبینده عداوت واریمش
نقل ائدیلر سنه مولادن عنایت واریمش
ووردون اول کس کی ائدیب سندن حمایت یخیلیب
ظلم الی کامه چاتوب ...
- سه شنبه
- 4
- تیر
- 1398
- ساعت
- 14:15
- نوشته شده توسط
- ابوالفضل عابدی پور
- شاعر:
-
علیرضا عباسی
ارسال دیدگاه